ماگنۋس كارلسەن: شاحمات تۋرالى ويلاۋدى ەشقاشان توقتاتقان ەمەسپىن
ماگنۋس كارلسەننىڭ پىكىرىنشە، سوڭعى جىلدارى بۇكىل الەمدە، سونداي-اق قازاقستاندا زياتكەرلىك ويىنعا قىزىعۋشىلىق ايتارلىقتاي ارتقان. ونىڭ وزىندىك ءبىرقاتار سەبەبى بار.
«سوڭعى ەكى جىلدا كوۆيد پاندەمياسىنا بايلانىستى ادامدار ءتورت قابىرعاعا قامالىپ، ۇيدە وتىرۋعا ءماجبۇر بولدى. شىن مانىندە، شاحمات ينتەللەكتۋالدى ويىنعا اينالدى، ونى ويناۋ ءۇشىن ادامنىڭ قاي جەردە جۇرگەنى ماڭىزدى ەمەس، ۇيدە دە ويناۋعا بولادى. سونداي-اق، «پاتشايىم ءجۇرىسى» تەلەحيكاياسى ۇلكەن تانىمالدىققا يە بولدى، ول دا شاحماتتى تانىمال ەتۋدە ىقپال ەتتى. كەيىنگى كەزدە ادامدار تەك ءتان ساۋلىعىنا عانا ەمەس، ويدىڭ ساۋلىعىنا ءمان بەرە باستادى. سونىمەن قاتار، شاحمات - پسيحيكالىق دەنساۋلىقتى ساقتاۋدىڭ تاماشا ءتاسىلى»، - دەدى ماگنۋس كارلسەن.
سونداي-اق چەمپيون كوپتەگەن شاحماتشىلاردىڭ كاسىبي پسيحولوگتاردىڭ قىزمەتىنە جۇگىنەتىنىن تىلگە تيەك ەتتى. ءبىراق ءوزى اتالعان ماماندارعا جۇگىنىپ كورمەگەن.
«مەن ءوزىمنىڭ نە ىستەپ جاتقانىمدى، قارسىلاستارىمنىڭ نە ىستەپ جاتقانىن جانە ءار ويىندا مەنىڭ جوعارىعا كوتەرىلۋىم مەن قۇلدىراۋىما نە سەبەپ بولاتىنىن جاقسى تۇسىنەمىن. ارينە، مەن جۇگىنىپ، كەڭەس الاتىن جاقىن ادامدارىم بار، ءبىراق ەشقاشان پسيحولوگقا جۇگىنبەپپىن»، - دەپ جاۋاپ بەردى سپيكەر جۋرناليستەردىڭ سۇراعىنا.
باسپا ءسوز ءماسليحاتى بارىسىندا ول جارىستارعا قالاي دايىندالاتىنىن ايتىپ بەردى.
«مەندە ناقتى انىقتالعان ستراتەگيا جوق. مەن شاحمات تۋرالى ويلاۋدى ەشقاشان توقتاتقان ەمەسپىن. بۇل مەنىمەن ءومىر سۇرەتىن نارسە. مەن قالاي وينايمىن، كىممەن وينايمىن دەپ ويلايمىن. نە ىستەۋ كەرەك جانە نە ىستەمەۋ كەرەكتىگى تۋرالى كاسىپقويلار بولىسەتىن جالپى كەڭەستەر بار. شاحمات مەنى يمپروۆيزاتسياعا جانە ويلانۋعا جەتەلەيدى»، - دەدى ماگنۋس كارلسەن.
الەمدىك شاحمات جۇلدىزى بۇل تۋرنيردە ۇلكەن تارتىستى ويىن بولاتىنىن اتاپ ءوتتى.
سونداي-اق ول الماتىلىقتارعا قوناقجايلىلىعى ءۇشىن العىسىن ءبىلدىردى.
«مەنىڭ يىعىما قازاقتىڭ ۇلتتىق شاپانىن جاپتى. بۇل «قازاقستانعا قوش كەلدىڭىز» دەگەندى بىلدىرەدى»، - دەدى ول.
ايتا كەتەيىك، الماتىداعى بالۋان شولاق اتىنداعى سپورت جانە مادەنيەت سارايىندا شاحماتتىڭ راپيد جانە بليتس تۇرىنەن الەم چەمپيوناتى ءوتىپ جاتىر.
