تەگىن ادۆوكاتتىق كومەك قانداي جاعدايدا كورسەتىلەدى
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگ بارىسىندا ادىلەت ۆيتسە-ءمينيسترى الما مۇقانوۆا ايتتى، دەپ حابارلايدى قازاقپارات ءتىلشىسى.
«ادۆوكاتتاردىڭ مەملەكەت كەپىلدىك بەرگەن زاڭ كومەگىن كورسەتۋ جونىندەگى قىزمەتىن ۇيىمداستىرۋدى ادۆوكاتتار القاسى قامتاماسىز ەتەدى. ىستەردى تاعايىنداۋ بويىنشا ءبولۋدى القا جۇزەگە اسىرادى جانە ەسەپكە الۋ جۋرنالىندا تىركەيدى. زاڭ كومەگىن كورسەتۋ تۋرالى جەكەلەنگەن شارت بولعان جاعدايلاردى قوسپاعاندا، ادۆوكاتقا ىسكە ءوز ەركىمەن قاتىسۋعا تىيىم سالىنادى. ناقتى سەبەپ بولماعان جاعدايدا ادۆوكاتتىڭ ىستەن باس تارتۋعا قۇقىعى جوق. مەملەكەت كەپىلدىك بەرگەن زاڭ كومەگىن مۇقتاج ادامدار ونى تۇرعىلىقتى مەكەنجايىنا جانە ورنالاسقان جەرىنە قاراماستان قازاقستان رەسپۋبليكاسىنىڭ اۋماعىندا الۋعا قۇقىلى»، - دەپ ءمالىم ەتتى الما مۇقانوۆا.
مەملەكەت كەپىلدىك بەرگەن زاڭ كومەگى اياسىندا ازاماتتارعا قىزمەت تەگىن كورسەتىلەدى.
«مۇنداي كومەكتى ادۆوكاتتار مەن زاڭ كونسۋلتانتتارى كليەنت زاڭ كومەگىنە جۇگىنگەن ساتتەن باستاپ قۇقىقتىق جاعداي شەشىلگەنگە دەيىن ونى تولىق سۇيەمەلدەي وتىرىپ، وتەۋسىز جانە ەرىكتى نەگىزدە كورسەتەدى. بۇگىنگى تاڭدا بۇكىل رەسپۋبليكا بويىنشا كەشەندى الەۋمەتتىك زاڭ كومەگى 2 مىڭنان استام ازاماتقا كورسەتىلدى»، - دەدى ۆيتسە-ءمينيستر.
قوسا كەتسەك، 2 جىلدىڭ ىشىندە 22 مىڭنان اسا قازاقستاندىققا ادۆوكات ەلەكتروندى فورماتتا تاعايىندالعان.
سونىمەن قاتار، بيىل ادىلەت ورگاندارىنا مەملەكەت كەپىلدىك بەرگەن زاڭ كومەگىن كورسەتۋ كەزىندە ادۆوكاتتاردىڭ ارەكەتتەرىنە قاتىستى 12 شاعىم تۇسكەن.
