كونستيتۋتسيالىق سوتتىڭ جۇمىس مەحانيزمى قانداي بولماق
«ەندى ازاماتتار كونستيتۋتسياعا سايكەس كەلمەگەن قۇقىقتىق- نورماتيۆتىك اكتىلەر تۋرالى قاراما- قايشى پىكىرلەر مەن شەشىمدەر بويىنشا كونستيتۋتسيالىق سوتقا جۇگىنە الادى. بۇل ورايدا «ق ر كونستيتۋتسيالىق سوتى تۋرالى» زاڭىندا كورسەتىلگەن بىرنەشە تالاپ قويىلادى.
بىرىنشىدەن، ازاماتتار ناقتى قۇقىقتىق-نورماتيۆتىك اكتىلەر بويىنشا سوت ورگاندارىنا جۇگىنگەن بولۋى ءتيىس، ياعني اپەللياتسيالىق دەڭگەيگە جەتكەن، سوت شەشىمى شىعارىلعان بولۋى كەرەك. ەگەر قاراۋعا كەلگەن ءىس بويىنشا جوعارعى سوتتىڭ نورماتيۆتىك قاۋلىسى بولسا جانە ازاماتتاردىڭ باسقا سوت ورگاندارىنا جۇگىنۋگە مۇمكىندىگى بولماسا، وندا ولار كونستيتۋتسيالىق سوتقا تىكەلەي جۇگىنە الادى. تالاپ ەتىلەتىن قۇجاتتار «ق ر كونستيتۋتسيالىق سوتى تۋرالى» زاڭىندا جازىلعان.
سونىمەن قوسا، ازاماتتارىمىز قۇقىقتىق- نورماتيۆتىك اكتىلەردىڭ ناقتى كەلىسپەيتىن بولىگىن كورسەتىپ، وزدەرىنىڭ وعان قاتىستى پايىمىن بەرىپ، ونىڭ كونستيتۋتسيامىزدىڭ قانداي باپتارىنا قاراما-قايشى ەكەنىن كورسەتۋى قاجەت»، - دەپ ءتۇسىندىردى الما مۇقانوۆا ورتالىق كوممۋنيكاتسيالار قىزمەتىندە وتكەن بريفينگىدە.
سپيكەردىڭ ايتۋىنشا، كونستيتۋتسيالىق سوتقا تۇسكەن شاعىم 3 اي قارالادى. الدىمەن، سوت اپپاراتى ازاماتتىڭ قۇجاتتارى مەن ونىڭ كەلىسپەگەن شەشىمىن تەكسەرىپ، تىركەۋگە الادى.
«شاعىم تۇسكەن سوڭ، ءارى قاراي كونستيتۋتسيالىق سوتتىڭ اپپاراتى ءتيىستى تەكسەرىس جۇرگىزەدى. شاعىم تىركەلگەن جاعدايدا، ءىستى الدىن الا قاراۋ بەلىگىلەنەدى. ەگەر ۋاقىتقا توقتالاتىن بولساق، سوتقا جۇگىنگەن ازاماتتىڭ شاعىمى تۇسكەن كۇننەن باستاپ 3 اي ىشىندە قارالادى»، - دەپ تۇيىندەدى ۆيتسە- مينيستر.
ەسكە سالايىق، وتكەن ايدا سەنات «ق ر كونستيتۋتسيالىق سوتى تۋرالى» زاڭدى قابىلداعان ەدى.
