قازاقستاندا كوممۋنالدىق تاريف وسەدى

بۇگىن سەناتتىڭ جالپى وتىرىسىنان كەيىن تىلشىلەر مينيسترلەن ەلىمىزدە جەلىلەردىڭ توزۋى كورسەتكىشىنە قاراي تاريفتەر قالاي وزگەرەتىنىن سۇرادى.

«كەلەسى جىلدا، ياعني ەكىنشى جارتىجىلدىقتان باستاپ ءتيىستى وزگەرىستەر بولادى. سەبەبى سۋبەكتىلەرگە، سودان كەيىن مەملەكەتتىك مەنشىكتە بولاتىن سۋبەكتىلەرگە ءوز جۇمىسىن جاڭعىرتىپ، جەلىلەردى جاڭارتۋ كەرەك. پرەزيدەنت سايلاۋالدى باعدارلاماسىندا ءتيىستى كورسەتكىشتەردى بەلگىلەدى. وسى ورايدا جۇرگىزىلگەن ەسەپتەۋلار اياسىندا جەلىلەردىڭ توزۋ كورسەتكىشىن 15-20 پايىزعا تومەندەتەمىز. تاريف كوتەرىلەدى، باسقا جول جوق. ەڭ كۇردەلى نىسانداردى قارايمىز. ولار جان- جاقتى زەرتتەلەدى. وعان بايلانىستى ءتيىستى ءتاريفتى كوتەرۋ ماسەلەسى قارالادى»، - دەدى ءا. قۋانتىروۆ.

ونىڭ سوزىنە قاراعاندا، اتالعان زەرتتەۋلەر اياسىندا تاريفتەردىڭ كولەمى ناقتىلانادى.

«مىسالى، ەكىباستۇزدا سۋبەكتى تاريفتى 2,5 ەسە كوتەرۋگە ۇسىنىس بەردى. ارينە، وسىنداي دەڭگەيدە كوتەرۋ مۇمكىن ەمەس. سوندىقتان ونى ءالى دە تالقىلايمىز»، - دەدى ۆەدومستۆو باسشىسى.

بۇل تۇرعىدا مينيستر تاريف كوتەرۋ اياسىندا تۇرعىنداردىڭ جاعدايى نازارعا الىناتىنىن، حالىققا ەلەۋلى اۋىرتپالىق تۇسىرمەۋ ماسەلەسى ەگجەي-تەگجەيلى قارالاتىنىن ايتتى.

ايتا كەتەيىك، بۇگىن سەناتتا قارالعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەت باسشىسىنىڭ جەكەلەگەن تاپسىرمالارىن ىسكە اسىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.

قۇجاتتا ينۆەستيتسيالاردى ۇلعايتۋ جانە كوممۋنالدىق جەلىلەردىڭ توزۋىن ازايتۋ ءۇشىن قاجەتتى جۇمىستاردى جۇرگىزۋ ماقساتىندا زاڭدا بەكىتىلگەن ءتاريفتى ونىڭ قولدانىلۋ مەرزىمى اياقتالعانعا دەيىن وزگەرتۋ تۇرعىسىندا قوسىمشا نەگىزدى كوزدەيتىن تۇزەتۋلەر ۇسىنىلدى.

الىبەك قۋانتىروۆ بۇل نورما قابىلدانسا، كاسىپورىندار تاريفتى ءوز ەركىنە قاراي كوتەرە المايتىنىن ءتۇسىندىردى.

«بۇل رەتتە ءتيىستى شەكتەۋلەر بولادى. ءار سۋبەكت پەن ءوڭىر بويىنشا تاريفتەردى كوتەرۋ تۋرالى ۇسىنىستارىن ەگجەي-تەگجەيلى قارايمىز. اتاپ ايتقاندا، ءبىزدىڭ ۆەدومستۆودا، ودان كەيىن قوعام تالقىلاۋىندا بولادى»، - دەدى مينيستر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى