قاڭتار قاھارماندارى انتقا ادال بولىپ قالدى

«قاڭتار» جوباسى اياسىندا قازاقپارات رەداكتسياسى كوزسىز باتىرلىقتىڭ ۇلگىسى بولعان تالدىقورعانداعى وقيعانى بايانداماق.

7-قاڭتار كۇنى تاڭەرتەڭ تەرگەۋ يزولياتورىنا شابۋىل (الماتى وبلىسى بويىنشا ق ا ج د ل ا-155/16 مەكەمەسى) جاسالدى.

20 عا جۋىق ادامنان قۇرالعان بەلگىسىز قارۋلى توپ تاڭعى 11:30 دا عيماراتقا وق جاۋدىرا باستادى.

قاراقشىلارمەن اتىس كەزىندە ادىلەت اعا لەيتەنانتى ماۋلەن مىرزابەكوۆ جارالانىپ، ادىلەت پراپورشيگى ەربول ەرجانوۆ كوز جۇمدى.

تەرگەۋ يزولياتورى قىزمەتكەرلەرىنىڭ جۇيەلى ارەكەتىنىڭ ناتيجەسىندە قىلمىسكەرلەردىڭ شابۋىلىنا تويتارىس بەرىلدى.

اعا لەيتەنانت ماۋلەن مىرزابەكوۆتىڭ ايتۋىنشا، شابۋىلداۋشىلار اۆتوماتتان وق جاۋدىرىپ، قورقىنىش پەن ۇرەي سەزىمىن تۋدىرۋعا تىرىسقان.

دەگەنمەن، تەرگەۋ يزولياتورىنىڭ بۇكىل قۇرامى شابۋىلعا جۇيەلى ۇيىمداستىرىلعان ارەكەتپەن تويتارىس بەرە بىلگەن.

«ولار وسى عيماراتتىڭ بۇرىشىنا كەلىپ جاتتى. سۇمدىق اتىس بولدى. سول كەزدە وققا ۇشتىم. جەرگە قۇلاپ بارىپ، اۋنادىم. ءبىراق وقتىڭ تيگەنىن بىلگەن جوقپىن. سول ساتتە قان كەتتى. ەڭ ءبىرىنشى وتباسىمدى ويلادىم. بالالار ايتتى «قىزىم، قىزىم!» دەپ جاتتىڭ دەپ. سول كەزدە سانامدا قىزىمنىڭ بوي جەتكەنىن مىندەتتى تۇردە كورەمىن دەگەن وي بولعان شىعار»، - دەيدى ماۋلەن مىرزابەكوۆ.

7-قاڭتاردىڭ ناعىز باتىرى ەربول ەرجانوۆ بولدى. تاجىريبەلى قىزمەتكەر قورعانىستى ۇتىمدى ۇيىمداستىرا ءبىلدى.

الايدا، العان جاراقاتىنان ارىپتەستەرىنىڭ قولىندا قايتىس بولدى.

«وسى جەردە ءوزىمىزدىڭ ارىپتەسىمىزدى، قارۋلاس دوسىمىزدان ايىرىلىپ الدىق. ادىلەت ەرجان ۇلى ءبىزدىڭ ۇستاز دەپ ايتساق تا بولادى. بۇل كىسىنىڭ ەڭبەگى كوپ سىڭگەن»، - دەپ ەسىنە الادى ماۋلەن مىرزابەكوۆ.

ەربول ەرجانوۆ - ەڭ تاجىريبەلى قىزمەتكەرلەردىڭ ءبىرى ەدى.

لا-155/16 مەكەمەسىنىڭ اعا باقىلاۋشىسى قىزمەتىن اتقارعان ول 6-قاڭتاردا زەينەتكە شىعۋى ءتيىس بولاتىن.

قايتىس بولعان ءى ءى م ارداگەرىنىڭ ارتىندا جۇبايى مەن ەكى بالاسى قالدى.

ەربول ەرجانوۆتىڭ ۇلى - اسكەري ينستيتۋتتىڭ كۋرسانتى. قاڭتار وقيعاسىنىڭ شۋى باسىلماعان شاقتا ءتىپتى اكەسىن سوڭعى ساپارعا شىعارىپ سالا المادى.

ويتكەنى، سول كەزدەگى جاعدايعا بايلانىستى وقۋ ورنىنىڭ بازاسىندا بولعان.

ۇلتتىق ازا تۇتۋ كۇنى قارساڭىندا مەملەكەت باسشىسى قاسىم- جومارت توقايەۆ ءوزىنىڭ جارلىعىمەن قاڭتاردىڭ مارقۇم بولعان 16 باتىرىن ماراپاتتادى.

بۇل تىزىمدە اعا پراپورشيك ەربول ەرجانوۆ تا بار. ونىڭ تۋىستارىنا Ⅲ دارەجەلى «ايبىن» وردەنى تابىستالدى.

قازاقپارات كومانداسى الماتىدا دا، قازاقستاننىڭ وزگە وڭىرلەرىندە دە قاڭتار قاسىرەتى كەزىندە قىلمىسكەرلەر مەن توناۋشىلاردىڭ ارەكەتىن ءوز كوزىمەن كورگەن وقىرماندارىمىز از ەمەس ەكەنىنە سەنىمدى.

وقىرماندى ءوز وقيعالارى جايلى اڭگىمەلەپ بەرۋگە شاقىرامىز. بىزگە مىنا ەلەكتروندى پوشتا ارقىلى حات جازۋعا بولادى:

kazred@inform.kz

rusred@inform.kz

بىزبەن الەۋمەتتىك جەلىلەر ارقىلى دا بايلانىسۋعا بولادى:

Telegram: @qazaqparat_kz, @kazinform_news

Facebook: @KazakparatKZ، @كازينفورم

Instagram: @qazaqparat_kz, @kazinform.

قاڭتار قاسىرەتى جايلى ايتىلماعان وقيعا قالماۋى كەرەك.

اۆتور

ءاليحان اسقار

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى