بۇركىتپەن اڭ اۋلاۋ قازاق مادەنيەتىنىڭ ماقتانىشى بولىپ قالا بەرەدى
«قازاقتار بۇگىندە وزدەرىنىڭ ەجەلگى ءداستۇرى - قۇستارمەن اڭ اۋلاۋدى جالعاستىرۋدا. اڭشىلىقتىڭ بۇل ءتۇرى ۇرپاقتان- ۇرپاققا جالعاسىپ كەلە جاتقان قازاق مادەنيەتىنىڭ ماقتانىشى بولىپ قالا بەرەدى»، - دەلىنگەن شەتەلدىك اقپارات كوزىندە.
3000 جىلدىق تاريحى بار ءداستۇر قازاقستاندا ءبىرقاتار قازاق وتباسىلارىنىڭ اراسىندا ءالى كۇنگە دەيىن ساقتالىپ كەلەدى. 300-گە جۋىق وتباسى ەجەلدەن كەلە جاتقان ءداستۇردى ساقتاپ، ونى نەگىزگى كاسىبىنە اينالدىرعان.
سونداي شاڭىراقتاردىڭ ءبىرى - ايان سەيىتجاننىڭ وتباسى. «انادولۋ» اگەنتتىگىنە بەرگەن سۇحباتىندا سەيىتجان وڭتۇستىك قازاقستانداعى نارىن اۋىلىندا تۇراتىنىن، ءۇش اتاسىنان بەرى قۇسبەگىلىكپەن اينالىسىپ كەلە جاتقاندارىن جەتكىزگەن.
ونىڭ ايتۋىنشا، ءوزى اڭشىلىقتىڭ بارلىق قىر- سىرىن اكەسىنەن ۇيرەنگەن.
«اكەمدى اتام وقىتقان. بالا كەزىمنەن ەسىمدە قالعانى، ۇيىمىزدەن بۇركىت ۇزىلمەيتىن»، - دەيدى سەيىتجان.
قۇسبەگى باستاپقىدا ۇيادان كىشكەنتاي بالاپاندى قالاي الاتىنىن، ونى قولعا ۇيرەتۋ جولدارىن، اڭ اۋلاۋعا باۋلۋ تاسىلدەرىن بايانداعان.
«اڭشىلار قۇستاردى ۇياسىنان الىپ، ءوز ۇيىندە وسىرەدى، اڭ اۋلاۋعا دايىندايدى. بۇل - كوپ جىلدىق پروتسەسس. بۇركىتپەن اڭشىلىقتى كاسىپكە اينالدىرۋ ءۇشىن مۇنىڭ فيلوسوفياسىن جاستايىنان مەڭگەرۋ كەرەك. سول سەبەپتى دە بۇل كونە ءداستۇر بىزدەگىدەي وتباسىلاردىڭ ارقاسىندا جالعاسىپ كەلە جاتىر دەپ ايتا الامىن. بۇركىتتەردى بىرنەشە ۇرپاق ءوسىرىپ كەلەمىز»، - دەيدى اڭشى.
ول اتامۇرا ەسىمدى بۇركىتىمەن ءتۇرلى تۋرنيرلەرگە قاتىساتىنىن اڭگىمەلەدى. اتامۇرا بۇگىندە ءتورت جاستا، وسى كۇنگە دەيىن 10 تۇلكىنى ىلگەن.
تاعى ءبىر قۇسبەگى - نۇرعايىپ ىرىس ۇلى، ونىڭ وتباسىندا دا بۇركىتپەن اڭ اۋلاۋ ءداستۇرى ۇرپاقتان- ۇرپاققا جالعاسىپ كەلەدى. ول موڭعولياداعى قازاقتار تۇراتىن بايان- ولگي ايماعىندا 40 جىلعا جۋىق اڭشىلىقپەن اينالىسقان.
«قىزىمدى كىشكەنتاي كەزىندە بۇركىتپەن اڭعا اپاردىم. قازىر ونىڭ قۇسبەگىلىگى مەنەن ارتىق. ول تۋرالى فيلمدەر ءتۇسىرىلدى. مەن اتا- بابالارىمنان بەرى ۇلتتىق ءداستۇرىمدى جالعاستىرىپ كەلە جاتقانىمدى ماقتان تۇتامىز»، - دەيدى اڭشى.
اۆتور
اسحات رايقۇل
