اتىراۋ وبلىسىندا قۇمار ويىندى زاڭسىز ۇيىمداستىرعاندار سوتتالدى
اتىراۋ وبلىسى بويىنشا ەكونوميكالىق تەرگەپ- تەكسەرۋ دەپارتامەنتى ۇيىمداستىرۋ- باقىلاۋ باسقارماسىنىڭ باسشىسى بەكبولات انەسوۆتىڭ مالىمەتىنشە، زاڭسىز ويىن بيزنەسى قۇرمانعازى اۋدانىندا ۇيىمداستىرىلعان.
«قارجى مونيتورينگى ورگاندارىنىڭ نەگىزگى مىندەتتەرىنىڭ ءبىرى - «كولەڭكەلى ەكونوميكا» سالاسىن، ونىڭ ىشىندە زاڭسىز ويىن بيزنەسىن ۇيىمداستىرۋشىلارمەن كۇرەسۋ. اگەنتتىكتىڭ اتىراۋ وبلىسى بويىنشا دەپارتامەنتىنىڭ قىزمەتكەرلەرى بيىلعى جىلدىڭ ماۋسىم جانە تامىز ايى ارالىعىندا قۇرمانعازى اۋدانىنىڭ قۇرمانعازى اۋىلىندا ورنالاسقان «ميرعالي» اۆتوتۇراعىنىڭ اۋماعىنداعى دۇڭگىرشەكتە تىيىم سالىنعان قۇمار ويىندى ۇيىمداستىرعان ەكى ادامدى انىقتادى. ولار الدىن الا ءسوز بايلاسىپ، ەلىمىزدە بەكىتىلگەن ويىن بيزنەسى زاڭناماسىن بۇزاتىن قىلمىستىق ارەكەت جاساعان»، - دەپ حابارلادى بەكبولات انەسوۆ.
قۇرمانعازى اۋداندىق سوت ۇكىمەن قۇمار ويىندى زاڭسىز ۇيىمداستىرعاندار ق ر قىلمىستىق كودەكسىنىڭ 307-بابىنىڭ 2-بولىگىنىڭ 2,3-تارماقتارى بويىنشا كىنالى دەپ تانىلدى.
ولاردىڭ ءارقايسىسى 2 (ەكى) جىلعا باس بوستاندىعىنان شەكتەۋ جازاسىنا سوتتالدى.
سوت ۇكىمى زاڭدى كۇشىنە ەندى.
ەسكە سالا كەتەلىك، بۇعان دەيىن اتىراۋ وبلىسىندا جىل باسىنان بەرى 57 ەكونوميكالىق قىلمىس تەرگەلگەنىن حابارلاعان بولاتىنبىز.
اتىراۋ وبلىسىندا جىل باسىنان بەرگى 9 ايدا ەكونوميكالىق تەرگەپ- تەكسەرۋ دەپارتامەنتى قىزمەتكەرلەرىنىڭ تەرگەۋىنە 57 قىلمىستىق ءىس تۇسكەن.
ونىڭ ىشىندە 32 قىلمىستىق ءىستى تەرگەۋ اياقتالدى. بۇل - بارلىق ءىستىڭ 56,1 پايىزى.
وڭىردەگى سوتتاردىڭ قاراۋىنا 23 قىلمىستىق ءىس %40,3 جولداندى.
قىلمىستىق ىستەر بويىنشا كەلگەن زالال مولشەرى - 2,9 ميلليارد تەڭگە بۇل قارجىنىڭ 2,3 ميلليارد تەڭگەسى بيۋدجەتكە قايتارىلعان.
