رۋبلدىڭ بىرنەشە كۇن بويى قۇلدىراۋىنا نە سەبەپ بولدى

وتكەن اپتانىڭ سوڭىندا ايتارلىقتاي السىرەي باستاعان رۋبل بەيسەنبى كۇنى تاڭەرتەڭ ەۋروپالىق جانە امەريكالىق ۆاليۋتالارعا قاتىستى ساۋىردەگى دەڭگەيگە دەيىن تومەندەدى، ءبىراق كەشكە قاراي قايتا وزگەردى.

جارتى جىلدان استام ۋاقىت بويى رەسەيلىك ۆاليۋتا تومەن قۇبىلمالىلىق تانىتىپ، ءبىر دوللار ءۇشىن 60 رۋبل بەلگىسىنىڭ اينالاسىندا ساۋدالاندى.

ۋكرايناداعى جاعدايعا، بۇرىن-سوڭدى بولماعان باتىستىق سانكتسيالارعا قاراماستان، رۋبل مامىر ايىندا كوتەرىلىپ، ال ماۋسىم ايىنىڭ سوڭىندا ماسكەۋ بيرجاسىندا دوللار مەن ەۋرو باعامى سوڭعى جەتى جىلداعى ەڭ تومەنگى دەڭگەيگە دەيىن قۇلدىراپ، رەكورد ورناتقان بولاتىن.

وتكەن اپتادا ساراپشىلار رەسەي ۆاليۋتاسىنىڭ كۇرت السىرەۋىنە ەشقانداي سەبەپ جوق دەگەن مالىمدەمە جاسادى.

ال رەسەي پرەزيدەنتى ۆلاديمير پۋتين ستراتەگيالىق دامۋ جانە ۇلتتىق جوبالار كەڭەسىنىڭ وتىرىسىن وتكىزىپ، «رۋبل جىل باسىنان بەرى الەمدەگى ەڭ كۇشتى ۆاليۋتالاردىڭ بىرىنە اينالدى» دەپ ماقتاندى.

الايدا، 15-جەلتوقسان كۇنى كەشكە (پۋتين سويلەگەن كۇنى) ماسكەۋ بيرجاسىنداعى ساۋدا-ساتتىق ءبىر دوللار ءۇشىن 64,35 رۋبل دەڭگەيىندە جابىلدى.

ال كەلەسى كۇنى دوللار تاعى 30 تيىنعا ءوستى.

19-جەلتوقساندا دەمالىس كۇندەرىنەن كەيىن رۋبل قۇلدىراۋىن جەدەلدەتتى - مامىر ايىنان بەرى العاش رەت دوللار 66 رۋبلدەن جوعارى ساۋدالاندى، ال ەۋرو 70 رۋبل شەگىنەن ءوتتى.

5-جەلتوقساننان باستاپ رەسەي مۇنايىن ەۋروپاعا تەڭىز ارقىلى جەتكىزۋگە ەمبارگو جانە G7 ەلدەرىنىڭ باررەلىنە 60 دوللار باعاسىنىڭ شەگى كۇشىنە ەندى.

ەمبارگونىڭ العاشقى اپتاسىندا بلۋمبەرگ اگەنتتىگىنىڭ باعالاۋى بويىنشا رەسەيدىڭ تەڭىزدەگى شيكى مۇناي ەكسپورتى ەكى ەسەدەن استام قىسقاردى.

جەلتوقساندا ورتاشا ەسەپپەن رەسەيلىك Urals ماركالى مۇناي قاراشاداعى ورتاشا كورسەتكىشتەن 10 دوللارعا ارزاندادى (باررەلىنە $56 قارسى $66).

بۇل رەتتە Urals Brent-كە رەكوردتىق 35 دوللار جەڭىلدىكپەن ساتىلىپ جاتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى