قازاقستاندا اينالىمعا جاڭا ەرەكشە كوللەكسيالىق تيىندار شىقتى
«ساق ستيلى» مونەتا باعدارلاماسىنىڭ يدەياسى - قازاقستان حالقىن مونەتالار كوللەكسياسىن جيناۋعا بەلسەندى تۇردە تارتۋ، مادەني-تاريحي جانە اعارتۋشىلىق قۇندىلىقتاردى العا تارتۋ، سونداي-اق، وتاندىق مونەتا ءوندىرىسىن تانىمال ەتۋ.
ساق ستيلى - ەۋرازيا دالاسىنىڭ كەيىنگى قولا جانە ەرتە تەمىر ءداۋىرى مادەنيەتىندەگى جانۋارلاردىڭ بەينەلەرىن ورىنداۋدىڭ ەرەكشە ءتاسىلى.
«ساق ستيلى» اينالىمداعى بيكولورلى مونەتالارى تۋرالى
نومينالى 100 تەڭگەلىك، ماسساسى 6,45 گرام، ديامەترى 24,5 ميلليمەتر بولاتىن ءار ءتۇردىڭ 1000000 (ءبىر ميلليون) داناسىمەن، جالپى تارالىمى 5 ميلليون دانامەن uncirculated دايىنداۋ ساپاسىمەن نيبراسس/نەيزيلبەر قورىتپاسىنان جاسالعان اينالىمداعى بيكولورلى مونەتالاردىڭ بەس ءتۇرى ۇسىنىلدى.
«بۇعى». جالاۋلى كومبەسى. جەتىسۋ (ءبىزدىڭ داۋىرىمىزگە دەيىنگى V- III عاسىرلار ارالىعى). كوشپەندىلەردىڭ دۇنيەتانىمىنداعى بۇعى - تومەنگى جانە جوعارعى الەمدەردى بىرىكتىرەتىن سيمۆول.
«قاناتتى بارىس». ەسىك قورعانى (ءبىزدىڭ داۋىرىمىزگە دەيىنگى IV- III عاسىردىڭ اياعى). قار بارىسى - ەرلىك پەن بايلىقتىڭ سيمۆولى.
«ماسكا». شىلىكتى. شىعىس قازاقستان (ءبىزدىڭ داۋىرىمىزگە دەيىنگى VIII- VII عاسىرلار ارالىعى). وت باسى، وشاق قاسىن قورعايتىن ءۇش كەسكىننىڭ بەينەسى - مىسىق تەكتەس جىرتقىش، ەكى ارقار جانە ۇشاتىن قۇس ماسكاسى.
«بۇعى تۇرىندەگى التىن اشەكەي». جالاۋلى، جەتىسۋ (ءبىزدىڭ داۋىرىمىزگە دەيىنگى V- III عاسىرلار ارالىعى). قىزىل بۇعى بەينەسى - مولشىلىق پەن ۇرپاق جالعاستىعىنىڭ سيمۆولى.
«بۇكتەتىلگەن بارىس». تالدى-2. ورتالىق قازاقستان (ءبىزدىڭ داۋىرىمىزگە دەيىنگى VII عاسىر). بۇكتەتىلگەن بارىس فيگۋراسىنداعى ساقينا ءپىشىنى - ۋاقىتتىڭ اۋىسىمدىق جانە سىرتقى الەممەن ۇيلەسىمدىلىك سيمۆولى.
بۇل مونەتالار اينالىمعا تەك ەكىنشى دەڭگەيدەگى بانكتەر ارقىلى شىعارىلادى. كەيىن اينالىمداعى مونەتالارمەن بىرگە قولما-قول اقشا تۇرىندە پايدالانىلادى. بۇل «ساق ستيلى» سەرياسىنداعى مونەتالار - زاڭدى تولەم قۇرالى جانە تولەمنىڭ بارلىق ءتۇرى بويىنشا قابىلدانۋعا مىندەتتى، ياعني، تاۋار العاندا جانە بەلگىلى ءبىر قىزمەت ءۇشىن تولەم قۇرالى رەتىندە پايدالانۋعا بولادى. سونىمەن قاتار، قازاقستان رەسپۋبليكاسىنىڭ بارلىق بانكىندە بانك شوتتارىنا ەسەپكە الىنۋى جانە اۋدارىلۋى، ۇساقتالۋى جانە ايىرباستالۋى ءتيىس.
مونەتالاردىڭ تەحنيكالىق جانە ناقتى ولشەمدەرى (ماسساسى، ديامەترى، قالىڭدىعى، مەتالل قورىتپاسى) وزگەرىسسىز ساقتالعان. تەحنيكالىق سيپاتتامالارى جاعىنان ولار نومينالى 100 تەڭگەلىك مونەتالارعا تولىعىمەن سايكەس كەلەدى. سول سەبەپتى «ساق ستيلى» مونەتالارىن قابىلداۋ ءۇشىن تولەم تەرمينالدارى مەن باسقا دا كاسسالىق تەحنيكانى قوسىمشا قايتا تەڭشەۋ تالاپ ەتىلمەيدى.
