ەلىمىزدە وندىرىلەتىن بالىق جەمىنىڭ ساپاسى تومەن - كاسىپكەر
جيىنعا ەكولوگيا مينيسترلىگى بالىق شارۋاشىلىعى كوميتەتىنىڭ اكۆاوسىرۋدى دامىتۋ باسقارماسىنىڭ باسشىسى ميراس عابباسوۆ، اتىراۋ، قاراعاندى، تۇركىستان، الماتى، ماڭعىستاۋ وبلىستارىنىڭ كاسىپكەرلەرى، اۋدان اكىمدەرى، مەملەكەتتىك ورگانداردىڭ باسشىلارى قاتىستى.
شاراعا قاتىسۋشىلار بالىق شارۋاشىلىعىنىڭ ەكونوميكاداعى ماڭىزدى سالالاردىڭ ءبىرى بولىپ تابىلاتىنىن، ەكونوميكالىق ءوسىم مەن حالىقتى جۇمىسپەن قامتۋدىڭ نەگىزى ەكەنىن اتاپ ءوتتى. مامانداردىڭ ايتۋىنشا، بالىق شارۋاشىلىعىن ودان ءارى دامىتۋ ءۇشىن ۇلكەن مۇمكىندىكتەر بار. دەسە دە، بۇل پروتسەسكە كەدەرگى كەلتىرىپ وتىرعان ءبىرقاتار ماسەلەلەر بار.
ءوڭىر كاسىپكەرلەرى بالىق ساقتايتىن ارنايى مۇزداتقىش قويمالاردىڭ جوقتىعىن، سونداي- اق بىلىكتى مامانداردىڭ تاپشىلىعىن اتاپ ءوتتى.
«كادر جەتىسپەۋشىلىگىنەن بولەك، ەلىمىزدە وندىرىلەتىن بالىق جەمىنىڭ جاعدايىن دا تالقىلاۋىمىز كەرەك. وكىنىشكە وراي، ساپاسى تومەن بولعاندىقتان، ءبىز جەم- ءشوپتى شەتەلدەن ساتىپ الۋعا ءماجبۇرمىز، بۇل تۇپكىلىكتى ءونىمنىڭ وزىندىك قۇنىنا اسەر ەتەدى»، - دەيدى كاسىپكەر تۇرسىنگۇل جاقىپوۆا.
ەندى ماڭعىستاۋدا بالىق شارۋاشىلىعىن دامىتۋدىڭ ارنايى باعدارلاماسى ازىرلەنبەك. باعدارلاما ەلىمىزدە بالىق ءوندىرۋ مەن تۇتىنۋدى ارتتىرۋعا ءتيىس.
«بالىق شارۋاشىلىعىن جۇرگىزۋ ءۇشىن كەلەسىمشارتتى جاساۋ مەرزىمى 49 جىلعا وزگەرتىلدى، وسىلايشا بيزنەسكە ۇزاق مەرزىمدى جوسپارلاردى ىسكە اسىرۋعا مۇمكىندىك جاسالماق. وسىعان دەيىن كەلىسىمشارتتار مەرزىمى 5 جىلدان 49 جىلعا دەيىنگى ارالىقتا بولعان»، - دەدى ەكولوگيا مينيسترلىگى بالىق شارۋاشىلىعى كوميتەتىنىڭ اكۆاوسىرۋدى دامىتۋ باسقارماسىنىڭ باسشىسى ميراس عابباسوۆ.
ايماق باسشىسى نۇرلان نوعايەۆ ءوڭىرارالىق تاجىريبە الماسۋدا ءار ءوڭىردىڭ ەرەكشەلىگىن ەسكەرۋ كەرەكتىگىن اتاپ ءوتتى. تالقىلاۋ بارىسىندا ساراپشىلار بۇكىل ەل بويىنشا بالىق شارۋاشىلىعىن دامىتۋعا مۇمكىندىك بەرەتىن ورتاق شەشىمگە كەلە الۋى كەرەك.
«مەملەكەت باسشىسى قاسىم- جومارت توقايەۆ 2022 -جىلعى قاراشادا ماڭعىستاۋ وبلىسىنىڭ تۇرعىندارىمەن كەزدەسۋىندە وڭىردەگى بالىق شارۋاشىلىعىنىڭ الەۋەتى جوعارى ەكەنىن اتاپ ءوتتى. وتكەن جىلدىڭ ءساۋىر ايىندا ۇكىمەت بالىق شارۋاشىلىعىن دامىتۋ باعدارلاماسىن قابىلداپ، وبلىستا 2030 -جىلعا دەيىن وسىرىلەتىن بالىق كولەمىن 100 مىڭ تونناعا ارتتىرۋ جوسپارلانۋدا. قاجەتتى قۇزىرەتتەرى، ءبىلىمى، بالىق اۋلاۋ، ءوسىرۋ جانە قايتا وڭدەۋ بويىنشا تاجىريبەسى بار شارۋاشىلىق جۇرگىزۋ سۋبەكتىلەرمەن بايلانىس جانە تاجىريبە الماسۋ بالىق ونەركاسىبىنىڭ دامۋىنا وڭ اسەر ەتۋى ءتيىس. كەزدەسۋدىڭ ناتيجەسى بولۋى دا كەرەك»، - دەدى نۇرلان نوعايەۆ.
ايتا كەتەيىك، ماڭعىستاۋدا 2030 -جىلعا دەيىن بالىق ءوسىرۋ كولەمىن ۇلعايتۋ ءۇشىن 218 ميلليارد تەڭگەنىڭ سەگىز جوباسىن جۇزەگە اسىرۋ جوسپارلانىپ وتىر
