ەلەنا رىباكينا «التىن ادام» سىيلىعىنىڭ لاۋرەاتى اتاندى

قازاقستان تەننيس فەدەراتسياسىنان ءمالىم ەتكەنىندەي، ەلەنا رىباكينا «سپورتتاعى جىل سەرپىلىسى» اتالىمى بويىنشا ۇزدىك شىقتى.

بيىل 23 جاستاعى سپورتشى قازاقستان تەننيسى تاريحىندا العاش رەت جەكەلەي سىندا ۋيمبلدوندا توپ جاردى. سونداي- اق تاعى ەكى WTA ءتۋرنيرىنىڭ جەڭىمپازى اتاندى.

اتالمىش بايقاۋدى «ەۋرازيا جىل ادامى» ۇيىمداستىرۋ كوميتەتى 2000 -جىلدان بەرى وتكىزىپ كەلەدى. ءتۇرلى سالاداعى جىل ۇزدىكتەرىنە «التىن ادام» سىيلىقتارى تاپسىرىلادى. ونى انىقتاۋ ءۇشىن تۇرعىندار اراسىندا ساۋالناما جۇرگىزىلىپ، ساراپشىلار داۋىس بەرەدى، ۇيىمداستىرۋ كوميتەتى تالداۋ جاساپ، قازىلار القاسى ۇزدىكتەردى تاڭدايدى.

ءار جىلدارى قازاقستاندا ولگا شيشيگينا، يليا يلين، الەكساندر ۆينوكۋروۆ، ەلەنا حرۋستاليەۆا، گەنناديي گولوۆكين، دميتريي بالاندين، فيرۋزا ءشارىپوۆا، قازبەك ۆاليەۆ، زۋلفيا گابيدۋللينا جانە باسقا سپورتشىلار لاۋرەات اتاندى.

ەسكە سالا كەتەيىك، بۇدان بۇرىن ەلەنا رىباكينانىڭ دۋبايدا الەمنىڭ بەسىنشى راكەتكاسىن ۇتقانىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى