قازاقستاندا جەكە ادامداردىڭ بانكروتتىعى قالاي راسىمدەلەدى

زاڭ جوباسىنىڭ نەگىزگى ماقساتى - قازاقستان رەسپۋبليكاسى ازاماتتارىنىڭ تولەم قابىلەتسىزدىگىنە بايلانىستى ماسەلەلەردى شەشۋ جانە تولەم قابىلەتتىلىگىن قالپىنا كەلتىرۋدىڭ قازىرگى زامانعى ينستيتۋتىن قۇرۋ. قۇجاتتا سوتتان تىس بانكروتتىق، تولەم قابىلەتتىلىگىن قالپىنا كەلتىرۋ جانە سوت بانكروتتىعى سياقتى راسىمدەردى رەگلامەنتتەۋ ەسكەرىلگەن.

ءماجىلىس دەپۋتاتى دانيا ەسپايەۆانىڭ ايتۋىنشا، سوتتان تىس بانكروتتىق ءراسىمى اياسىندا 1600 اەك- كە دەيىن قارىزى بار ادامدار قامتىلادى. ول ءۇشىن بىرنەشە شارت ەسكەرىلۋى كەرەك. وسى ورايدا بانكتەر، ميكروقارجى ۇيىمدارى، كوللەكتورلىق اگەنتتىكتەر الدىنداعى بەرەشەك 1600 ا ە ك سوماسىنان اسپاۋى ءتيىس.

ەكىنشى ءراسىم - سوت ارقىلى بانكروتتىق. بۇل ءراسىم بارىسىندا بورىشكەردىڭ مۇلكى ساتىلادى. تۇسكەن قاراجات بەلگىلەنگەن كەزەكپەن كرەديتورلار الدىنداعى قارىزداردى وتەۋگە جۇمسالادى.

«ەگەر جالعىز تۇرعىن ءۇي كەپىل زات نىسانى بولماسا، كرەديتورلار ونى تالاپ ەتە المايدى. بورىشكەردىڭ تەرىس پيعىل بەلگىلەرى بولماعان جاعدايدا، قالعان تولەنبەگەن قارجى ەسەپتەن شىعارۋعا جاتادى»، - دەدى دەپۋتات.

ءۇشىنشى ءراسىم - تولەم قابىلەتتىلىگىن قالپىنا كەلتىرۋ ءتارتىبى. بۇل تۇرعىدا تۇراقتى تابىس بولعان جاعدايدا، قارىزدى وتەۋ ءۇشىن سوت تارتىبىمەن ءبولىپ تولەۋ جوسپارىن الۋ مۇمكىندىگى قاراستىرىلعان. قالپىنا كەلتىرۋ جوسپارى قارجى باسقارۋشىلارمەن بىرلەسىپ ازىرلەنىپ، سوتپەن بەكىتىلەدى.

جالپى، بانكروتتىقتىڭ سالدارىنا توقتالساق، قۇجاتتا 5 جىلعا نەسيە الۋدى شەكتەۋ ەسكەرىلگەن. ەكىنشىدەن، ازاماتتار 7 جىلدان كەيىن عانا بانكروتتىققا قايتا جۇگىنە الادى. ۇشىنشىدەن، سوت بانكروتتىعى جانە تولەم قابىلەتتىلىگىن قالپىنا كەلتىرۋ راسىمدەرى كەزەڭىندە بورىشكەردىڭ ەلدەن شىعۋىنا تىيىم سالۋدى بەلگىلەۋ قاراستىرىلعان.

«اتاپ ايتقاندا، بۇل راسىمدەردەن ءوتۋدى ازامات ءوز ەركىمەن شەشەدى. ياعني، ادامدار بۇل ءوتىنىشتى ءوزى بەرۋى كەرەك. باسقا ادامدار، مەملەكەتتىك ورگان نەمەسە بانك ازاماتتىڭ اتىنان بانكروتتىققا ءوتىنىش بەرە المايدى»، - دەدى د. ەسپايەۆا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى