كىرپىك ءوسىرۋ كوزگە زيان با؟

سەبەبى كىرپىكتى وسىرەتىن شەبەرگە مەديتسينالىق ءبىلىم قاجەت ەمەس، ال كليەنت ادەتتە سۇلۋلىق پروتسەدۋرالارىمەن بايلانىستى مۇمكىن قاۋىپتەردى وزدىگىنەن باعالاي المايدى. ءبىر قاراعاندا وڭاي كورىنگەنىمەن، كىرپىك ءوسىرۋ ءۇشىن ناقتى داعدى، كاسىبي ءتاسىل جانە ورىنداۋدىڭ اسقان دالدىگى قاجەت. بۇل پروتسەدۋرا نەسىمەن قاۋىپتى بولۋى مۇمكىن؟

شەبەر ءاربىر تابيعي كىرپىككە جاساندى كىرپىكتەردى جابىستىرادى. ول ءۇشىن ارنايى جەلىم پايدالانادى. ورتاشا ەسەپپەن، ماستەر ءار كوزگە 40-100 جاساندى كىرپىك قولدانادى.

ونىڭ قاۋپى قانداي؟

ساپاسىز ماتەريالداردى قولدانۋ، كوپ مولشەردە جەلىم پايدالانۋ، بىلىكسىز شەبەر جانە باسقا دا فاكتورلار پروتسەدۋرادان كەيىن ءتۇرلى اسقىنۋلار پايدا بولۋىن ىنتالاندىرۋى مۇمكىن.

سونىڭ سالدارىنان قاباق ءىسىپ كەتۋى، كوزدىڭ مۇيىزگەك قابىعىندا جۇقپا پايدا بولۋى، ۋاقىتشا نەمەسە ءبىرجولا كىرپىكتەن ايىرىلۋ قاۋىپتەرى بار. الايدا ءتۇرلى جاعدايلارعا بايلانىستى باسقا دا اسقىنۋلار پايدا بولۋى مۇمكىن:

- كونيۋنكتيۆانىڭ (كونيۋنكتيۆيت) نەمەسە كوزدىڭ مۇيىزگەك قابىعىنىڭ (كەراتيت) تىتىركەنۋى. مۇنداي رەاكتسيا جاساندى كىرپىكتەرمەن بايلانىس نەمەسە جەلىم قۇرامىنىڭ سەبەبىنەن پايدا بولۋى مۇمكىن؛

- اللەرگيالىق رەاكتسيالار. قۇرامىندا فورمالدەگيدى بار جەلىم اللەرگيا بەرۋى مۇمكىن. بۇل زات دەنساۋلىققا قاۋىپتى بولعاندىقتان، كوپتەگەن ەلدەردە قولدانۋعا تىيىم سالىنعان. فورمالدەگيد ارزان دا، قىمبات تا جەلىمدەردىڭ قۇرامىندا بولۋى ابدەن مۇمكىن؛

- جۇقپا جۇقتىرۋ. جاساندى كىرپىكتەر لاستىق پەن باكتەريا جينايدى. دۇرىس تازالانباعان جاعدايدا جۇقپا جۇقتىرۋعا قولايلى ورتا جاسالادى. جۇقپا ءتۇسۋىنىڭ العاشقى بەلگىسى - كوزدىڭ قىزارۋى؛

- قۇرعاق كوز سيندرومى. ول كىرپىكتىڭ ولشەمى جانە ۇزىندىعى سايكەس ەمەس بولعان جاعدايدا پايدا بولادى؛

- الوپەتسيا - جابىستىرىلعان جاساندى كىرپىكتەردىڭ اۋىرلىعىنان تابيعي كىرپىكتەردىڭ ءتۇسىپ قالۋى.

قاۋىپتەن قالاي قورعانامىز؟

كىرپىك ءوسىرۋ پروتسەدۋراسى تەك ەستەتيكالىق اسەر بەرەدى، ال ونىڭ كوز دەنساۋلىعىنا قاۋپى جوعارى. سوندىقتان كوزدە تەرىسكەن، كونيۋنكتيۆيت نەمەسە باسقا دا كوزدىڭ قابىنۋ اۋرۋلارى بولسا، كىرپىك وسىرۋگە بولمايدى.

كاسىبي مامان تابۋعا تىرىسىڭىز. سەبەبى ولار ساپالى ماتەريالدار پايدالانادى: دەرماتولوگيالىق باقىلاۋدان وتكەن جاساندى كىرپىكتەر مەن جەلىم تاڭدايدى. بۇل جاعدايدا قاۋىپ ازايادى، ءبىراق جەكە كوتەرە الماۋشىلىق جايلى ۇمىتپاۋ كەرەك. سوندىقتان كىرپىكتى وسىرمەس بۇرىن ماستەردەن جەلىمگە اللەرگياڭىزدىڭ بار- جوعىن تەكسەرىپ كورۋىن سۇراڭىز. سانيتارلىق نورمالار قاتاڭ ساقتالاتىن سۇلۋلىق سالونىن تاڭداڭىز. ەگەر بۇل پروتسەدۋرادان سوڭ كوزىڭىزدىڭ قۇرعاق بولا تۇسكەنىن، قىزارعانىن، تىتىركەنگەنىن نەمەسە اللەرگيا بەرگەنىن بايقاساڭىز، بىردەن ماستەرگە بارىپ، الىپ تاستاۋىن سۇراڭىز. كىرپىك ءوسىرۋ پروتسەدۋراسىنا ءبىر رەت بارعان ادام ونى قايتالاپ جاساي بەرگىسى كەلەدى. ءبىراق كىرپىكتى دەمالتىپ تۇرۋ كەرەگىن ۇمىتپاڭىز.

ماسساگەت

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى