قازاقپارات ح ا ا ماتەريالى «جىبەك جولى» سىيلىعىنىڭ ءۇشىنشى جۇلدەسىن جەڭىپ الدى

بۇل تۋرالى 19-جەلتوقسان كۇنى بەيجىڭدە وتكەن «ءبىر بەلدەۋ - ءبىر جول» اقپارات جەلىسىنىڭ ەكىنشى وتىرىسىندا ءمالىم بولدى. «قازاقپارات» حالىقارالىق اقپارات اگەنتتىگى باس رەداكتورىنىڭ ورىنباسارى قانات توقابايەۆتىڭ ماقالاسى «جىبەك جولى» (Silk Road Global News Awards) دەگەن اتپەن العاش رەت بەرىلىپ وتىرعان سىيلىقتىڭ «كوممەنتاري» نوميناتسياسى بويىنشا ءۇشىنشى ورىنعا يە بولدى.

قازىلار القاسى ۇيىمداستىرۋ كوميتەتىنە التى نوميناتسيا بويىنشا كەلىپ تۇسكەن 4485 جۇمىستىڭ ىشىنەن اقتىق سىنعا لايىقتارىن ىرىكتەگەن. ىرىكتەۋ قورىتىندىسى بويىنشا، «ءبىر بەلدەۋ - ءبىر جول» اقپاراتتىق جەلىسى كەڭەسىنىڭ مۇشەلەرى ونلاين داۋىس بەرۋ ارقىلى قازاقستاندىق باسىلىمنىڭ جۇمىسى ءۇشىنشى ورىنعا لايىق دەپ تانىلدى.

«ءبىر بەلدەۋ - ءبىر جول» باستاماسى بۇكىل الەم ەكونوميكاسىنا جاڭا مۇمكىندىكتەر اشىپ وتىر. ءتىپتى پاندەميادان كەيىنگى دامۋدى تەجەپ جاتقان گەوساياسي قاقتىعىستار دا بۇل جوباعا جاڭا سەرپىن بەرە الادى. مەنىڭ ويىمشا، بۇل الەمدىك ينتەگراتسيانىڭ باعىتىن شىعىسقا قاراي يكەمدەپ، ازيانىڭ جاھاندىق باسەكەلەستىكتەگى ورنىن نىعايتا الادى. ارينە، الەم قاۋىمداستىعى ۇلكەن كورشىمىزدىڭ 2013 -جىلى قازاقستان استاناسىندا جاريالانعان باستاماسىن مۇقيات قاداعالاپ وتىر. قازاقستاننىڭ الەمدىك ساۋدا مارشرۋتتارىنىڭ جالپىعا ورتاق يگىلىكتەرگە قۇرىلۋى مەن جۇمىس ىستەۋىنە قوسقان ۇلەسى دە الەم نازارىندا»، - دەيدى «قازاقپارات» ح ا ا باس رەداكتورىنىڭ ورىنباسارى قانات توقابايەۆ.

سونداي- اق ول وسىنداي باسەكەسى بيىك ءارى بەدەلدى كونكۋرسقا قاتىسۋ ءوزى ءۇشىن ۇلكەن مارتەبە ەكەنىن ايتادى.

«قازاقپارات» حالىقارالىق اگەنتتىگىنىڭ اناليتيكالىق ماتەريالى 2020 -جىلى بىردەن 3 تىلدە - قازاق، اعىلشىن جانە قىتاي تىلدەرىندە جاريالانعان بولاتىن.

حالىقارالىق كوممۋنيكاتسيالار جونىندەگى «جىبەك جولى» (Silk Road Global News Awards) سىيلىعىن «ءبىر بەلدەۋ - ءبىر جول» اقپارات جەلىسى (BRNN) قۇرىپ، ۇيىمداستىرىپ وتىر. سىيلىق كەڭەسىنە «حالىق گازەتى» تانىمال الەمدىك باسىلىم رەداكسياسىنىڭ باسشىلىعى ءتوراعالىق ەتەدى.

سىيلىقتىڭ ماقساتى - «ءبىر بەلدەۋ - ءبىر جول» باستاماسىنا قاتىسۋشى ەلدەردەگى بۇقارالىق اقپارات قۇرالدارىنىڭ كۇش- جىگەرىن بىرىكتىرىپ، تاجىريبە الماسۋ.

«تىڭعىلىقتى رەپورتاج» نوميناتسياسى بويىنشا ۇلى بريتانيانىڭ وكىلى كريس رايت قازاقستانداعى «قورعاس» حالىقارالىق شەكارا ماڭى ىنتىماقتاستىق ورتالىعىنا ارنالعان ماتەريالمەن ۇزدىك اتاندى. ۋگاندالىق مۇباراك مۋگابو «كوممەنتاري» نوميناتسياسىندا ءبىرىنشى ورىن يەلەندى. رەسەي وكىلى سۆەتلانا تاراسوۆا «باسپاسوزگە ارنالعان ەڭ جاقسى فوتو» ساناتىندا جەڭىسكە جەتتى. «باسپاسوزگە ارنالعان ۇزدىك ۆيدەو» نوميناتسياسىندا جەڭىستى NGC Network Asia, سونداي- اق CGTN جانە RTS رەسۋرستارى ءوزارا ءبولىستى.

«COVID-19-عا قارسى كۇرەس» تاقىرىبىنداعى قىسقا روليكتەر اراسىندا جەڭىس كەنيا مەن ميانمانىڭ وكىلدەرىنە بەرىلدى.

«ەرەكشە ەڭبەگى ءۇشىن» نوميناتسياسىندا «جىبەك جولى دوستارى» كلۋبىنىڭ باسشىسى، پاكىستان - قىتاي ينستيتۋتىنىڭ ءتوراعاسى، پاكىستان سەناتى قورعانىس كوميتەتىنىڭ ءتوراعاسى، سونداي- اق، بەيبىتشىلىكتىڭ بەس قاعيداسى» سىيلىعىنىڭ يەگەرى مۋشاحيد حۋسسەين سايەد جەڭىمپاز اتاندى.

ايتا كەتەيىك، «ق ر پرەزيدەنتىنىڭ تەلەراديوكەشەنى» ك ە ا ق قازاقستاننىڭ ەڭ ءىرى مەديا- كومپانيالارىنىڭ ءبىرى بولىپ سانالادى. ونىڭ قۇرامىنا: «Jibek Joly» تەلەارناسىنىڭ ۇلتتىق جانە حالىقارالىق رەداكسياسى، قازاقستانداعى ەڭ تاريحى باي «قازاقپارات» حالىقارالىق اقپارات اگەنتتىگى جانە دەرەكتى كينو ورتالىعى كىرەدى. «قازاقپارات» ح ا ا «ءبىر بەلدەۋ - ءبىر جول» اقپارات جەلىسىنىڭ (BRNN) مۇشەسى بولىپ ەسەپتەلەدى.

«ءبىر بەلدەۋ، ءبىر جول» اقپارات جەلىسى (BRNN) قىتاي حالىق رەسپۋبليكاسىنىڭ ءتوراعاسى شي جينپيننىڭ باستاماسىمەن 2017 -جىلدىڭ مامىرىندا قۇرىلدى. 2022 -جىلعى ماۋسىمدا 99 ەلدىڭ ب ا ق سالاسىنداعى 213 ۇيىمى «ءبىر بەلدەۋ، ءبىر جول» اقپاراتتىق جەلىسىنىڭ مۇشەلەرى بولىپ تىركەلدى.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى