ءادىل احمەتوۆ تۇركى مەملەكەتتەرى ۇيىمىنىڭ ماڭىزى جايىندا ايتتى
بۇل تۋرالى ەلورداداعى ءبىرىنشى ورتالىق ازيا مەديافورۋمىندا بەلگىلى قوعام قايراتكەرى ءادىل احمەتوۆ ايتتى، دەپ حابارلايدى قازاقپارات ءتىلشىسى.
«بۇل مەديافورۋمنىڭ باستى ماقساتى - ورتالىق ازيانى ءبىرتۇتاس مادەني ايماق رەتىندە كورسەتۋدى كوزدەيتىن ورتاق مەديا كەڭىستىك قۇرۋ. 2021-جىلعى 12- قاراشادا تۇركيانىڭ ىستانبۇل قالاسىندا وتكەن القالى ساميتتە تۇركى الەمىن دامىتۋعا سەرپىن بەرەتىن جاڭا شەشىمدەر قابىلدانعان بولاتىن. ويتكەنى، ءدال سول سامميتتە تۇپكى تەگى ءبىر تۇركى جۇرتى ورتاق مۇددەگە بىرىكتى. تاريحى، ءتىلى، ءدىلى، مادەنيەتى جانە ءدىنى ورتاق ەلدەردىڭ باۋىرلاستىعى مەن ىنتاماقتاستىعى بىردەن جاڭا دەڭگەيگە كوتەرىلدى. ىستانبۇل سامميتىنىڭ بارىسىندا ءبىراۋىزدان قابىلدانعان شەشىم بويىنشا بۇرىنعى تۇركى كەڭەسى تۇركى مەملەكەتتەرى ۇيىمى بولىپ قايتا قۇرىلدى. بۇگىنگى تاڭدا بۇل حالىقارالىق ۇيىمنىڭ ىستانبۇلداعى حاتشىلىعىمەن قاتار، پرەزيدەنتتەر كەڭەسى، سىرتقى ىستەر مينيسترلەرىنىڭ كەڭەسى، تۇركى مەملەكەتتەرى ۇيىمىنىڭ اقساقالدار كەڭەسى، باكۋدەگى پارلامەنتتىك اسسامبلەيا، استاناداعى تۇركى اكادەمياسى، انكاراداعى تۇركسوي - تۇركى مادەنيەتى حالىقارالىق ۇيىمى سەكىلدى ينستيتۋتتارى دا قالىپتاسىپ ۇلگەردى. تۇركىتىلدەس مەملەكەتتەردىڭ سامميتى تۇراقتى وتكىزىلىپ كەلەدى»، - دەدى ءا. احمەتوۆ.
سونىمەن قاتار ول تۇركى مەملەكەتتەرى ۇيىمىنىڭ ماڭىزىنا توقتالدى.
«تۇركى مەملەكەتتەرى ۇيىمى بىرەۋلەردى قورقىتۋ نەمەسە ۇركىتۋ ءۇشىن قۇرىلعان ۇيىم ەمەس. كەرىسىنشە، ەگەمەندىگىمىزدىڭ جانە تەرريتوريالارىمىزدىڭ تۇتاستىعىن ساقتاۋعا، سونداي-اق مەملەكەتتەرىمىزدىڭ قاۋىپسىزدىگىن سىرتتان تونگەن سۇق كوزدەردەن قورعاۋ ماقساتىندا قۇرىلعان ورتاق بەيبىت ۇيىم»، - دەدى عالىم.
ءادىل احمەتوۆتىڭ پايىمىنشا، تۇركى مەملەكەتتەرى ۇيىمىنىڭ قىزمەتىن بۇقارالىق اقپارات قۇرالدارى ارقىلى بەلسەندى تۇردە دارىپتەۋ كەرەك.
«بۇگىن ۇيىمداستىرىلىپ وتىرعان ورتالىق ازيا مەديافورۋمىنىڭ ماڭىزى ارتا تۇسەدى دەگەن ويدامىن. بۇل فورۋمنىڭ كەلەشەگى زور ەكەنىنە بۇگىن ءسوز العان مارتەبەلى مەيمانداردىڭ پىكىرى دالەل»، - دەدى ول.
بۇدان بۇرىن حابارلانعانداي، استانادا 1- ورتالىق ازيا مەديافورۋمى جۇمىسىن باستادى.
ايتا كەتەيىك، بۇگىن قازاقستان پرەزيدەنتى قاسىم-جومارت توقايەۆ تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىراليەۆتى قابىلدادى.
مەملەكەت باسشىسى قازاقستان ۇيىمنىڭ نەگىزىن قالاۋشى ەلدىڭ ءبىرى رەتىندە تۇركى مەملەكەتتەرىمەن كوپجاقتى ىنتىماقتاستىقتى دامىتۋعا مۇددەلى ەكەنىنە توقتالىپ، حاتشىلىقتىڭ جۇمىسىنا بارىنشا قولداۋ كورسەتەتىنىن جەتكىزدى.
