قازاقستاندا قانداي ماماندىق يەلەرى تاپشى
بۇل تۋرالى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ ءمالىم ەتتى، دەپ حابارلايدى قازاقپارات ءتىلشىسى.
«جالپى، ەڭبەك نارىعى جىلدام وزگەرەدى. ول ەكونوميكا جانە تەحنولوگيانىڭ دامۋىمەن بايلانىستى. وزدەرىڭىز بىلەتىندەي، پاندەميا كەزىندە ەڭبەك نارىعى كۇرت وزگەردى. پاندەمياعا دەيىن ۇيدە وتىرىپ جۇمىس ىستەيمىز دەپ كىم ويلاپتى؟ سوندىقتان، ءبىز ەڭبەك نارىعىندا قانداي ماماندىقتار سۇرانىسقا يە نەمەسە تاپشى ەكەنىن قاداعالايمىز. ستاتيستيكا بار. قازىر ەلىمىزدە مەكتەپكە دەيىنگى ءبىلىم بەرۋ ۇيىمى ماماندارى جانە مەكتەپ مۇعالىمدەرى تاپشى. سەبەبى، جىل ساناپ اشىلىپ جاتقان بالاباقشالار مەن مەكتەپتەردىڭ سانى ارتىپ كەلەدى. ەكىنشىدەن، اۋىل شارۋاشىلىعى سالاسى ماماندارى تاپشى»، - دەدى ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ و ك ق- دە وتكەن بريفينگىدە.
ودان بولەك، ۆيتسە- مينيستر ەلىمىزدە IT جانە قۇرىلىس ماماندارىنىڭ دا تاپشى ەكەنىن تىلگە تيەك ەتتى.
«ءبىزدىڭ مينيسترلىك جاڭا ماماندىقتار اتلاسىن جاسادى. وعان سايكەس الداعى جىلدارى كيبەرقاۋىپسىزدىك، دەنساۋلىق ساقتاۋ، ونەر جانە ءبىلىم بەرۋ ماماندارى سۇرانىسقا يە بولادى»، - دەيدى ول.
ايتا كەتسەك، ەڭبەك ءمينيسترى ورىنباسارى ەربول وسپانوۆ مالىمدەگەندەي، قازىر ەلىمىزدە 39 مىڭ رەسەي ازاماتى جۇمىس ىستەپ جاتىر.
