سلوۆاكيادا قازاقستاننىڭ العاشقى قۇرمەتتى كونسۋلدىعى اشىلدى

قۇرمەتتى كونسۋلدىقتىڭ اشىلۋى قازاقستان رەسپۋبليكاسىنىڭ تاۋەلسىزدىگى كۇنىنە جانە قازاقستان مەن سلوۆاكيا اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا (1- قاڭتار 1993 ج.) ورايلاستىرىلعان.

سالتاناتتى شاراعا ق ر سىرتقى ىستەر ءمينيسترىنىڭ ورىنباسارى رومان ۆاسيلەنكو، قازاقستاننىڭ سلوۆاكياداعى ەلشىسى تولەجان بارلىبايەۆ، بانسكا-بىستريتسا ايماعىنىڭ باسشىلىعى، قوعام وكىلدەرى، عىلىمي، مادەني جانە ىسكەرلىك توپتار وكىلدەرى، جۋرناليستەر مەن ديپلوماتتار قاتىستى.

ءمينيستردىڭ ورىنباسارى رومان ۆاسيلەنكو كونسۋلدىقتىڭ سلوۆاكيانىڭ ءىرى قارجى، عىلىمي، ءبىلىم بەرۋ جانە تۋريستىك ورتالىعى - بانسكا-بىستريتسادا اشىلۋىنىڭ ماڭىزدىلىعىن اتاپ ءوتتى. ق ر قۇرمەتتى كونسۋلى - بەلگىلى قوعام قايراتكەرى، سلوۆاكيا اڭشىلىق پالاتاسىنىڭ پرەزيدەنتى تيبور لەبوتسكيدى جۇرتشىلىققا تانىستىرا وتىرىپ، وتاندىق ديپلومات كونسۋلدىقتىڭ قىزمەتى مادەنيەت، عىلىم، ءبىلىم، ەكونوميكا جانە ساۋدا سياقتى سالالاردا قازاقستان-سلوۆاك ىنتىماقتاستىعىن دامىتۋعا جانە نىعايتۋعا ىقپال ەتەتىنىنە سەنىم ءبىلدىردى. سونداي-اق، ول قازاقستانداعى ساياسي وقيعالار تۋرالى باياندادى. جاقىندا وتكەن پرەزيدەنتتىك سايلاۋدىڭ قورىتىندىلارى - قاسىم-جومارت توقايەۆتىڭ رەفورمالارى باعىتىن جالپىحالىقتىق قولداۋدىڭ ايعاعى، قازاقستان قوعامىنىڭ ساياسي جەتىلۋىنىڭ سيمۆولى جانە اۋقىمدى مەملەكەتتىك قايتا قۇرۋلاردى ودان ءارى ىلگەرىلەتۋدىڭ كەپىلى بولعانىن اتاپ ءوتتى.

اشىلۋ سالتاناتى اياسىندا «Ayalagan Alaqan» قوعامدىق قايىرىمدىلىق قورىنىڭ قولداۋىمەن مۇمكىندىگى شەكتەۋلى قازاقستاندىق بالالاردىڭ «الەم بالالار كوزىمەن» سۋرەت كورمەسى، سونداي-اق «بولاشاققا ۇمتىلعان قازاقستان» فوتوكورمەسى ۇيىمداستىرىلدى. ءىس-شارا قوناقتارىنا قازاقستاننىڭ تابيعاتى مەن مادەنيەتى تۋرالى كىتاپتار سىيعا تارتىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى