نارىققا تاكسي قىزمەتىن ۇسىناتىن باسقا دا كومپانيالاردى تارتۋ كەرەك - مينيستر
بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ايتتى، دەپ حابارلايدى قازاقپارات ءتىلشىسى.
بۇگىن ماجىلىستەگى ۇكىمەت ساعاتىندا دەپۋتات ەلنۇر بيسەمبايەۆ ءتۇرلى ونلاين سەرۆيستە 500 مىڭنان اسا قازاقستاندىق جۇمىس ىستەيتىنىن، ونىڭ ىشىندە 200 مىڭعا جۋىعى ادام ياندەكس تاكسي قوسىمشاسى ارقىلى ءناپاقاسىن تاۋىپ وتىرعانىن ايتتى.
«ياندەكس تاكسي قوسىمشاسى تاكسي جۇرگىزۋشىلەرىنەن الاتىن كوميسسياسى 18 - 22 پايىز ارالىعىندا. بۇل نە دەگەن دۇنيەقورلىق؟ بىرىنشىدەن، باسەكەلەستىكتى قورعاۋ اگەنتتىگى قايدا قاراپ وتىر؟ بۇل تۇرعىدا قازاقستاننىڭ سالىعىنان دا كوپ كوميسسيا الىنادى؟ 200 مىڭعا جۋىق ادامنىڭ سونشاما كوميسسياسى قازاقستاندىق ەمەس ۇيىمعا قاراجات رەتىندە كەتىپ جاتىر. نەگە وسىنى باقىلاۋعا المايسىزدار؟ ەكىنشىدەن، ياندەكس تاكسيگە بالاما رەتىندە قازاقستاننىڭ قوسىمشاسى جوق. رەسەيگە ءتۇرلى سانكسيا سالىنىپ جاتىر. بىرنەشە ەل ياندەكس تاكسيدىڭ جۇمىسىن توقتاتتى. ەرتەڭ 200 مىڭ قازاقستاندىق ءبىر كۇندە جۇمىستان سىرتقا قالىپ قويۋ قاۋپى بار. ياندەكس تاكسي قوسىمشاسىندا 200 مىڭ ادام جۇمىس ىستەيدى دەگەن اقپارات ناقتى ەمەس. وندا قانشا قازاقستاندىق جۇمىس ىستەيدى؟ قازاقستاندا ياندەكس تاكسيگە باسەكەلەس بولاتىن قازاقستاندىق قوسىمشانى ويلاستىرۋ جوسپاردا بار ما؟» ، - دەدى دەپۋتات.
ءوز كەزەگىندە ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قازاقستاندا وسىنداي قوسىمشا جاساۋعا بىرنەشە ادام وعان تالپىنعانىن، الايدا جۇزەگە اسىرا الماعىنان ايتتى.
«ونى جاساۋ ءۇشىن تەك قانا قاراجات ەمەس، جاقسى تولىققاندى كوماندا كەرەك. بىرتىندەپ بۇل باعىتتا جۇمىس ءجۇرىپ جاتىر. ءتيىس قوسىمشالار ەلىمىزدە تابىستى بولىپ جاتىر. بىزگە DiDi (تاكسي سالاسىندا) دەگەن قىتايلىق وپەراتور كەلدى عوي، سوسىن كەتىپ قالدى. وسى ورايدا ياندەكس جالعىز قالدى. DiDi كەلسە، ەكەۋى جۇمىس ىستەسە، باسەكەلەستىك ورتا بولسا، مۇنداي باعالار بولماس ەدى دەگەن ويدامىن. سوندىقتان وسى تۇرعىدا تەرگەۋلەر جۇرگىزىلىپ جاتىرمىز. ال ءبىز DiDi-مەن ءبىزدىڭ نارىققا كەلۋى بويىنشا قايتادان كەلىسسوز جۇرگىزىپ جاتىرمىز. باسقا ەلدەردى دە قارادىق، دامىعان ءۇش كومپانيا بار: ياندەكس، DiDi، Uber»، - دەدى مينيستر.
بۇدان بۇرىن حابارلانعانداي، بيىل 4- ناۋرىزدان باستاپ قازاقستانداعى DiDi تاكسيى ءوز قىزمەتىن توقتاتاتىنىن مالىمدەدى.
ايتا كەتەيىك، DiDi - تاكسي، كارشەرينگ جانە رايدشەرينگ قىزمەتتەرىن كورسەتەتىن قىتايلىق كونگلومەرات. كومپانيا 2012-جىلى بەيجىڭ قالاسىندا قۇرىلعان. قازىرگى ۋاقىتتا كومپانيا ەۋروپا، ازيا، اۋستراليا، لاتىن امەريكاسىنداعى ەلدەردە ميلليونداعان ادامعا قىزمەت كورسەتەدى.
