تاۋەلسىزدىك تۋرالى العاش حابار حالىققا قالاي جەتتى - ارداگەر جۋرناليستىڭ ەستەلىگى
قازاقپارات ءتىلشىسى وسى ساۋالدى 1991 -جىلى ماڭعىستاۋ وبلىسى تەلەراديوكومپانياسىنىڭ باس رەداكتورى بولعان ارداگەر جۋرناليست جولامان بوشالاققا قويعان ەدى.
«تاۋەلسىزدىك» دەگەن ءسوز 1991 -جىلعا دەيىن كوپ ەستىلمەيتىن ەدى. جوعارىدان حابار كەلگەندە ەلدىڭ قۋانىشىندا شەك بولمادى. ويتكەنى، بۇل - اتا- بابالارىمىز جۇزدەگەن جىلدار كۇتكەن كۇنى عوي. ال ءدال سونداي كەزگە ءبىزدىڭ ۇرپاقتىڭ تاپ بولۋى - ناعىز باقىت. ول كەزدە تىكەلەي ەفيرگە شىعا الاتىن تەحنيكامىز دا جوق. جازىپ العانىمىزدى مونتاج جاسايمىز. دەگەنمەن قولىمىزدان كەلگەنىنشە، حالىققا قۋانىشتى جەتكىزە بىلدىك» - دەدى ول.
جۋرناليست ەل ەگەمەندىگى جايلى جاڭالىقتى قۋانا قارسى العانىن ايتادى.
«حالىقتىڭ كوڭىل كۇيى وتە جوعارى بولدى. بۇل قۋانىش اكەسى بازاردان سىيلىق اكەلگەندە قۋاناتىنداي جاي عانا سەزىم ەمەس قوي، ۇلكەن جاۋاپكەرشىلىك جۇكتەيتىن جۇمىس ەدى. تاۋەلسىزدىك الىندى، ال سول تاۋەلسىزدىكتىڭ تۇعىرىن بەكىتۋ، مارتەبەسىن بيىكتەتۋ جاۋاپتى جۇمىستاردا جۇرگەندەردىڭ مىندەتى بولدى. ال بىزدەر - باسپا ءسوز قىزمەتكەرلەرى ءوزىمىزدىڭ قولىمىزدان كەلگەنىنشە، ءتىلىمىزدىڭ جەتكەنىنشە، بۇل - ۇلكەن قاسيەتتى ۇعىم ەكەنىن، وتە جاۋاپتى كەز ءارى بىزگە اسا قىمباتقا تۇسكەنىن ايتا بىلدىك» - دەپ تولعاندى جولامان بوشالاق.
تاۋەلسىزدىك دەكلاراتسياسى قابىلداعاننان كەيىن جولامان بوشالاق باسقارعان تەلەارنا ەفيرىنەن كۇن سايىن ايماقتاعى زيالى قاۋىم وكىلدەرىنىڭ پىكىرلەرىن بەرە باستاعان. سول ارقىلى كورەرمەنگە ەل تاۋەلسىزدىگىنىڭ قادىر- قاسيەتىن جەتكىزە وتىرىپ، قانداي جاۋاپكەرشىلىك ەكەنىن دە تۇسىندىرۋگە تىرىسقان.
«ەل ىشىندەگى زيالى قاۋىم، ءومىر كورگەن ۇلكەن اقساقالدارىمىزدى، ەڭبەك وزاتتارىن سويلەتتىك. ولار قۋانىشتارىن جەتكىزۋمەن بىرگە حالىقتى، اسىرەسە جاستاردى بىرىگۋگە، جاقسى جۇمىس ىستەۋگە شاقىردى. «مىنە، تاۋەلسىزدىكتى الدىق!» دەپ توي تويلاپ كەتپەي، بىرلىكتە بولۋ كەرەك ەكەنىن ۇلكەن كىسىلەرگە ايتتىردىق»، - دەدى ارداگەر جۋرناليست.
تاۋەلسىزدىك تۋرالى العاشقى قۋانىشتى جاڭالىقتى جەتكىزگەن جەرگىلىكتى جۋرناليستەر ەندى ەركىندىكتىڭ قادىرىن حالىققا تۇراقتى تۇردە ناسيحاتتاي بەرگەن.
«ءبىز ونى ءبىر- ەكى كۇندىك جۇمىس دەپ ويلاعان جوقپىز. تۇراقتى تۇردە حابارلاردى بەرە باستادىق. وسى جولدا ەڭبەگى بار ادامدارعا ارنايى رۋبريكا اشىپ، ۇنەمى ناسيحاتتاپ وتىردىق»، - دەدى ول.
ارداگەر ءتىلشىنىڭ ايتۋىنشا تاۋەلسىزدىكتىڭ قادىر-قاسيەتىن حالىق جاقسى تۇسىنگەن. ۇساق شارۋالار جەرگىلىكتى جەردە شەشىلىپ، الىسقا الاڭدامايتىنىنا قۋانعان.
«1991 -جىلدان كەيىن حالىقتىڭ ەڭبەككە دەگەن ىنتاسى دا، كوڭىل كۇيى دە وزگەردى. ءوڭىر دە، ءومىر دە - ءبارى جايناپ كەتپەگەنىمەن، الداعى كۇنگە دەگەن ارمان-تىلەگى ورىندالاتىنداي سەزىم بولدى. سونىڭ ءبارى «تاۋەلسىزدىككە تاۋبە!» دەپ ايتۋعا تۇراتىنداي ەدى. ءبىز ءالى دە تاۋەلسىزدىكتىڭ تۇعىرىن بيىكتەتە ءتۇسۋىمىز كەرەك. ەلدىڭ جەتىستىكتەرىن ەسەلەي ءتۇسۋىمىز قاجەت. قازاق ەلىنىڭ تاۋەلسىزدىگى تۇعىرلى بولسىن!»، - دەپ جولامان بوشالاق ءسوز سوڭىندا ەلدى مەرەكەمەن قۇتتىقتادى.
اۆتور
ينديرا ساتەنباي
