س ق و-دا ورتەنگەن ۇيدەن تۇرعىندى الىپ شىققان ەر ادام ماراپاتتالدى

س ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، وقىس وقيعا 24-قاراشا كۇنى ساعات تۇنگى بىرلەر شاماسىندا پەتروپاۆلداعى جۇمىسشى كەنتىندە بولعان. ەۆگەني پاۆلوۆ ۇيىندە وتىرىپ، تەرەزەدەن كورشى حورۆات، 51-مەكەنجايىنداعى ۇيدەن شىققان جالىندى بايقاپ قالادى. ول بىردەن كومەككە ۇمتىلىپ، ادامداردىڭ نازارىن اۋدارۋ ءۇشىن جولدا تۇرعان «گازەلدىڭ» دابىلقاققىشىن قوسادى.

«كورشى ءۇيدىڭ ەسىگىنە جۇگىردىم. ورتكە ورانعان ۇيدەن مەن قۇتقارعان زارداپ شەگۋشىنىڭ ۇلى شىعىپ كەلە جاتىر ەكەن. ول جاقتا تاعى بىرەۋ قالدى ما دەپ سۇرادىم. جىگىت مۇلىكتىڭ بارلىعى تولىعىمەن جانىپ كەتكەنىن ايتىپ، بارماي اق قوي دەدى. سپيرتتىك ىشىمدىك ىشكەنى بايقالىپ تۇردى. مەن وندا قارت ادامنىڭ تۇراتىنىن ءبىلۋشى ەدىم. اكەمنىڭ دوسى. قۇلاعى دۇرىس ەستىمەيدى، كوزى كورمەيدى. سول سەبەپتى جىگىتتى تىڭداماي، جانعان ۇيگە كىردىم»، - دەيدى ەۆگەني پاۆلوۆ.

جىگىتتىڭ ايتۋىنشا، باسپانا جالىنعا ورانىپ، كوك تۇتىنمەن ۋلى گاز كوزدى اشتىرماعان. ول جۇرەسىنەن وتىرىپ، جەردە جاتقان كورشىسىن كورەدى. سپورتشى جىگىت ەر ادامدى كوتەرىپ الىپ، دالاعا الىپ شىعادى.

«5 مينۋتتان كەيىن ءورت سوندىرۋشىلەر دە جەتتى. ال مەن كورشىمدى ۇيگە اكەلىپ، العاشقى مەديتسينالىق كومەكتى كورسەتتىم. سول ساتتە ادامدى قۇتقارۋدان باسقا وي بولعان جوق»، - دەيدى ەۆگەني پاۆلوۆ.

ورتتە ادامنىڭ ءومىرىن قۇتقارۋ كەزىندە كورسەتكەن باتىلدىعى، جانقيارلىعى جانە ازاماتتىق بورىشىن ادال ورىنداعانى ءۇشىن ەۆگەني پاۆلوۆ لايىقتى ماراپاتتى الدى. وعان تاۋەلسىزدىك كۇنى قارساڭىندا سالتاناتتى تۇردە «توتەنشە جاعدايداعى ەرلىگى ءۇشىن» مەدالى تابىس ەتىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى