ا ق ش: جاپپاي وق جاۋدىرۋ قاشان توقتايدى؟
ونىڭ 14 جەلتوقسانداعى مالىمەتى بويىنشا ا ق ش- تا 628 جاپپاي وق اتۋ دەرەگى تىركەلدى. بىلتىر ەل اۋماعىندا قوعامدىق ورىندا 690 رەت وق اتىلعان. ەڭ قاندى وقيعا وسىدان ون جىل بۇرىن تىركەلدى. نيۋتاۋن قالاسىنداعى سەندي- حۋك مەكتەبىنىڭ باستاۋىش سىنىبى وقۋشىلارىنا 20 جاستاعى قاندىقول وق جاۋدىرادى. قايعىلى جايتتان ءبىرىنشى سىنىپتاعى 20 بالا كوز جۇمىپ، التى ەرەسەك قايتىس بولدى. سول كەزدەگى پرەزيدەنت باراك وباما دا كوز جاسىن تيا المادى.
باراك وباما، ا ق ش پرەزيدەنتى، 2012 -جىلى:
- ءاپ- ادەمى 5 پەن 10 جاس ارالىعىنداعى كىشكەنتاي بۇلدىرشىندەر. ولاردى بولاشاقتا تۋعان كۇندەرى، مەكتەپ بىتىرۋلەرى، ۇيلەنۋ تويلارى، ءوز بالالارى كۇتىپ تۇرعان ەدى.
وباما جازىقسىز امەريكالىقتار قايتىس بولعان وقيعالاردى جىپكە ءتىزىپ، مۇنداي جايت ەندى قايتالانباۋى كەرەك، سول ءۇشىن ماڭىزدى شارالار قابىلداۋىمىز قاجەت دەپ مالىمدەگەن ەدى. ءبىراق ا ق ش قوعامى قارۋ- جاراققا تىيىم سالۋ ماسەلەسىندە ءالى ەكىگە جارىلىپ تۇر. ءبىرى ءوزىن قورعاۋ ءۇشىن سۋىق قارۋدى شەكتەۋگە قارسى، ەندى ءبىرى قاشانعى بەيبىت كۇندە ازاماتتاردان ايىرىلامىز دەيدى. قايعىلى وقيدان بالاسىن جوعالتقان اتا- انالار دا ارنايى ۇيىم قۇرىپ، زورلىق- زومبىلىقتى توقتاتۋ ءۇشىن كۇرەسىپ ءجۇر.
نيكول حوكلي، Sandy hook promise ۇيىمىنىڭ بەلسەندىسى:
- ءبىز جاپپاي وق اتۋدى توقتاۋىمىز كەرەك. سوڭعى ون جىلدا ميلليون ادام زارداپ شەكتى. تەك بيىل مەنىڭ ويىمشا 40 مىڭ ادام وققا ۇشتى. ونىڭ قانشاماسى 19 جاسقا دەيىنگى بالالار. ورتاشا ەسەپپەن تاۋلىگىنە كەم دەگەندە ەكى رەت وق اتىلادى. جالپى ا ق ش- تا مەكتەپكە كەلىپ، بەيكۇنا وقۋشىلارعا وق جاۋدىرۋ وقيعاسى ءجيى بولادى.
جەرگىلىكتى اقپارات قۇرالدارىنىڭ مالىمەتى بويىنشا 2021 -جىلى 250 ءبىلىم وشاعىندا مىلتىق اتىلسا، بيىل 292 مەكتەپ ۇرەي قۇشاعىندا قالدى. مامىردىڭ 24 ءى تەحاستا قاندىقول 19 بالا مەن 2 مۇعالىمدى اتىپ تاستادى. سودان كەيىن ماۋسىمدا دجو بايدەن جارتىلاي اۆتوماتتاردى جاستارعا جانە قوعام ءۇشىن ءقاۋىپتى تۇرعىندارعا ساتۋعا شەكتەۋ تۋرالى زاڭعا قول قويدى. سوعان قاراماستان قارۋ- جاراق توڭىرەگىندەگى تالاس- تارىس ءالى ناقتى شەشىلگەن جوق. بەي- بەرەكەت وق اتۋ تىيىلماي تۇر.
تاياۋدا عانا ۆاشينگتون ماڭايىنداعى مەريلەند شتاتىندا 9- سىنىپ وقۋشىلارى جانجالداسىپ، ءبىر ءجاسوسپىرىم وق جاراقاتىمەن اۋرۋحاناعا ءتۇستى. 18 مىڭ ادام مەكتەپتىڭ ونلاين جينالىسىنا قاتىسىپ قاۋىپسىزدىككە الاڭداۋشىلىق بىلدىرگەن.
اۆتورى: نۇربەك بەكەن
www.24.kz
