رۇستەم ءابدىراشتىڭ حالىقارالىق فەستيۆالدان باس جۇلدە العان تاريحي فيلمى پورتۋگاليادا كورسەتىلدى

سونداي-اق، كينوفيلم «ەڭ ۇزدىك رەجيسسەرلىك جۇمىس» نوميناتسياسىندا جەڭىسكە دە جەتتى، دەپ حابارلايدى قازاقپارات ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.

«ءبىز بۇل جوبامەن بىرنەشە جىل اينالىستىق جانە قازاقستاندا ءبىرىنشى بولىپ تولىق مەتراجدى كوركەم فيلم مەن تاريحي سەريالدى ۇسىندىق. مەنىڭ ويىمشا، فيلم تاريحىمىزدى تەك ءبىزدىڭ ەلىمىزدە عانا ەمەس، ودان تىس جەرلەردە دە كورسەتۋگە لايىقتى»، - دەپ اتاپ ءوتتى ر. ءابدىراش.

قازاقستاندىق فيلمدى پورتۋگالدىق كورەرمەندەردىڭ جىلى قابىل الۋى وسى سوزدەردى راستاعان ءتارىزدى. كينو جانە تەلەديدار سالاسىنداعى ساراپشىلار، سونداي-اق بولاشاق كينەماتوگرافيستەر قازاق تاريحىمەن، مادەنيەتىمەن جانە كوشپەلى وركەنيەتتىڭ ومىرىمەن قىزىعۋشىلىقپەن تانىستى.

كينوفەستيۆال ديرەكتورى، مينيۋ ۋنيۆەرسيتەتى كينەماتوگرافيا ينستيتۋتىنىڭ پروفەسسورى ارتۋر بارروسا مورەيرا قازاقستاننىڭ شىعارماشىلىق توبىن قۇتتىقتاي وتىرىپ، جەڭىمپاز ءفيلمنىڭ جوعارى كوركەمدىك دەڭگەيىن اتاپ ءوتىپ، قازاقستاندىق كينەماتوگرافپەن العاشقى تانىسۋ شىنايى دوستىق پەن سەرىكتەستىكتىڭ باستاماسى بولعانىن جانە ونىڭ جالعاسىن تاباتىنىنا ءۇمىت ءبىلدىردى. فەستيۆال اياسىندا بىرنەشە ەۋروپالىق ديستريبيۋتورلار قازاقستاندىق ءفيلمدى اعىلشىن ءتىلدى كورەرمەن ءۇشىن پروكاتقا شىعارۋعا نيەت ءبىلدىردى.

«BRAGACINE» - پورتۋگاليادا 2003 -جىلدان بەرى وتكىزىلىپ كەلە جاتقان جانە ەۋروپا، امەريكا جانە ازيا فيلمدەرىن جينايتىن حالىقارالىق تاۋەلسىز كينوفەستيۆال. بيىلعى جىلى 20- مەرەيتويلىق بايقاۋ وكرۋگتىڭ مۋنيتسيپاليتەتى باسشىلىعىنىڭ، ساياساتكەرلەردىڭ، ديپلوماتتار، تانىمال اكتەرلەر، سىنشىلار جانە مينيۋ ۋنيۆەرسيتەتىنىڭ بولاشاق كينورەجيسسەرلارىنىڭ قاتىسۋىمەن «Braga Parque» ەڭ ۇلكەن كينو ورتالىعىندا ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى