شىعىس قازاقستاندا ءبىر كۇندە جاۋعان قاردىڭ قالىڭدىعى جارتى مەتردەن استى

شىعىس قازاقستاندا 13- جەلتوقساندا كۇنى بويى تولاسسىز قار جاۋدى. ونىڭ ىشىندە وسكەمەندە دە تاڭەرتەڭ باستالعان قار ءتۇن ورتاسىنا دەيىن جاۋعان.

قالادا كولىكتەر اۋلالارىنان شىعا الماي، اۆتوبۋستار كەستەدەن كەشىكتى. جاۋعان قار قالىڭدىعى جارتى مەتردەن اسقان.

«قازگيدرومەت» رمك شىعىس قازاقستان وبلىسى فيليالىنىڭ ديرەكتورى لياززات بولاتحان قىزىنىڭ ايتۋىنشا، ەڭ قالىڭ قار مارقاكول قورىعى ماڭىندا تۇسكەن - 75 سانتيمەتر.

كۇرشىم اۋدانىنا قاراستى بوران اۋىلىندا 56، تەرەكتىدە 49 سانتيمەترگە جەتكەن. سامار اۋدانىنا قاراستى اۋىلداردا - 34-40 سانتيمەتر ارالىعىندا. التاي قالاسىندا 56، كاتونقاراعاي اۋدانىنداعى ۇلكەن نارىن اۋىلىندا 40 سانتيمەتر جاۋعان.

«وسكەمەندە كوممۋنالدىق قىزمەتتەر تاۋلىك بويى كۇشەيتىلگەن رەجيمدە جۇمىس ىستەدى. تاڭەرتەڭ قالاداعى بارلىق تاسجول اشىق بولدى. قاردى تازالاۋعا 86 ارنايى تەحنيكا مەن 185 جۇمىسشى جۇمىلدىرىلعان»، - دەيدى قالا اكىمىنىڭ ورىنباسارى دەنيس فەدچەنكو.

اۆتور

تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى