تەڭگە قالاي پايدا بولدى - بريتان ماماندارىنىڭ ەستەلىگى - فوتو

De La Rue - 400 جىلدىق تاريحى بار، الەمنىڭ 140 تان استام ەلى ءۇشىن بانكنوت باسىپ شىعارعان كومپانيا. بۇدان بولەك مۇندا ءتولقۇجاتتار، جۇرگىزۋشى كۋالىكتەرى جانە بانكتەرگە قاجەت جابدىقتار جاسالادى. ءتول تەڭگەمىزدىڭ تاريحىن بىلەتىن قىزمەتكەرلەر مۇندا ءالى كۇنگە دەيىن جۇمىس ىستەيدى. سولاردىڭ ءبىرى كريس مەتيۋس - ستۋديالىق مەنەدجەر. ول وتىز جىل بۇرىن وتاندىق سۋرەتشىلەرىمىزبەن بىرگە تەڭگەنىڭ بەت-بەينەسىن جاساۋمەن اينالىسقان.

«مىناۋ ءبىزدىڭ قازاقستان ءۇشىن دايىنداعان بانكنوتتارىمىزدىڭ ءبىرىنشى توپتاماسى. مەن اباي پورترەتىن جاساۋعا اتسالىستىم. بۇل ەڭبەگىمدى مەن ەرەكشە ماقتان تۇتامىن. نەگىزى قازاقستاندىق ديزاينەرلەر انگلياعا وتە مىقتى يدەيالارىمەن كەلدى. ءبىز ولارعا قولداۋ عانا بىلدىردىك. سۋرەتشىلەرىڭىز بانكنوتتاردا قازاق مادەنيەتى مەن تاريحىن بارىنشا كورسەتۋگە تىرىستى»، - دەيدى كريس مەتيۋس.

كومپانيا قىزمەتكەرلەرى العاشقى تەڭگەلەردىڭ ديزاينى اعىلشىنداردىڭ ستەرلينگ فۋنتىنان ەش كەم تۇسپەدى دەيدى. وعان قوسا الەمدىك دەڭگەيدەگى ستاندارتتارعا ساي بولعان. قولدان جاساۋدان قورعايتىن 18 بەلگىسىمەن ەرەكشەلەنگەن.

«بۇل مەن كورگەن قازاقتىڭ العاشقى تەڭگەسى. ءتۇسى جاعىنان انگليانىڭ 5 فۋنتىنا ۇقساس بولدى. شەتىندە بانكنوتتى قولدان جاساۋدان قورعايتىن ءجىپ بار جانە ول كەزدە جاڭا تەحنولوگيا سانالاتىن. ەكىنشى توپتاماسىنداعى سۋرەتتەر تىگىننەن سالىندى. قازاقستاننىڭ زاماناۋي كەلبەتى جانە تابيعاتى كەرەمەت جەتكىزىلدى»، - دەيدى De La Rue كومپانياسىنىڭ ايماقارالىق ديرەكتورى داميان ۆيتكوۆسكي.

ۇلتتىق ۆاليۋتا قاتاڭ قۇپيا جاعدايدا ەنگىزىلدى. وپەراتسيانى جۇزەگە اسىرۋ ءۇشىن وتە شەكتەۋلى ءارى اسا جاۋاپتى ادامداردان تۇراتىن جابىق توپ قۇرىلدى. دايىن بولعاننان كەيىن قاپ- قاپ اقشا ءتورت ي ل-76 ۇشاعىمەن لوندوننان الماتىعا جەتكىزىلدى. بۇدان كەيىن ولار قازاقستاننىڭ وبلىس ورتالىقتارىنا تاراتىلدى. ۇشاقتارعا بەرىلگەن قۇجاتتا «سالىنىپ جاتقان پرەزيدەنت رەزيدەنتسياسىنا ارنالعان جابدىقتار» دەپ جازىلدى.

«مۇنداي جاعدايلاردا قاتاڭ قۇپيالىق ءاردايىم ساقتالادى. مىسالى، جاڭا ديزايندى بەكىتۋ ءۇشىن ءبىز قاعاز اقشانى كوممەرتسيالىق كۋرەر ارقىلى جىبەرە المادىق. ءتىپتى، ءوز قولىمىزبەن اپارعان جاعدايدا دا اۋەجايدا قورقىنىش بولاتىنى ءسوزسىز. تەڭگە تۋرالى اقپارات بوتەننىڭ قولىنا كەتىپ قالماس ءۇشىن وسىنداي ساقتىق شارالارىنا قاتتى ءمان بەرىلدى»، - دەيدى De La Rue كومپانياسىنىڭ قازاقستانمەن بايلانىس جونىندەگى وكىلى دەبورا سميت.

كەيىن اقشانى قازاقستاندا باسىپ شىعارۋعا دەگەن قاجەتتىلىك تۋدى. 1993 -جىلى الماتىدا مونەتا سارايىنىڭ قۇرىلىسى باستالىپ، جابدىقتارمەن De La Rue كومپانياسى قامتاماسىز ەتتى. وسىلايشا قازاقستان تاۋەلسىزدىكتىڭ تاعى دا ءبىر ەڭ ماڭىزدى ساتىسىنان اتتادى - ءوزىنىڭ ۇلتتىق ۆاليۋتاسى بار مەملەكەتكە اينالدى.

اۆتور

عالىمجان قارامان ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى