ەلىمىز بويىنشا سوعىم باعاسى قانداي

وسىعان ساي، قازاقپارات اگەنتتىگى ەلىمىز بويىنشا جىلقى مەن سيىر مالىنىڭ قازىرگى قۇنىن انىقتادى.

ەت باعاسى ەڭ قىمبات ايماقتار كوشىن اقمولا ءوڭىرى باستادى. كەلەسى كەزەكتە ۇلىتاۋ مەن الماتى وبلىستارى تۇر.

سونىمەن رەسپۋبليكالىق ماڭىزى بار ءۇش قالا مەن 17 وبلىستاعى سوعىم باعاسى مىناداي:

استانا قالاسى

استانا قالاسىندا بيىلعى بۇزاۋلار 200 مىڭ تەڭگە كولەمىندە تۇرادى. تايىنشا 240 مىڭ شاماسىندا بولسا، قۇناجىندار 300 مىڭنىڭ ماڭايىندا. ءىرى سيىرلار سالماعىنا بايلانىستى 320 مىڭنان جوعارى باعالانادى.

ال بيىلعى جاباعىنىڭ كۇيلىسىن - 300-گە، سەمىرتىلمەگەنىن 220-250 مىڭعا الۋعا بولادى. جايىلىمنان اكەلىنگەن تايلار 250-350 مىڭعا ساۋدالانىپ جاتىر. قولدا جەمدەلگەن تايلار بولسا، 350 مىڭنان جوعارى تۇرادى. بايتالداردىڭ بيىلعى قۇنى استانا قالاسى اۋماعىندا 450 مىڭنان باستالادى. تۋ بيەلەر 500-700 مىڭ تەڭگە ارالىعىندا ساتىلۋدا.

الماتى قالاسى

الماتى شاھارىندا ءىرى قارا (سيىر) 350-500 مىڭ تەڭگە شاماسىندا تۇرادى. جىلقىنىڭ باعاسى 420 مىڭنان باستالىپ، 620 مىڭ تەڭگە دەيىن جەتەدى. سيىر ەتىنىڭ ءبىر كەلىسى 2100-2300 تەڭگە ارالىعىندا. ال جىلقى ەتىنىڭ كەلىسى 2600-2800 تەڭگەدەن ساتىلىپ جاتىر.

شىمكەنت قالاسى

شىمكەنتتە ءبىر جارىم جاسار تايلاردىڭ ءتىرى سالماقتاعى قۇنى 300 مىڭ تەڭگەدەن باستالىپ، جوعارىلاي بەرەدى. مۇنىمەن قاتار، شاھارداعى ءىرى قارا قۇنى وزگە وڭىرلەرمەن سالىستىرعاندا ءبىرشاما ارزان. ياعني، ولار 200 مىڭ تەڭگەنىڭ ۇستىندە. ال جىلقى ەتىنىڭ كەلىسى 2400-2800، سيىر ەتىنىڭ ءبىر كيلوگرامى ءۇشىن 2000-2400 ارالىعىندا اقشا تولەۋ قاجەت.

الماتى وبلىسى

الماتى وبلىسىندا قۇنان مەن قۇناجىندار 400-450 مىڭ تەڭگە تۇرادى. جىلقىلارعا قويىلاتىن باستاپقى باعا - 530 مىڭ تەڭگە. ءارى قاراي جوعارىلاي بەرەدى. ەڭ قىمباتى - 700 مىڭ تەڭگەنى ماڭايلايدى. ەركەك ءىرى قارا 300-400 مىڭنان ساتىلسا، سيىرلار 350-400 مىڭ تەڭگە شاماسىندا.

اقمولا وبلىسى

ارنايى سەمىرتىلگەن 1،5 جاسار تايلاردىڭ قۇنى كۇيىنە بايلانىستى 250 مىڭنان 500 مىڭ تەڭگەگە دەيىن بارادى. ەركىن جايىلىمنان اكەلىنگەن تايلاردىڭ قۇنى 200 مىڭ تەڭگە شاماسىندا. بۇل رەتتە، وبلىستا سەمىرتىلگەن ۇرعاشى جىلقى مالىنا سۇرانىس جوعارى. كۇيلى بايتالدىڭ ءتىرى سالماقتاعى باعاسى ازىرگە 600-700 مىڭ تەڭگە. بيەلەر كۇي جيناۋىنا بايلانىستى 650-900 مىڭ تەڭگەگە ساتىلىپ جاتىر. ال ەكى-ءۇش اي ارنايى سەمىرتىلگەندەرىنىڭ باعاسى كەمىندە 750 مىڭ تەڭگە تۇرادى.

وبلىس اۋماعىندا ءمىنىس اتتارىن دا سەمىرتىپ، ساۋدالاپ جاتقاندار از ەمەس. ولاردىڭ ورتاشا باعاسى 600-700 مىڭ تەڭگە. ال ءبىر اياق ەتتىڭ قۇنى 150-220 مىڭ تەڭگەنى شامالايدى.

جالپى، وبلىستا سوعىمعا ارنايى سەمىرتىلگەن سيىرلاردىڭ باعاسى 250-500 مىڭ تەڭگە اراسىن قامتيدى. بۇل ورايدا، كۇي جيناعان ەكى جىلدىق تايىنشالاردىڭ ورتاشا قۇنى 300 مىڭنان جوعارىلاي بەرەدى.

اباي وبلىسى

ءوڭىر كولەمىندە سالماعىنا قاراي سوعىمعا سويىلاتىن ءىرى قارانىڭ قۇنى 200-300 مىڭ تەڭگە كولەمىندە. ال جىلقى باعاسى سالماعىنا بايلانىستى 350 مىنڭان باستالىپ، 500 مىڭعا دەيىن بارادى. جىلىكتەپ الاتىندار ءۇشىن جىلقى ەتىنىڭ ءبىر كەلىسى 2000-2400 بولسا، سيىر ەتى ءۇشىن 1750-1900 تەڭگە.

اقتوبە وبلىسى

وبلىس اۋماعىندا سوعىم باعاسى ءارتۇرلى. جاباعى 190-250 مىڭ تەڭگە ارالىعىندا تۇرسا، سيىر مالى 300-400 مىڭ تەڭگەدەن ساتىلۋدا. بيە قۇنى 500-600 مىڭ تەڭگە. اقتوبەلىكتەر سوعىمدى كوبىنە اياقتاپ ساتىپ الادى. جىلقى ەتىنىڭ كەلىسى 2400-2800 تەڭگەنى شامالاسا، سيىر ەتى 2200 تەڭگەدەن باستالىپ، 2400-گە دەيىن بارادى.

اتىراۋ وبلىسى

اتىراۋ وبلىسىنداعى سوعىم باعاسى وزگە وڭىرلەرگە قاراعاندا تومەن. وندا جاباعىنى 180-220، ال قۇناندى 270-300 مىڭ تەڭگە الۋعا بولادى. دونەن قۇنى 320 مىڭنان باستالىپ، 380-گە دەيىن بارادى. بەستى بيەلەر 400-480 مىڭنان ساتىلىپ جاتىر. ال سوعىمعا سيىر سويۋدى جوسپارلاعاندار 180-220 مىڭ تەڭگەگە قاشار مەن تايىنشا الا الادى. وبلىس اۋماعىندا قۇناجىن – 280، كۇيلى دونەجىن 300 مىڭنان جوعارى باعالانۋدا.

شىعىس قازاقستان وبلىسى

بۇل وڭىردەگى سوعىم باعاسى اباي وبلىسىمەن شامالاس. ماسەلەن، قازىرگى ۋاقىتتا شىعىس قازاقستان اۋماعىندا ءىرى قارا 250-300 مىڭ تەڭگەدەن ساۋدالىنىپ جاتىر. بيىل وبلىستا جىلقى مالى ءتىرى سالماقتا 400-500 مىڭ تەڭگە كولەمىندە باعالانىپ وتىر. اياقتاپ الاتىندار ءۇشىن سيىر ەتىنىڭ كەلىسى 1800-1900، ءبىر كيلوگرامم جىلقى ەتىن 2200-2400 تەڭگەگە الۋعا بولادى.

جامبىل وبلىسى

جامبىلدا بايتال مەن دونەندەردىڭ باعاسى كەمىندە 500 مىڭنان باستالادى. ال قۇنان 350-420 ارالىعىن قامتىسا، ءبىر جارىم جاسار تايلار مەن بيىلعى جاباعىلاردىڭ قۇنى 250 مىڭنان جوعارى. سونىمەن قاتار، بۇل وڭىردە سيىرلار 300-350 مىڭ ارالىعىندا ساۋدالانىپ جاتىر.

جەتىسۋ وبلىسى

جەتىسۋ وبلىسىندا قۇناندار 400-450 مىڭ تەڭگە تۇرادى. كۇي جيناعان، سەمىز جىلقىلار 600 مىڭنان باستالىپ 700 گە جەتەدى. 2 جاسار بۇقالار 300-400 مىڭنان ساتىلسا، سيىرلار 350-400 مىڭ تەڭگە شاماسىندا.

باتىس قازاقستان وبلىسى

باتىس قازاقستان وبلىسىندا جاباعى 200 مىڭ تەڭگە كولەمىندە تۇرادى. كۇيىنە بايلانىستى جىلقى باعاسى وسى سومادان جوعارىلاي بەرەدى. ال سيىر مالى 250 مىڭنان باستالادى. ارنايى سەمىرتىلگەن ءىرى قارا قۇنى 300 مىڭنان اسىپ تۇسەدى.

قاراعاندى وبلىسى

قاراعاندى وبلىسىندا تايىنشالاردىڭ باعاسى 180-200 مىڭنان باستالادى. جاباعى دا 180-200 مىڭ جانە ودان جوعارى. بايتالدار بولسا 450 مىڭنىڭ ۇستىندە ساۋدالانىپ جاتىر. تۋ بيەلەردىڭ ەڭ ارزانى - 600، قىمباتى - 700 مىڭ تەڭگەنى شامالاپ قالادى.

قوستاناي وبلىسى

مۇندا تايلار مەن جاباعىلار 270 مىڭنان قىمباتتاي بەرەدى. قۇناندارعا قويىلاتىن قازىرگى ەڭ ارزان سوما - 380 مىڭ، ال بايتال مەن دونەن 550 مىڭ تەڭگەدەن باستالىپ، ءارى قىمباتتاي تۇسەدى. ءتىپتى 750 مىڭعا دەيىن جەتەدى. ال تايىنشا مەن قاشارلار 220-250 مىڭ شاماسىندا. سيىرلار كەمىندە 350 مىڭ تۇرادى.

قىزىلوردا وبلىسى

قىزىلوردادا سوعىمعا كۇيلى جىلقى سويامىن دەسەڭىز، 500-700 مىڭ تەڭگە ارالىعىندا قاراجات كەرەك. ال سيىر باعاسى وزگە وڭىرلەرمەن شامالاس. اتاپ ايتقاندا، سيىر 300-400 مىڭ تەڭگە كولەمىندە تۇرادى. ال اياقتاپ ساتىلاتىن جىلقى ەتىنىڭ كەلىسى 2 500 بولسا، سيىر ەتىنىڭ ءبىر كيلوگراممى 2 200 تەڭگەدەن ساتىلىپ جاتىر.

ماڭعىستاۋ وبلىسى

اتالعان ايماقتا جاباعىنىڭ ءتىرى سالماقتاعى قۇنى 240-250 مىڭ بولسا، تاي مەن قۇناندى 350-400 مىڭ تەڭگە ارالىعىنداعى قاراجاتقا الۋعا بولادى. بيەلەر 450-500، ال دونەنشەلەر 500-650 مىڭعا دەيىن جەتىپ وتىر. سيىر جىلقىنىڭ باعاسىمەن شامالاس. مۇندا ءىرى قارا كوبىنە ورال مەن قوستانايدان اكەلىنەدى.

سوعىمدى اياقتاپ الاتىندار ءۇشىن سيىر ەتىنىڭ كەلىسى2700-2800 تەڭگە. ماڭعىستاۋدا جىلقى ەتىنىڭ كيلوگرامى 2700 دەن، ال قازىنىڭ باعاسى 4200 تەڭگە بولادى.

سولتۇستىك قازاقستان وبلىسى

بۇل وبلىستاعى ەڭ ارزان تايدىڭ ءبىر اياق ەتى 120 مىڭ تەڭگە. ورتاشا باعا 130 مىڭ شاماسىندا. قازىسى 2-3 ەلى بەرەتىن تايدىڭ ءبىر سيراعى 150 مىڭ تەڭگەگە دەيىن بارادى. ال بايتالدىڭ ءبىر اياق ەتى 160-180 مىڭ تەڭگە ارالىعىندا. بۇل ورايدا اتالعان ءوڭىر تۇرعىندارى سوعىمدى كوبىنە جىلىكتەپ جانە اياقتاپ الادى.

تۇركىستان وبلىسى

بۇل وبلىستا ءتىرى سالماقتاعى ءبىر جارىم جاسار تايلار 300 مىڭ تەڭگەدەن باستالىپ، 400 گە دەيىن جەتىپ جاتادى. تۇركىستاندا سوعىمعا سيىر سويۋعا نيەتتى تۇرعىندار 200 مىڭنان جوعارى سومادا مال تابا الادى.

تۇركىستاندا جىلقى ەتىنىڭ ءبىر كەلىسى 2400-2800 ارالىعىندا. ال سيىر ەتىنىڭ كيلوگرامى 2000-2400 تەڭگە.

پاۆلودار وبلىسى

پاۆلودار دا سوعىمى قىمبات وڭىرلەر قاتارىندا. بيىل مۇندا جاباعى مەن ءبىر جارىم جاسار تايلار 240 مىڭ تەڭگەدەن جوعارى ساتىلىپ جاتىر. ال قۇنانعا قويىلاتىن ەڭ تومەنگى باعا - 420 مىڭ. بۇل وبلىستاعى بايتال مەن دونەننىڭ ورتاشا قۇنى - 530 مىڭ شاماسىندا، ءارى قاراي قىمباتتاي تۇسەدى. سيىرلار بولسا 330-390 مىڭ تەڭگەنىڭ اينالاسىندا.

ۇلىتاۋ وبلىسى

ءوڭىر اۋماعىندا جەمدەلگەن سيىرلاردىڭ باعاسى 350-دەن باستالىپ، 400 مىڭعا دەيىن بارادى. بيىلعى بۇزاۋلار 120-160 مىڭ تەڭگە ارالىعىندا. تايىنشالار - 180، قاشارلار 250-300 مىڭعا ساتىلۋدا. ۇلىتاۋداعى جاباعى قۇنى 200-300 مىڭ ارالىعىندا. بايتالدار 500-600 مىڭدى شامالاسا، تۋ بيەلەر 600-700 مىڭ تەڭگە تۇرادى.

وبلىستارداعى سوعىم باعاسى تۋرالى مالىمەتتەر قازاقپارات اگەنتتىگىنىڭ مەنشىكتى تىلشىلەرىنىڭ كومەگىمەن ازىرلەندى.

اۆتور

ءاليحان اسقار

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى