موڭعوليادا كومىر ۇرلىعىنا بۇرىنعى پرەزيدەنتتىڭ قاتىسى بار دەگەن كۇدىككە ءىلىندى
موڭعوليانىڭ بۇرىنعى پرەزيدەنتى حالتمااگين باتتۋلگا، جەتى دەپۋتات جانە ءبىر گۋبەرناتور كومىردى ءىرى كولەمدە ۇرلاۋ ىسىنە كۇدىكتى دەپ تانىلدى. تىزىمدە بارلىعى 35 ادام بار.
بۇل تۋرالى ريا نوۆوستي ەلدىڭ سىبايلاس جەمقورلىققا قارسى كوميتەتىنە سىلتەمە جاساپ حابارلادى.
ۆەدومستۆونىڭ مالىمەتىنشە، پرەزيدەنت اكىمشىلىگىنىڭ بۇرىنعى ءتوراعاسى، سونداي-اق بۇرىنعى كولىكتى دامىتۋ ءمينيسترى باتتۋلگا كومىر وندىرۋگە، تاسىمالداۋعا جانە تاۋارلار مەن قىزمەتتەردى مەملەكەتتىك اقشاعا ساتىپ الۋعا قاتىسقان.
«قازىرگى ۋاقىتتا بارلىعى 22 تەرگەۋ ءىسى جۇرگىزىلۋدە. تەرگەۋ بارىسىندا 47 نىساندا ءتىنتۋ جۇرگىزىلىپ، 15 ادام قاماۋعا الىنىپ، ون ادام ۇستالدى»، - دەدى موڭعوليانىڭ سىبايلاس جەمقورلىققا قارسى كوميتەتى تەرگەۋ ءبولىمى باسشىسىنىڭ ورىنباسارى.
بۇعان دەيىن موڭعول مەملەكەتتىك كومىر ءوندىرۋ جانە ەكسپورتتاۋ كومپانياسىنىڭ بۇرىنعى باسشىسى باتتۋلگىن گانحۋياگ، ونىڭ تۋىستارى جانە بىرنەشە كاسىپكەر ءتىنتۋ جۇرگىزىلگەننەن كەيىن ۇستالعانى بەلگىلى بولدى.
