بۇقتىرما سۋ قويماسىنداعى قايعىلى جاعدايدان سوڭ پوليتسيا قاۋىپتى جەرگە كۇزەت قويۋعا ءماجبۇر

ش ق و ت ج د مالىمەتىنشە، سامار اۋدانىنداعى بۇقتىرما سۋ قويماسىندا كولىك جۇرگىزۋشىلەرىنە مۇز ۇستىمەن جۇرۋگە تىيىم سالىنعان. الايدا بۇل ەسكەرتۋدى ەلەمەيتىندەر دە بار.

«مۇز ۇستىندە كولىكتەردىڭ قوزعالىسىنا توسقاۋىل قويۋ ءۇشىن تاۋلىك بويى جۇمىس ىستەيتىن ستاتسيونارلىق بەكەت قويىلدى. وندا پوليتسيا قىزمەتكەرلەرى كەزەكشىلىك ەتۋدە»، - دەلىنگەن اقپاراتتا.

ەسكە سالساق، ش ق و- دا 6- جەلتوقسان كۇنى ساعات 19.40 كەزىندە 5 ادام وتىرعان كولىك مۇز استىنا قۇلاعان.

تورتەۋى كولىكتەن شىعىپ ۇلگەرىپ، 72 جاستاعى ايەل سۋعا باتىپ كەتكەن ەدى. الايدا ايەلدىڭ دەنەسى بىردەن تابىلمادى.

سۇڭگۋىرلەرگە اۋانىڭ تومەن تەمپەراتۋراسى مەن سۋ استىنداعى قاراڭعىلىق قيىندىق كەلتىرگەن.

8- جەلتوقساندا تۇسكى ۋاقىتتا ايەلدىڭ دەنەسى تابىلدى. بارلىعى 9 رەت سۋ استىنا ءتۇسۋ جۇمىستارى جۇرگىزىلدى.

ش ق و پوليتسيا دەپارتامەنتى اتالعان فاكتى بويىنشا سوتقا دەيىنگى تەرگەۋ امالدارى جۇرگىزىلىپ جاتقانىن حابارلاعان.

اۆتور

تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى