ەۋرازيا كينوفەستيۆالىنىڭ العاشقى سىيلىقتارى تاپسىرىلدى

باعدارلاما قىزىل كىلەم راسىمىمەن باستالدى. سالتاناتپەن بەزەندىرىلگەن تەاتردىڭ باس زالىندا ءىس-شارانى فەستيۆال پرەزيدەنتى ارداق ءامىرقۇلوۆ پەن باعدارلاما ديرەكتورى گۇلنارا ابىكەيەۆا اشتى.

فەستيۆالگە قاتىساتىن بۇكىل فيلمدەردى قامتيتىن ترەيلەر كورسەتىلدى.

وعان قوسا، كورەرمەن قازىلار القاسىنىڭ مۇشەلەرىمەن تانىستى. ساحناعا شىققان شەتەلدىك قوناقتار الدىمەن قازاق تىلىندە كەم دەگەندە ءبىر-ەكى ءسوز ايتۋعا تىرىستى.

سالتاناتتى شارانىڭ باستى توسىنسىيى فەستيۆالدىڭ ارنايى جۇلدەلەرىن تابىستاۋ بولدى.

«ورتالىق ازيا كينەماتوگرافىنىڭ دامۋىنا قوسقان ۇلەسى ءۇشىن» جۇلدەسىن اتاقتى وزبەك رەجيسسەرى ءالي حامرايەۆ الدى، ول وسى فەستيۆالدە حالىقارالىق بايقاۋدىڭ قازىلار القاسىن باسقارادى.

«بۇگىن قازاقستان جەرىنە مەرەكە كەلدى - الەمدىك كينو وكىلدەرى ءسىزدىڭ شاڭىراقتا قوناقتا. مەنىڭ ويىمشا، قيىن كەزەڭدە بوتەن حالىقتاردى جىلى قابىلداي الاتىن ادامدار كەرەمەت. «ەۋرازيا» فەستيۆالى قايتا ورالدى، ەڭ باستىسى وسى. ءبىز ونى ساعىندىق. فەستيۆالگە جانە قازاقستانعا ساتتىلىك»، - دەدى جيىندا اعىنان جارىلعان 85 جاستاعى وزبەك كينوسىنىڭ مايتالمانى.

تاعى ءبىر ارنايى سىيلىق - «قازاق كينەماتوگرافىنا قوسقان ۇلەسى ءۇشىن» مادەنيەتتانۋشى جانە قوعام قايراتكەرى مۇرات اۋەزوۆكە تابىستالدى.

باعدارلاما قازاقستاندىق كينورەجيسسەر ءسابيت قۇرمانبەكوۆتىڭ «بوران» كارتيناسىنىڭ كورسەتىلىمىمەن اياقتالدى.

اشىلۋ سالتاناتىنا دەيىن فەستيۆال ورتالىعىندا العاشقى باسپا ءسوز كونفەرەنسياسى ءوتتى.

الدىمەن جۋرناليستەردىڭ الدىندا ءىس-شارا ۇيىمداستىرۋشىلارى ءسوز سويلەدى.

گۇلنار ابىكەيەۆانىڭ ايتۋىنشا، بيىلعى فەستيۆالدە جۇلدىزدى قازىلار القاسى مەن وتە مىقتى باعدارلاما جاسالعان.

«ءبىر كەزدەرى بىزدە «ديناميكالىق دامىپ كەلە جاتقان قازاق كينوسى»، سودان كەيىن «ديناميكالىق قازاق كينوسى» باعدارلامالارى بولسا، قازىر ءبىزدىڭ كينەماتوگراف حالىقارالىق بايقاۋمەن تەڭ جەكە ۇلتتىق كونكۋرس وتكىزۋگە مۇمكىندىك بەرەتىن دەڭگەيگە جەتتى. XVI «ەۋرازيا» كينوفەستيۆالىنىڭ باستى ەرەكشەلىگى مەن جاڭالىعى - وسى»، - دەدى ول.

بايقاۋ باعدارلاماسىنىڭ جوعارى دەڭگەيىنىڭ دالەلى - بايقاۋعا قاتىساتىن ءتورت كارتينا ءوز ەلىنىڭ اتىنان «وسكار» سىيلىعىنا ۇسىنىلعان.

سونىمەن قاتار، فەستيۆالدە بىردەن ءتورت الەمدىك پرەمەرا وتەدى.

تاعى ءۇش باسپا ءسوز كونفەرەنتسياسىندا ۇلتتىق، حالىقارالىق بايقاۋلاردىڭ جانە NETPAC (ازيا كينوسىن ىلگەرىلەتۋ جونىندەگى حالىقارالىق جەلى) قازىلار القاسىنىڭ «تۇساۋكەسەرى» ءوتتى.

نەگىزگى ءىس-شارامەن قاتار كينوپارك 10 Forum كينوتەاترىندا فيلم كورسەتىلىمدەرى باستالدى.

حالىقارالىق بايقاۋدان «يل بوەمو» (چەحيا - يتاليا - سلوۆاكيا؛ رەجيسسەر پەتر ۆاتسلاۆ) جانە «ايەل» (قىتاي؛ رەجيسسەر ۆان چاو) فيلمدەرى كورسەتىلدى.

ۇلتتىق بايقاۋدان - «تاۋ پيازى» (رەجيسسەر ەلدار شيبانوۆ)، «زەرە» (رەجيسسەر داۋرەن قامشىبايەۆ) جانە «وت» (رەجيسسەر ايجان قاسىمبەك).

ال «ەرەكشە وقيعا» كونكۋرستان تىس باعدارلاماسى بولگار رەجيسسەرى، ۇلتتىق بايقاۋدىڭ قازىلار القاسىنىڭ مۇشەسى ميلكو لازاروۆتىڭ «اگا» كارتيناسىمەن اشىلدى.

ول بۇكىل الەم بويىنشا كينوفەستيۆالدەردە كوپتەگەن ماراپات العان، ال XIV «ەۋرازيا» كينوفەستيۆالىندە ۇزدىك رەجيسسۋرا ءۇشىن جۇلدە العان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى