قورعانىس مينيسترلىگى اسكەر بەدەلىن تۇسىرەتىن مالىمەت تاراتقانداردى قىلمىستىق جازالاۋدى ۇسىندى

قازاقستان رەسپۋبليكاسى قورعانىس مينيسترلىگىنىڭ ۇسىنىسى بويىنشا بۇقارالىق اقپارات قۇرالدارىنان ەرەكشە كەزەڭدە ق ر قارۋلى كۇشتەرىنىڭ، باسقا دا اسكەرلەر مەن اسكەري قۇرالىمداردىڭ بەدەلىن تۇسىرەتىن، قازاقستان رەسپۋبليكاسىنىڭ قوعامدىق قاۋىپسىزدىگى مەن قورعانىس قابىلەتىنە نۇقسان كەلتىرەتىن جالعان، ناقتى ەمەس جانە دەسترۋكتيۆتى اقپاراتتى نەمەسە مالىمەتتەردى تاراتقانى ءۇشىن اكىمشىلىك جانە قىلمىستىق جاۋاپكەرشىلىكتى ەنگىزۋ تۋرالى ءبىرقاتار جاريالانىمدار مەن ساۋالدارعا قاتىستى كەلەسىنى ءتۇسىندىرۋ قاجەت دەپ سانايمىز:

قارۋلى كۇشتەردەگى ەرەكشە كەزەڭ بۇل - «سوعىس جاعدايى تۋرالى» قازاقستان رەسپۋبليكاسىنىڭ 2003-جىلعى 5- ناۋرىزداعى 391№، «توتەنشە جاعداي تۋرالى» 2003 -جىلعى 8- اقپانداعى 387№ جانە «تەرروريمزگە قارسى ءىس-قيمىل تۋرالى» 1999-جىلعى 13- شىلدەدەگى زاڭدارىنا سايكەس قازاقستان رەسپۋبليكاسىنىڭ بۇكىل اۋماعىندا نەمەسە بەلگىلى ءبىر بولىگىندە ەنگىزىلەتىن داعدارىستىق كەزەڭ.

الەمدىك تاجىريبە كورسەتكەندەي، ەرەكشە كەزەڭنىڭ الدىندا ازاماتتىق قوعام مەن قارۋلى كۇشتەردىڭ جەكە قۇرامىنىڭ مورالدىق تۇرعىدان ەڭسەسىن تۇسىرەتىن اقپارات تاراتۋ ارقىلى حالىققا بەلسەندى اسەر ەتۋ كەزەڭى (اقپاراتتىق سوعىس) وتەدى.

ەرەكشە كەزەڭدە قولدانىستاعى زاڭناماعا ۇسىنىلعان وزگەرىستەر ب ا ق پەن الەۋمەتتىك جەلىلەردى پايدالانۋشىلاردىڭ اقپاراتتىق كەڭىستىكتەگى ءىس-ارەكەتتەرىن رەتتەۋگە جانە ءبىرىنشى كەزەكتە قوعامدىق قاۋىپسىزدىكتى قامتاماسىز ەتۋگە باعىتتالعان.

ەرەكشە كەزەڭدە ۇسىنىستار كۇشىندە بولادى جانە ونى تەك ەلدىڭ جوعارى باسشىلىعى ەنگىزە الاتىنىن ايتا كەتۋ كەرەك.

بەيبىت ۋاقىتتا كونستيتۋتسيانىڭ 20-بابىنا سايكەس سەنزۋراعا تىيىم سالىنادى، اركىمنىڭ زاڭدا تىيىم سالىنباعان كەز كەلگەن تاسىلمەن ەركىن اقپارات الۋعا جانە تاراتۋعا قۇقىعى بار.

سونىمەن قاتار، وسى باپتىڭ (ق ر كونستيتۋتسياسىنىڭ) 3-تارماعىنا سايكەس، مەملەكەتتىك كونستيتۋتسيالىق قۇرىلىستى كۇشتەپ وزگەرتۋدى، رەسپۋبليكانىڭ تۇتاستىعىن بۇزۋدى، مەملەكەت قاۋىپسىزدىگىنە نۇقسان كەلتىرۋدى، سوعىستى، الەۋمەتتىك، ناسىلدىك، ۇلتتىق، ءدىني، تەكتىك- توپتىق جانە رۋلىق باسىمدىقتى، سونداي-اق قاتىگەزدىك پەن زورلىق-زومبىلىققا تابىنۋدى ناسيحاتتاۋعا نەمەسە ۇگىتتەۋگە جول بەرىلمەيدى.

توتەنشە جانە اسكەري جاعداي رەجيمىن، سونداي-اق تەرروريزمگە قارسى وپەراتسيا رەجيمىن بۇزعانى ءۇشىن جاۋاپكەرشىلىك كوزدەلگەن.

الايدا، ق ر قارۋلى كۇشتەرىنىڭ، باسقا دا اسكەرلەر مەن اسكەري قۇرالىمداردىڭ بەدەلىن تۇسىرەتىن كورىنەۋ جالعان، انىق ەمەس جانە دەسترۋكتيۆتى اقپارات تاراتقانى ءۇشىن جاۋاپكەرشىلىك زاڭ جۇزىندە كوزدەلمەگەن.

ەرەكشە كەزەڭدە دەسترۋكتيۆتى اقپاراتتى، سونداي-اق اسكەري وپەراتسيانى جۇرگىزۋدىڭ ورنالاسۋى، تاكتيكاسى، نىساندارى، ادىستەرى، بولىمشەلەر قۇرامى، قارۋلى كۇشتەردىڭ جەكە قۇرامىن، قارۋ-جاراعى مەن اسكەري تەحنيكاسىن ىلگەرىلەتۋ تۋرالى مالىمەتتەردى تاراتۋ ازاماتتىق حالىققا جانە مەملەكەتتىڭ قاۋىپسىزدىگىنە ەلەۋلى زالال كەلتىرۋى مۇمكىن.

«سوڭعى جىلدارداعى وقيعالار كورسەتكەندەي، ءدال وسى ارەكەتتەردى ەرەكشە كەزەڭدە دەسترۋكتيۆتى كۇشتەر بەلسەندى قولدانادى. ق ر قورعانىس مينيسترلىگىنىڭ اقپاراتتىق جۇمىسى اشىقتىققا، جەدەلدىككە باعىتتالعان جانە «حالىق ۇنىنە قۇلاق اساتىن مەملەكەت» تۇجىرىمداماسىن قاتاڭ ۇستانادى. ءبىز ءارقاشان كەرى بايلانىس پەن ديالوگقا دايىنبىز» دەپ مالىمدەدى قورعانىس مينيسترلىگىنىڭ باسپا ءسوز قىزمەتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى