ايازعا ۇيرەنبەگەن تارازدىقتاردى ۇسىك شالىپ، دارىگەرگە جۇگىنىپ جاتىر
سينوپتيكتەردىڭ پىكىرىنشە، قىس ۋاقىتىندا وسى كەزەڭدە مۇنداي اياز بولماعان.
تارازدا ورتاشا جىلدىق تەمپەراتۋرا جەلتوقساننىڭ باسىندا جانە ورتاسىندا + 0 +8 گرادۋستان اسپايتىن.
جامبىل وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن حابارلاعانداي، مۇنداي ايازعا ۇيرەنبەگەن تارازدىقتاردى ۇسىك شالىپ، دارىگەرگە جۇگىنىپ جاتىر.
«وسى دەمالىستا وبلىس ورتالىعىنىڭ ەكى تۇرعىنى ۇسىك شالۋ بەلگىلەرىمەن جەدەل جاردەم شاقىرعان. 54 جاستاعى ەر ادام ۇزاق ۋاقىت دالادا جۇرگەن. زارداپ شەگۋشىنىڭ ايتۋىنشا، سودان كەيىن ۇيىندە قىزۋى كوتەرىلىپ، ساۋساقتارىن سەزبەي قالعان. سوسىن جەدەل جاردەم شاقىرعان. مەديتسينا قىزمەتكەرلەرى ونى ۇسىك شالعانىن انىقتاپ، كومەك كورسەتكەن. 49 جاستاعى تۇرعىن دا سۋىققا قاراماستان ۇزاق ۋاقىت كوشەدە تۇرىپ قالىپ ۇسىك شالعان. وعان قاجەتتى مەديتسينالىق كومەك كورسەتىلدى»، - دەدى ۆەدومستۆودان.
جامبىلدىق دارىگەرلەر قىسقى اۋا رايىنا بايلانىستى ايازدى كۇندەرى اباي بولۋعا شاقىرادى.
«ىشىمدىك ىشپەگەن دۇرىس، مۇمكىندىگىنشە تەمەكى شەكپەڭىزدەر. سونداي- اق كوفە كوپ ىشپەگەن ءجون، سەبەبى كوفەين تامىردى تارىلتىپ، اياق پەن قولداعى قان اينالىمىن باياۋلاتادى. ىڭعايلى، جىلى كيىم مەن اياق كيىم كيىڭىز. ەڭ جاقسى سىرت كيىم - جىلى، جەڭىل، قوزعالىسقا كەدەرگى كەلتىرمەيتىن، سۋ وتكىزبەيتىن كيىم. قاتتى ايازدا بىرنەشە قابات كيىم كيگەن دۇرىس، سەبەبى كيىم قاباتى اراسىندا جىلۋ ساقتالادى. بەتىڭىزدى جۇمساق شارفپەن وراپ الىپ، سونىمەن تىنىس الىڭىز»، - دەدى ۆەدومستۆو.
دارىگەرلەر اياق كيىمگە ەرەكشە ءمان بەرۋگە كەڭەس بەرەدى.
«اياق كيىم جىلى، ىڭعايلى، تابانى قالىڭ بولۋى كەرەك. قاتتى ايازدا بيىك وكشە كيمەگەن دۇرىس. تابانىڭىز تابيعي ەمەس قالىپتا تۇرسا قان اينالىمعا كەدەرگى كەلتىرەدى جانە ۇسىك قاۋپى ارتادى. كۇن سۋىقتا ءبىزدىڭ اعزامىزعا قوسىمشا «ەنەرگيا كوزى» قاجەت. ديەتانى كەيىنگە قالدىرىپ، دەنە بەلسەندىلىگىن ارتتىرعان ءجون. تەرىگە سۋ نەگىزىندەگى كرەمدەر جاقپاڭىز، سەبەبى مۇز كريستاللدارى پايدا بولىپ، جاسۋشانى زاقىمدايدى. وسى قاراپايىم ەرەجەلەر ۇسىك شالۋدان قورعايدى»، - دەپ اتاپ ءوتتى جامبىل وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن.
