سولتۇستىك قازاقستاندا تۇماۋ ءورشىدى

س ق و وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق سانيتاريالىق- ەپيدەميولوگيالىق باقىلاۋ دەپارتامەنتىنىڭ باسشىسى اسەت جۇماتايەۆ وڭىردەگى ەپيدەميولوگيالىق احۋالعا توقتالدى.

«ەپيدماۋسىم باستالعالى ءجىتى رەسپيراتورلىق ۆيرۋستىق ينفەكتسيالاردىڭ 17663 جاعدايى تىركەلدى، وتكەن جىلدىڭ سايكەس كەزەڭىمەن سالىستىرعاندا بۇل %33 كوپ. اۋىرعانداردىڭ باسىم بولىگى، %66 - 14 جاسقا دەيىنگى بالالار.

بۇدان بولەك بيىل تۇماۋدى جۇقتىرعاندار سانى دا ارتقان. 14-قازاننان وبلىستا تۇماۋ اۋرۋى تىركەلە باستادى. وبلىستا ۆ ءتيپتى تۇماۋدىڭ زەرتحانالىق راستالعان 215 جاعدايى جانە ا ءتيپتى تۇماۋدىڭ (H1N1) زەرتحانالىق راستالعان 1 جاعدايى تىركەلدى. بارلىق ادامدار تۇماۋعا قارسى ەكپە الماعان»، - دەيدى اسەت جۇماتايەۆ.

ماماننىڭ ايتۋىنشا، ناۋقاستاردىڭ 18 ءى جۇكتى ايەل، 73 ءى - 14 جاسقا دەيىنگى بالا، سونىڭ ىشىندە 7 ءى بالاباقشا تاربيەلەنۋشىسى، 50 ءى مەكتەپ وقۋشىسى جانە 23 ءى ۇيدە وتىرعان بالا.

سونداي- اق تۇماۋمەن اۋىرعانداردىڭ جارتىسىنا جۋىعى - وبلىس ورتالىعىنىڭ تۇرعىندارى.

«تۇماۋمەن ۆاكسينا سالدىرۋ ارقىلى كۇرەسۋگە بولادى. بۇگىنگى تاڭدا وبلىستا تاۋەكەل توبىنا جاتاتىن 75000 ادام: مەديتسينا قىزمەتكەرلەرى، مەديتسينالىق ۇيىمدا ەسەپتە تۇرعان بالالار، بالالار ۇيلەرىنىڭ، تاربيەلەنۋشىلەرى، قارتتار ۇيلەرىنىڭ كونتينگەنتى، ەپيدەميولوگيالىق كورسەتكىشتەر بويىنشا 2-3 تريمەستردەگى جۇكتى ايەلدەر، سوزىلمالى اۋرۋلارى بار ادامدار، 65 جاستان اسقان ادامدار بار. ولار ەكپە الدى.

تۇماۋعا قارسى ۆاكسيناتسيادان باسقا، بەيسپەتسيفيكالىق پروفيلاكتيكانى نازاردان تىس قالدىرماۋ كەرەك: بەتپەردە كيۋ، الەۋمەتتىك قاشىقتىقتى ساقتاۋ، مۇمكىندىگىنشە ادام كوپ جينالاتىن ورىندارعا بارماۋ، جەكە گيگيەنا ەرەجەلەرىن ساقتاۋ قاجەت. سونىمەن قاتار، يممۋنيتەتتى بارلىق قولدا بار قۇرالدارمەن كوتەرۋ كەرەك»، - دەيدى دەپارتامەنت باسشىسى.

ال اۋىرعان جاعدايدا ينفەكسيانىڭ ودان ءارى تارالۋىن بولدىرماۋ ءۇشىن دارىگەرگە قوڭىراۋ شالىپ ۇيدە بولۋ قاجەت.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى