قازاقستاندا جاڭاجىلدىق كورپوراتيۆتىك كەشتى ۇيىمداستىرۋ قانشا تۇرادى
الايدا، سالتاناتتى كەشتىڭ ويداعىداي ءوتۋى ءۇشىن كومپانيالار قوماقتى سوما ءبولۋى كەرەك. قازاقپارات تىلشىلەرى قازاقستاندا كورپوراتيۆتىك كەش ورتاشا ەسەپپەن قانشاعا شىعاتىنىن انىقتاپ كوردى.
كوپتەگەن قالالاردا جاڭاجىلدىق كەشتەردى نەگىزىنەن يۆەنت-اگەنتتىكتەر ۇيىمداستىرادى. ولاردىڭ قىزمەتى ءبىر ميلليون تەڭگەدەن باستالادى. وعان مەيرامحانا نەمەسە بانكەت زالىن تاڭداۋ، جۇرگىزۋشى، ديدجەي، قۇرال- جابدىقتار مەن ءىس-شارانىڭ جەكە سەناريى كىرەدى.
«كورپوراتيۆتىك كەشتەردىڭ باعاسى ءار ءتۇرلى پارامەترلەرگە بايلانىستى. بىرىنشىدەن، بۇل ادامدار سانى، ەكىنشىدەن، كۇن - بۇل جەردە ول وتە ماڭىزدى ءرول اتقارادى، ويتكەنى مەرەكە كۇندەرى جۇكتەمە مەن جاۋاپكەرشىلىك كوپ بولادى، سايكەسىنشە تولەم ازداپ كوتەرىلەدى. ۇشىنشىدەن، بۇل بيۋدجەت. مىسالى، كليەنت بىزگە ءوز بيۋدجەتىن بەرەدى، ءبىز سوعان سايكەس قىزمەتتەرىمىزدى ۇسىنامىز. مۇندا باعا ءارتۇرلى، 500 مىڭنان 5 ميلليون تەڭگەگە دەيىن جانە ودان دا جوعارى. مەرەكەنىڭ فورماتى دا اۋقىمدى - بىرەۋ كەشتى كەڭسەدە ۇيىمداستىرعاندى ءجون كورسە، ەندى ءبىرى مەيرامحانا تاڭدايدى»، - دەيدى مەرەكە ۇيىمداستىرۋشى ءۇمىت.
جاڭا جىل قارساڭى - مەيرامحانا مەن كافە يەلەرى ءۇشىن دە ناعىز قىزعان شاق. مەيرامحانالار دايىندىقتى جەلتوقسان ايىنىڭ باسىندا-اق باستاپ كەتتى. بۇگىنگى كۇنى ولار جاڭاجىلدىق كورپوراتيۆتەرگە تاپسىرىس قابىلداپ جاتىر. الماتى مەيرامحانالارىندا جاڭاجىلدىق كورپوراتيۆتەر ورتا ەسەپپەن ادام باسىنا 11 مىڭ تەڭگەدەن 40 مىڭعا دەيىن بارادى.
وڭتۇستىك استاناداعى مەيرامحانالار جاڭا جىلعا دايىندىقتى باستاپ كەتتى. ءتىپتى، كورپوراتيۆتى كەش وتكىزۋگە دايىن ەكەندەرىن ايتىپ، الەۋمەتتىك جەلىلەر دە تالاسا جارنامالاپ جاتىر. ادەتتە، جاڭاجىلدىق كورپوراتيۆتەر 25 جەلتوقساننان باستالادى.
سولاردىڭ ءبىرقاتارىنا ءبىز دە حابارلاسىپ كوردىك.
قالانىڭ جوعارعى جاعىندا ورنالاسقان مەيرامحانالاردا جاڭاجىلدىق كورپوراتيۆتىك مەرەكە ادام باسىنا 40 مىڭنان كەلەدى. ول باعاعا سالاتتار، باسىتقىلار، 2 ىستىق تاعام، ىشىمدىكتەر، گازدالعان جانە گازدالماعان سۋسىن، تاتتىلەر، جەمىستەر كىرەدى. سونىمەن قاتار، اقشاقار مەن اياز اتا، اسابا مەن مۋزىكانتتار بار. ولار كونكۋرستار مەن ءتۇرلى سىيلىقتار وينالاتىن لوتەرەيالار وتكىزەدى.
الماتىنىڭ ورتالىعىندا ورنالاسقان مەيرامحانالاردا جاڭاجىلدىق كورپوراتيۆتەر ادام باسىنا 17-20 مىڭ تەڭگە ارالىعىندا. داستارحان مازىرىندە 4 ءتۇرلى باسىتقى، 3 ءتۇرلى سالات، 2 ىستىق تاعام، شاي، نان مەن سامسا، تاتتىلەر بار. شوۋ-باعدارلاما دا قاراستىرعان.
ءداستۇرلى تۇردە ارزانداۋ دەپ ەسەپتەلەتىن قالانىڭ تومەنگى جاعىنداعى مەكەمەلەرگە كەلسەك، وندا وتىرىس ادام باسىنا 11 مىڭ تەڭگەدەن 15 مىڭعا دەيىن بارادى. مازىردە 2 ىستىق تاماق، 3-4 سالات، تىسكە باسار، نان، باۋىرساق بار. سپيرتتىك ىشىمدىك پەن جەمىستەردى جانە ءتاتتى تاعامداردى وزىمەن الىپ كەلۋگە رۇقسات ەتىلەدى. ودان باسقا مۇندا شوۋ- باعدارلاما مەن مۋزىكالىق كوركەمدەۋ قاراستىرىلعان.
قازاقستاننىڭ باسقا ايماقتارىنا كەلەتىن بولساق، شاعىن قالالاردا ورنالاسقان مەيرامحانالاردىڭ باعاسى الدەقايدا تومەن، مىسالى، ورال مەن پەتروپاۆلدا ادام باسىنا 10-15 مىڭ تەڭگە ارالىعىندا، ال استانادا كافە، مەيرامحانا، كاراوكە باعاسى 15مىڭنان 27 مىڭ تەڭگەگە دەيىن. ەلدەگى ءۇشىنشى مەگاپوليس - شىمكەنت قالاسىندا ادام باسىنا ورتا ەسەپپەن18 مىڭ تەڭگەدەن شىعادى. بارلىق جەردە باعاعا شوۋ-باعدارلاما، جۇرگىزۋشىلەر، مۋزىكانتتار جانە مەرەكەلىك اس ءمازىرى كىرەدى: الكوگولدى سۋسىنداردى قوسپاعاندا، ىستىق تاعامدار، سالاتتار، جەڭىل تاعامدار، جەمىستەر بار.
كەيبىر ءىرى كومپانيالار قىزمەتكەرلەرىنىڭ كوڭىلىن كوتەرۋ ءۇشىن مۋزىكانتتار مەن ارتيستەردى شاقىرادى. كەشتى جۇرگىزۋگە شوۋ-بيزنەس سالاسىنىڭ تانىمال جۇلدىزىن دا شاقىرۋى مۇمكىن. كەشتىڭ شىرايىن كىرگىزىپ، ءسانىن كەلتىرەتىن ارتيستەر سىباعاسىنا قىرۋار اقشا سۇرايدى.
تىلشىلەرىمىز كوپتەگەن جۇلدىزداردىڭ كونتسەرت ديرەكتورلارىنا حابارلاسىپ، ولاردىڭ باعاسىن ءبىلدى. بەلگىلى بولعانداي، كوپتەگەن انشىلەر جاڭاجىلدىق كەشتەرگە تاپسىرىس الىپ قويعان ەكەن. وتاندىق جۇلدىزدار ءبىر كەشتە 7- 8 ءان ايتادى. ونىڭ قۇنى 1 ميلليون تەڭگەدەن باستالادى.
مىسالى، ەركە ەسماحان ەلىمىزدىڭ باسقا قالالارىندا وتەتىن سالتاناتتى شاراعا 3-4 ميلليون تەڭگە سۇرايدى. ەگەر الماتى قالاسىندا بولسا، وندا سوما ءبىرشاما تومەن. ياعني، 2 ميلليون تەڭگەگە 7-8 ءان ايتادى.
لۋينا 1,2 ميلليون تەڭگەگە كەشىڭىز كەرەمەت قىپ وتكىزىپ بەرمەك.
جاستاردىڭ سۇيىكتى ءانشىسى نۇربولات قانايدىڭ 40 مينۋت ءان سالعانى 2 ميلليون ەكەن.
داستان ورازبەكوۆ ءبىر كەشتەن 1,5 ميلليون تەڭگە الادى.
ايدانا مەدەنوۆا 1 ميلليون تەڭگەگە قوناقتارىڭىزدىڭ كوڭىلىن كوتەرۋگە ءازىر.
ايتا كەتەيىك، جوعارىدا اتالعان انشىلەردىڭ باسىم بولىگى اقشالارىنىڭ 50 پايىزىن الىپ تا قويعان.
قازاقستاندا جاڭاجىلدىق كورپوراتيۆتىك كەشتەرگە رەسەيلىك جۇلدىزداردى دا شاقىراتىن كومپانيالار بار. ماسەلەن، رەسەيلىك تەلەارنالاردىڭ ءبىرىنىڭ مالىمەتىنشە، فيليپپ كيركوروۆتىڭ جاڭا جىل تۇنىندەگى ونەرى 300 مىڭ دوللار (140 ميلليون تەڭگە)، ال ديما بيلان 37 ميلليون تەڭگەگە ءان سالىپ بەرۋگە ءازىر. Niletto مەن Zivert تە وسى سوماعا كەلىسەدى. ال كلاۆا كوكا ءوز ونەرىن 45 ميلليون تەڭگەگە باعالاپ وتىر.
