استانادا «بەيبىتشىلىك اعاشى» ينستاللياتسياسى اشىلدى
ەلوردادا بوي كوتەرگەن ونەر تۋىندىسىنا الەمدىك جانە ءداستۇرلى دىندەر ليدەرلەرىنىڭ ىزگى تىلەكتەرى مەن جولداۋلارى جازىلعان.
ءوز سوزىندە ماۋلەن اشىمبايەۆ سەزد ءدىنارالىق ديالوگتى جالعاستىرۋعا ەلەۋلى ۇلەس قوساتىنىن جانە رۋحاني قۇندىلىقتاردى، ديالوگ پەن ءوزارا قۇرمەت مادەنيەتىن ىلگەرىلەتۋ ىسىندەگى ماڭىزدى باستاما ەكەنىن ايتتى.
«الەمدىك جانە ءداستۇرلى دىندەر ليدەرلەرىنىڭ VII سەزى دەڭگەيى مەن قاتىسۋشىلاردىڭ سانى جاعىنان دا، بۇگىنگىدەي الەمدىك قوعامداستىق ءۇشىن كۇردەلى كەزەڭدە قارالعان ماسەلەلەردىڭ ماڭىزى جاعىنان دا تاريحي ءارى بىرەگەي وقيعا بولدى. ريم پاپاسى فرانتسيسك، ءال-ازحاردىڭ جوعارعى يمامى احمەد ات-تايەب جانە باسقا دا الەمدىك ءدىن ليدەرلەرى قازىرگى الەمنىڭ دامۋىنا، ديالوگ، ءوزارا قۇرمەت، بەيبىتسۇيگىشتىك مادەنيەتىن ىلگەرىلەتۋگە قاتىستى وزەكتى ماسەلەلەردى كوتەردى. ونىڭ ءبارى فورۋمنىڭ قورىتىندى دەكلاراتسياسىنا ەنگىزىلدى. وسىنداي تاريحي وقيعادان جاسامپاز ەستەلىك رەتىندە ءبىز ەكى شىعارماشىلىق جوبانى قولعا العان ەدىك. ونىڭ ءبىرى استاناداعى زاماناۋي جانە كوپبەيىندى بەيبىتشىلىك جانە كەلىسىم ساياباعى. ەكىنشى - الەمدىك ءدىن ليدەرلەرىنىڭ ىزگى تىلەكتەرى جازىلعان «بەيبىتشىلىك اعاشى» اتتى ينستاللياتسيا»، - دەدى ماۋلەن اشىمبايەۆ.
سونداي-اق سەنات ءتوراعاسى بيىل قىركۇيەك ايىندا استانادا وتكەن الەمدىك جانە ءداستۇرلى دىندەر ليدەرلەرىنىڭ VII سەزىنە الەمنىڭ 50 گە جۋىق ەلىنەن 100 دەن استام دەلەگات قاتىسقانىن اتاپ ءوتتى. ولاردىڭ قاتارىندا يسلام، حريستيان، يۋدايزم، يندۋيزم، سينتويزم، داوسيزم، بۋدديزم، باحايزم جانە دجاينيزم دىندەرىنىڭ وكىلدەرى بار.
«بەيبىتشىلىك اعاشى» ينتەراكتيۆتى ونەر ينستاللياتسياسى سەزد يدەولوگياسىنا تابان تىرەيتىن الەۋمەتتىك-فيلوسوفيالىق قاعيداتتاردىڭ ءبىرى - الەمدىك جانە ءداستۇرلى دىندەر ارقىلى جالپىادامزاتتىق ورتاق قۇندىلىقتى ىزدەۋدى سيپاتتايدى. جاڭا تۋىندىعا VII سەزگە قاتىسۋشىلاردىڭ ءوز قولدارىمەن جازىلعان ماتىندەرى قوسىلعان. جوبانىڭ اۆتورى - بەلگىلى سۋرەتشى لەيلا ماحات.
ايتا كەتەيىك، ءىس-شاراعا پارلامەنت دەپۋتاتتارى، قازاقستانداعى ءبىرقاتار شەتەلدىك ديپلوماتيالىق ميسسيالاردىڭ باسشىلارى، جوعارى وقۋ ورىندارىنىڭ، ءدىني جانە قوعامدىق بىرلەستىكتەردىڭ وكىلدەرى قاتىستى.
