وقۋ-اعارتۋ مينيسترلىگى مەكتەپ دەمالىسىنىڭ قىسقارۋى تۋرالى قاۋەسەتكە پىكىر ءبىلدىردى

وقۋ-اعارتۋ ءمينيسترلى بۇل اقپاراتتى جوققا شىعاردى، دەپ حابارلايدى قازاقپارات.

قازاقستاندىقتار الەۋمەتتىك جەلىلەر مەن مەسسەندجەرلەردە قازىرگى كەزدە قارالىپ جاتقان جاڭا نورماتيۆتىك-قۇقىقتىق اكتىگە سايكەس، قازاقستاندا وقۋ جىلى رەسمي تۇردە 20- تامىزدا باستالادى دەپ جازۋدا.

«مەملەكەتتىك مەكتەپتەردە دەمالىس، سونداي-اق وقۋ جىلىنىڭ باستالۋ جانە اياقتالۋ مەرزىمدەرى وزگەرمەيدى. كانيكۋل كەزەڭى وزگەرىسسىز قالادى، ياعني وقۋ كۇندەرىنىڭ سانى كوبەيمەيدى، ال كانيكۋل كەزەڭى ازايمايدى. قازاقستاندىق وقۋشىلار 175 كۇن وقيدى. كانيكۋلدار مەن دەمالىس كۇندەرىنىڭ جالپى ۇزاقتىعى 190 كۇندى قۇرايدى (كىبىسە جىلدى قوسپاعاندا). تالقىلانىپ جاتقان قۇجاتتىڭ جوباسى قامقورشىلىق كەڭەستەردىڭ كەلىسىمىمەن حالىقارالىق جانە پيلوتتىق مەكتەپتەرگە وقۋ جىلىنىڭ جالپى مەرزىمدەرىن رەتتەۋگە قۇقىق بەرەدى»، - دەپ جازدى ۆەدومستۆودان.

مينيسترلىكتىڭ مالىمەتىنە قاراعاندا، بۇعان دەيىن اتالعان مەكتەپتەردىڭ وكىلدەرى وقۋ مەرزىمى مەن كانيكۋل كەزەڭىن ءوز بەتىنشە انىقتاۋعا مۇمكىندىك بەرۋدى قولداعان بولاتىن. بۇل رەتتە حالىقارالىق جانە پيلوتتىق مەكتەپتەر (ولاردىڭ سانى وتە از) بەلگىلەنگەن وقۋ جانە كانيكۋل كۇندەرىمەن (175 وقۋ جانە 190 دەمالىس كۇندەرى) شەكتەلەدى.

«ياعني، كانيكۋلدى قىسقارتۋ تۋرالى ماسەلە قارالىپ جاتقان جوق. مەملەكەتتىك مەكتەپتەر ءۇشىن وقۋ جانە كانيكۋل مەرزىمدەرى بەكىتىلگەن نورمالار شەڭبەرىندە ارەكەت ەتەتىنىن اتاپ وتكەن ءجون. بيىلعى وقۋ جىلى 1- قىركۇيەكتە باستالىپ، 31- مامىردا اياقتالادى، سودان كەيىن كانيكۋل باستالادى»، - دەلىنگەن وقۋ-اعارتۋ مينيسترلىگىنىڭ حابارلاماسىندا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى