جامبىل وبلىسىندا ەكى ازاماتتان جارتى تونناعا جۋىق ەسىرتكى تاركىلەندى

8- جەلتوقساندا ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ بارىسىندا تۇرار رىسقۇلوۆ اۋدانىنىڭ قىزىلشارۋا اۋىلىنان 60 شاقىرىم قاشىقتىقتاعى قۇمدى اۋماقتا 47 جاستاعى جۇرگىزۋشىنىڭ باسقارۋىنداعى ۆاز-2121 اۆتوكولىگىن توقتاتتى. اۆتوكولىكتى تەكسەرۋ كەزىندە جۇك سالعىشتان ەكى قاپشىق گاشيش ەسىرتكى زاتى تابىلدى.

ودان بولەك، سول ورىننان 2 شاقىرىم قاشىقتىق جەردە تسەللوفاننان ەكى كۇركەشە جاساپ، 36 قاپ ماريحۋانا مەن 1 قاپ گاشيش ەسىرتكى زاتتارىن جيناپ قويعانى انىقتالدى. سونداي-اق، ەسىرتكى قۇرالدارىن يلەيتىن ەكى ەلەك تابىلدى.

تاركىلەنگەن ەسىرتكى زاتتارىنىڭ جالپى سالماعى 472 كەلىدەن استى، ونىڭ ىشىندە 369 كەلى 588 گرام كەپتىرىلگەن ماريحۋانا جانە 102 كەلى 760 گرام گاشيش بولىپ شىقتى.

«قازىرگى ۋاقىتتا اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 296-بابى 4-بولىگىمەن (ەسىرتكى، پسيحوتروپتىق زاتتارمەن، سول تەكتەستەرمەن وتكىزۋ ماقساتىنسىز زاڭسىز جۇمىس ىستەۋ) بويىنشا سوتقا دەيىنگى تەرگەپ-تەكسەرۋ امالدارى باستالدى. ۇستالعان 47 جانە 30 جاستاعى كۇدىكتىلەر ءوز كىنالارىن تولىق مويىنداپ، ۋاقىتشا ۇستاۋ يزولياتورىنا قاماۋعا الىندى»، - دەپ حابارلادى جامبىل وبلىسىنىڭ پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى ءالىم باجىقبايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى