اباي وبلىسىندا «ۇكىلى دومبىرا» بايقاۋىنىڭ جەڭىمپازدارى بەلگىلى بولدى

ونەر سايىسىنا ايماقتىڭ ءتورت اۋدانىنان 30 عا جۋىق وقۋشى قاتىسىپ، شەرتپە كۇي شەرتىپ، ءداستۇرلى ءاندى دارىپتەدى. شارا وسى وڭىردە تۇڭعىش رەت دومبىرا وركەسترىن قۇرىپ، ساز مەكتەبىن اشقان كۇيشى، ۇستاز نۇرلان قوجىقوۆتى ەسكە الۋ ماقساتىندا وتكىزىلدى. بايقاۋ قورىتىندىسىنا ساي دومبىرا شەرتۋدەن نۇرىم باقىتوۆ پەن بالنۇر اندراش، ءان شىرقاۋدان نۇراي تۇرسىن باس جۇلدەنى يەلەندى. ۇزدىك ونەر كورسەتكەن وقۋشىلار «شەبەر ورىنداۋشى»، «ۇزدىك دومبىراشى»، «شەرتپە كۇي شەبەرى»، «كورەرمەندەر كوزايىمى» اتالىمدارى بويىنشا ماراپاتتالدى.

ونەرپاز ۇرپاقتارىنىڭ دەمەۋشىلىگىمەن العاش رەت جاس كۇيشىلەردىڭ باسىن قوسقان سايىس الداعى ۋاقىتتا جالعاسىن تابادى.

نۇرىم باقىتوۆ، باس جۇلدە يەگەرى:

- مەنى كۇيگە اتام اكەلگەن بولاتىن. دومبىراعا قاتىسقالى 5 جىل بولدى. قۇرمانعازىنىڭ «بالبىراۋىن»، دينا نۇرپەيىسوۆانىڭ «ناۋىسقى»، داۋلەتكەرەيدىڭ «كورۇعلى»، زايساندا تۇراتىن كالەك دەگەن كىسىنىڭ «ارمان» دەگەن كۇيى بار. سول كۇيدى ورىندادىم.

شالقار رىسحانوۆ، كۇيشى، قازىلار القاسىنىڭ ءتوراعاسى:

- قۋانتارلىعى، بايقاۋ جوعارى دەڭگەيدە ءوتتى. ەرەكشە اتاپ وتەرلىگى، ايماعىمىزعا ءتان شەرتپە كۇيلەر ورىندالدى. بۇل كوڭىل قۋانتارلىق ءجايت. بالالاردىڭ ىنتا- ىقىلاسى جوعارى بولدى. ولاي دەيتىنىمىز، بايجىگىتتەن باستاپ، بەيسەنبى، قايراقباي، بەرگىدەگى قازەن ءابۋعازى اتامىزدىڭ كۇيلەرىن ءبىر- بىرىنەن اسىرا ورىندادى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى