پرەمەر-مينيستر كىمدەردىڭ جالاقىسى كوتەرىلگەنىن ايتتى
جيىن بارىسىندا پرەمەر-مينيستر ءاليحان سمايىلوۆ تا ەسەپ بەردى.
مەملەكەت ازاماتتاردىڭ تابىسىن ارتتىرۋ بويىنشا مىناداي شارالار قابىلداعان:
- نەسيەگە قولجەتىمدىلىكتى كەڭەيتۋ ەسەبىنەن اۋىل حالقىنىڭ تابىسىن ارتتىرۋ جونىندەگى جوبانى ىسكە اسىرۋ باستالدى. وعان كەلەسى جىلعا 70 ميلليارد تەڭگە ءبولۋ كوزدەلگەن.
- 5 جىل ىشىندە وسى جوباعا 1 ميلليوننان اسا اۋىل تۇرعىنىن قامتىپ، 1 تريلليون تەڭگە باعىتتاۋ جوسپارلانىپ وتىر.
- وسى جۇمىس اياسىندا بارلىق جەكە ءۇي شارۋاشىلىعىنىڭ جارتىسىن كووپەراتيۆ كاسىپكەرلىككە تارتۋ جوسپارلانىپ وتىر. سونداي-اق، 350 مىڭنان اسا جاڭا جۇمىس ورنى قۇرىلادى دەپ كۇتىلىپ وتىر.
سونىمەن قاتار، ءاليحان سمايىلوۆ قازىر حالىقتىڭ تابىسىن ارتتىرۋدىڭ 2025 -جىلعا دەيىنگى باعدارلاماسى ودان ءارى ىسكە اسىرىلىپ جاتقانىن اتاپ ءوتتى. ونىڭ شەڭبەرىندە 3 ميلليوننان اسا ادامنىڭ جالاقىسى وسكەن. دارىگەرلەردىڭ جالاقىسى 30 پايىزعا دەيىن، مۇعالىمدەردىڭ جالاقىسى 25 پايىزعا، بيۋدجەت سفەراسىنىڭ باسقا قىزمەتكەرلەرىنىڭ جالاقىسى 20 پايىزعا، وندىرىستىك قىزمەتكەرلەر جالاقىسى 10-50 پايىز ارالىعىندا كوتەرىلگەن.
«باعدارلاما اياسىندا بيىل 11 ايدا 563 مىڭ جاڭا جۇمىس ورنى قۇرىلدى، بۇل جوسپارلانعان كورسەتكىشتەن 27 پايىزعا جوعارى. بۇدان بولەك، ۇكىمەت ازاماتتاردى جۇمىسپەن قامتۋ بويىنشا ءىس-شارالاردى بەلسەندى ىسكە اسىرىپ جاتىر. بيىل 830 مىڭنان اسا ادام جۇمىسقا ورنالاستى، سونىڭ ىشىندە 233 مىڭى - جاستار»، - دەدى سمايىلوۆ.
