كاسكادەر ەربول سەمقۇلوۆ باكۋدە قازاقستاندىق «العا» فيلمىن ۇسىندى

10-11- جەلتوقسان كۇندەرى باكۋ تۇرعىندارى «نيزامي» كينوتەاترىندا قالىڭ كوپشىلىككە ۇسىنىلعان قازاقستاندىق ەكى فيلمدى تاماشالادى. قازاقستاندىق تۋىندىنى كورۋگە كەلگەندەر ءىس- شارانى ۇيىمداستىرۋشىلارمەن جانە اكتەرلارمەن تىلدەسۋ مۇمكىندىگىنە يە بولدى.

قازاقستاندىق كينو كۇندەرىنىڭ اشىلۋ راسىمىندە ق ر ەلشىسى سەرجان ابدىكارىموۆ سوڭعى جىلدارى ەلىمىزدىڭ كينويندۋستريانى دامىتۋعا زور كۇش سالىپ جاتقاندىعىن اتاپ ءوتتى.

ديپلومات قازاقستاننىڭ ازەربايجانداعى كۇندەرى اياسىندا ەلىمىزدىڭ فيلمدەرىنىڭ كورسەتىلۋى باۋىرلاس ەلدەر اراسىنداعى بايلانىستى نىعايتاتىنىنا سەنىم ءبىلدىردى.

قازاقستاندىق كينو كۇندەرىنىڭ العاشقى كۇنىندە يۆان ارداشوۆتىڭ «كەنجە قىز» فيلمى باكۋ تۇرعىندارىنىڭ ىقىلاسىنا بولەندى.

مۋلتيپليكاتسيالىق تۋىندىدا كەزدەيسوق قيال الەمىنەن تابىلعان كىشكەنتاي قىزدىڭ ۇيىنە ورالۋ ءۇشىن زۇلىمدىقپەن قالاي كۇرەسكەنى باياندالادى.

يۆان ارداشيەۆتىڭ سوزىنشە، فەستيۆالدى ۇيىمداستىرۋشىلار باكۋگە ەكى ەل اراسىندا شىعارماشىلىق جانە ديپلوماتيالىق قارىم- قاتىناستار قالىپتاستىرۋ ءۇشىن كەلگەن.

«كينو مەن انيماتسيا سالاسىندا بىزگە ۇقساس، ورتاق قۇندىلىقتار كوپ جانە ولاردى ناسيحاتتاي بەرگەن ءجون. سونداي- اق ايىرماشىلىقتار دا بار، ولاردى اسىرەسە ەكى ۇلتتىڭ تىلىندە اڭگىمەلەسكەندە ەرەكشە قىزىق بولىپ شىعادى. ءبىز وسىنداي قۇندىلىقتار ارقىلى ەكى ەلدىڭ بايلانىستارى مەن قارىم- قاتىناسىن ودان ءارى نىعايتىپ، بىرلەسكەن ونىمدەر شىعارۋعا بولاتىنىن كورسەتۋ ءۇشىن كەلدىك»، - دەدى جاس رەجيسسەر.

ول وسى ۋاقىتقا دەيىن 5 قىسقامەتراجدى فيلم مەن 1 سەريال تۇسىرگەنىن، الداعى ۋاقىتتا كومانداسى «قورقىت اتا» اتتى تولىققاندى جاڭا انيماتسيالىق فيلمنىڭ جوباسىمەن اينالىسىپ جاتقانىن اتاپ ءوتتى.

ەكىنشى كۇنى كينوسۇيەر قاۋىم «العا» فيلمىنىڭ درامالىق سيۋجەتىن تاماشالادى. باس رولدەردى اكتەرلەر، Nomad Stunts كاسىبي كاسكادەرلارى جاندوس ايباسوۆ پەن ەربول سەمقۇلوۆ وينايدى.

فيلمدە وزدەرىنىڭ ءومىرىن سپورتپەن بايلانىستىرىپ، كەنەتتەن تاعدىردىڭ جازۋىمەن ءىستى بولىپ كەتە جازداعان قاراپايىم ەكى اۋىل بالاسىنىڭ ءومىرى باياندالادى.

ەربولدىڭ سوزىنشە، فيلم اۆتورلارى جاستارعا شىن نيەت بولسا ويلاعانىڭا جەتۋگە بولاتىنىن، ەڭ قيىن دەگەن ارماننىڭ ءوزى ورىندالاتىنىن ۇعىندىرۋ بولدى.

جاس كاسكادەر فيلمدى ءتۇسىرۋ كەزىندە دەنە كۇشىمەن كوپ جۇمىس ىستەۋ قاجەت بولعانىن اتاپ ءوتتى.

«بىزگە جاقسى دۋبل ءتۇسىرۋ ءۇشىن ءبىر ارەكەتتى بىرنەشە رەت قايتالاپ جۇگىرۋ قاجەت بولدى. ال مەنىڭ باسەكەلەسىم نيگەريالىق كاسىبي فۋتبولشى. سوعان قاراماستان ءبىز قيىندىقتى ەڭسەردىك. بۇعان جاندوس ەكەۋمىزدىڭ ءوزارا جاقسى قارىم- قاتىناسىمىز ىقپال ەتتى دەپ ويلايمىن. ءبىز Nomad Stunts-تە 15 -جىلدان بەرى كاسكادەر بولىپ جۇمىس ىستەپ كەلەمىز»، - دەدى ەربول.

سونداي- اق ول سوزىندە بۇرىن كاسىپقوي بوكسپەن اينالىسىپ، ق ر قۇراماسىندا فۋتبول ويناعانىن اتاپ ءوتتى.

قازاقستاننىڭ كينو كۇندەرى قر مادەنيەت مينيسترلىگىنىڭ، Kazakhcinema مەملەكەتتىك قازاق كينوسىن قولداۋ ورتالىعى مەن قازاقستاننىڭ باكۋدەگى ەلشىلىگىنىڭ قولداۋىمەن «نيزامي» كينوتەاترىندا اشىلدى.

اۆتور

ايدار وسپاناليەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى