ءاليحان سمايىلوۆ ءبىر اي ىشىندە «قولجەتىمدى ينتەرنەت» ۇلتتىق جوباسىن پىسىقتاۋدى تاپسىردى
سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قالالار مەن اۋىلداردى جوعارى جىلدامدىقتى ينتەرنەتكە قوسۋ، رەسپۋبليكالىق جانە ءبىرىنشى دارەجەدەگى وبلىستىق جولدار بويىندا تالشىقتى-وپتيكالىق بايلانىس جەلىلەرىن تارتۋ/توسەۋ/مونتاجداۋ، سونداي-اق 5G جەلىلەرىن ەنگىزۋ بويىنشا كەڭ اۋقىمدى جۇمىستار قاراستىرىلعان 2023-2027-جىلدارعا ارنالعان «قولجەتىمدى ينتەرنەت» ۇلتتىق جوباسىن ازىرلەۋ بارىسى تۋرالى باياندادى.
سونداي-اق سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى مەملەكەت باسشىسىنىڭ مەملەكەتتىك اپپاراتتىڭ قىزمەتىن بيۋروكراتيادان ارىلتۋ جانە مەملەكەتتىك ستاتيستيكانى جۇرگىزۋ مەن مەملەكەتتىك قىزمەتتەر كورسەتۋدىڭ دالدىگىن ارتتىرۋعا مۇمكىندىك بەرەتىن سيفرلىق ستاتيستيكالىق تىركەلىمدەردى ەنگىزۋ جونىندەگى تاپسىرماسى شەڭبەرىندە مەملەكەتتىك ورگانداردىڭ دەرەكتەرىن سيفرلاندىرۋ بارىسى تۋرالى ايتىپ بەردى.
ءاليحان سمايىلوۆ ءبىر اي مەرزىمدە «قولجەتىمدى ينتەرنەت» ۇلتتىق جوباسىن پىسىقتاپ، ونى باسقا مەملەكەتتىك ورگاندارمەن كەلىسۋدى تاپسىردى، سونداي-اق دەرەكتەر بازاسىن جاڭعىرتۋ كەزىندە اقپاراتتى %100 قورعاۋدى قامتاماسىز ەتۋ قاجەتتىگىن اتاپ ءوتتى.
