نەلىكتەن ۇيىقتاپ جاتقاندا اۋىزدان سىلەكەي اعادى؟
ارينە، بۇل سونشالىقتى جاعىمسىز جاعداي ەمەس، ءبىراق ونىڭ مۇمكىن سەبەپتەرىن بىلگەن ارتىق ەتپەيدى.
ونىڭ سەبەبى جاقتىڭ ەرەكشە قۇرىلىسىندا بولۋى مۇمكىن: ول تۇندە ادام ءبىر قىرىمەن جاتقاندا قاتتى بوساڭسيدى، سوندىقتان سىلەكەي ەش كەدەرگىسىز سىرتقا شىعىپ كەتەدى. بۇل جاعدايدا شالقامەن جاتىپ ۇيىقتاپ ۇيرەنۋ جەتكىلىكتى.
ەرەسەك ادامنىڭ تۇندە اۋزىنان سىلەكەي اعۋىنا قانداي فاكتورلار اسەر ەتەدى؟
1. مۇرىن قۋىسى پروبلەمالارى. مۇرىن شىرىشتىسىنداعى قابىنۋ پروتسەستەرىن ەلەمەي قويۋعا بولمايدى. شىرىشتى قابىق ءبىراز ماڭىزدى قىزمەتتەردى اتقارادى. ادامدا مۇرىن قۋىسى پروبلەماسى بولسا، تىنىس الۋ پروتسەسى قيىنداپ، ول ۇيىقتاعاندا اۋزىن ءسال اشىپ جاتادى. سونىڭ سەبەبىنەن سىلەكەي اعادى؛
2. كەڭسىرىكتىڭ قيسايۋى. بۇل دا تىنىس الۋدى قيىنداتىپ، اۋىزدى اشىپ ۇيىقتاۋعا اكەلەدى؛
اۋىز قۋىسىنداعى ينفەكتسيالىق پروتسەسس. ءتىس نەمەسە ءتىس ەتى اۋرۋلارى تۇندە اۋىزدان سىلەكەي اعۋىن ىنتالاندىرۋى مۇمكىن؛
3. اسقازان-ىشەك جولى جۇمىسىنىڭ بۇزىلۋى. اسقازانداعى قابىنۋ پروتسەستەرى كەزىندە قىشقىلدىق ارتادى، ال ول سىلەكەيدىڭ كوپ بولىنۋىنە اكەلەدى؛
4. اعزاداعى ىشەك قۇرتى جانە باسقا دا پارازايتتەر؛
5. جۇيكە جۇيەسى جۇمىسىنىڭ بۇزىلۋى، اعزاعا كۇش تۇسىرەتىن دارىلىك قۇرالدار ءىشۋ؛
6. اۋىز قۋىسىندا باسقا زاتتىڭ بولۋى. مىسالى: برەكەت، ءتىس پروتەزى. ولار سىلەكەيدىڭ كوپ بولىنۋىنە اسەر ەتۋى مۇمكىن؛
7. سىلەكەي بەزدەرىنىڭ قابىنۋى؛
8. پاركينسون اۋرۋى.
بالالاردا تۇندە سىلەكەي اعۋىنىڭ سەبەپتەرى:
پسيحولوگيالىق اۋرۋلار؛
باس ميى قاتەرلى ىسىگى؛
كەي دارىلىك پرەپاراتتاردى ءىشۋ؛
ۆيرۋستى اۋرۋلار؛
ستوماتيت؛
اسقازان-ىشەك جولى پروبلەمالارى.
ەمەتىن بالالاردا سىلەكەيدىڭ كوپ ءبولىنۋى قالىپتى سانالادى. سەبەبى ولاردىڭ سىلەكەي بەزدەرى ءالى دۇرىس قالىپتاسپاعان. سونداي-اق ول ءتىستىڭ شىعىپ كەلە جاتقانىمەن بايلانىستى بولۋى مۇمكىن.
تۇندە اۋىزدان سىلەكەي اعۋىنان قالاي ارىلامىز؟
ەڭ الدىمەن دارىگەرگە كورىنىپ، بارلىق قاۋىپتى سەبەپتەردى جوققا شىعارعان ءجون. سودان سوڭ ستوماتولوگقا قارالىپ، اۋىز قۋىسىن ءبىر تەكسەرتۋ كەرەك. ەگەر ەش اقاۋ انىقتالماسا جانە سىلەكەي اعۋ فيزيولوگيامەن بايلانىستى بولسا، ونى بىلاي ازايۋعا بولادى:
زياندى ادەتتەرمەن كۇرەسىڭىز؛
راتسيوننان تۇزدى جانە اشى تاعامدى الىپ تاستاڭىز؛
اۋىزدى شوپتەر قايناتپاسىمەن شايىپ تۇرىڭىز؛
ءبىر قىرىمەن ەمەس، شالقاسىنان جاتىپ ۇيىقتاۋعا تىرىسىڭىز؛
مۇرىن قۋىسىنا كۇتىم جاساڭىز. مىسالى، مۇرىن قۋىسىن تەڭىز سۋىمەن جۋىڭىز نەمەسە ەفير مايىمەن تىنىس الىڭىز.
