جاڭاجىلدىق تاتتىلەردى ازىرلەۋ كەزىندە نەنى ەسكەرۋ كەرەك
ءوڭىردىڭ باس مەملەكەتتىك سانيتارلىق دارىگەرىنىڭ ايتۋىنشا، جاڭاجىلدىق ءتاتتى سىيلىقتاردى ۇيىمداستىرىلعان ساۋدا ورىندارىندا (دۇكەندەر، ساۋدا بازالارى، رەسمي بازارلار) ساتىپ الۋ قاجەت. قاپتاماسى بەرىك، تىعىز جابىلعان، دەفورماتسيالانباعان، سونداي-اق ىشىندەگىسى سىرتقى اسەرلەردەن جاقسى قورعالعان بولۋى كەرەك.
«جارامدىلىق مەرزىمىن تەكسەرىڭىز، جارامدىلىق مەرزىمى اياقتالۋعا جاقىن تاتتىلەردى ساتىپ الماعانىڭىز ءجون. قۇرامىندا ەڭ از تاعامدىق قوسپالار، كونسەرۆانتتار، اسپازدىق جانە كونديتەرلىك مايلار، سويا ونىمدەرى، حوش يىستەر، تاتتىلەندىرگىشتەر بار جيىنتىقتارعا ارتىقشىلىق بەرىڭىز. كونديتەرلىك ونىمدەردە الكوگول، تابيعي كوفە، بالالاردا اللەرگيالىق رەاكسيا تۋدىرۋى مۇمكىن باسقا كومپونەنتتەر بولماۋى كەرەك»، - دەپ ءتۇسىندىردى ايناگۇل مۋسينا.
مامان تەز بۇزىلاتىن تاعامداردى - سۇزبە ىرىمشىكتەرىن، يوگۋرتتاردى، تورتتاردى نەمەسە كرەم تولتىرىلعان پەچەنەلەردى سىيلىققا سالماۋعا كەڭەس بەرەدى. وسى رەتتە، سىيلىق ءۇشىن ۇيدە جانە فرۋكتوزا مەن قانت الماستىرعىشتاردان جاسالعان ءتۇرلى تاتتىلەردەن باس تارتىپ، جىلتىراتىلعان مارمەلاد، زەفيردى جانە شوكولادتى از مولشەردە سالعان ءجون.
سونىمەن قاتار جەمىس-جيدەك، يوگۋرت جانە باسقا شوكولاد تولتىرعىشتارىندا جاس بالاعا زياندى كوپتەگەن تاعامدىق قوسپالار بار. شوكولادتىڭ قۇرامىندا پالما مايى بولماۋى كەرەك. پەچەنە تاڭداۋعا كەلەتىن بولساق، كالوريالى، مايلى جانە ءتاتتى ەمەس، ديەتالىق - گالەت، سۇلى ۇنىنان جاسالعان ءونىمدى تاڭداعان دۇرىس.
«كونديتەرلىك ونىمدەردى ءجيى پايدالانۋ ءتىس كاريەسىنە، اتوپيالىق دەرماتيتتىڭ (دياتەزدىڭ) كورىنىستەرىنە، اللەرگيالىق رەاكسيالارعا اكەلۋى مۇمكىن. پەچەنە، فرۋتيلادالارعا (جەمىس بارلارى) جانە كەپتىرىلگەن جەمىستەردەن جاسالعان كامپيتتەرگە، كوزيناكتارعا، گەماتوگەندەرگە، ۆافليگە، پاستيلگە، مارمەلادقا جانە زەفيرگە، شاينايتىن مارمەلادقا (از مولشەردە)، كەپتىرىلىپ ورالعان جەمىستەر مەن جاڭعاقتارعا ارتىقشىلىق بەرگەن ابزال. ءتاتتى سىيلىق رەتىندە جەمىستەر وتە جاقسى: الما، المۇرت، ماندارين، اپەلسين، بانان. مانداريندەر مەن اپەلسيندەردى ەكىدەن ارتىق قوسپاعان دۇرىس ەكەنىن ەسكەرىڭىز. ويتكەنى تسيترۋس جەمىستەرىن كوپ قولدانۋ بالادا اللەرگيا تۋدىرۋى مۇمكىن، ءتىپتى ولار بۇرىن اللەرگيا بولماسا دا»، - دەپ تۇيىندەدى ايناگۇل مۋسينا.
ءوڭىردىڭ مەملەكەتتىك سانيتارلىق دارىگەرى اتاپ وتكەندەي، اتالعان ەرەجەلەردى ساقتاۋ ارقىلى جاڭاجىلدىق تاتتىلەردى قاۋىپسىز دايىنداۋعا جانە بالالارعا كەرەمەت كوڭىل-كۇي سىيلاۋعا مۇمكىندىك بەرەدى.
ايتا كەتسەك، اقمولادا 14 جاسقا دەيىنگى بالالار اراسىندا COVID جۇقتىرۋ وسكەن.
