ايازبەن ارپالىسقان ەكىباستۇز: قالا توسىننان تۋعان توتەنشە جاعدايعا قالاي توتەپ بەردى

27-قاراشانىڭ تۇنىندە جەرگىلىكتى جىلۋ- ەلەكتر ورتالىعىنداعى اپات پەن جىلۋ ماگيستارلدەرىنىڭ بۇلىنۋىنەن 150 مىڭ تۇرعىنى بار ەكىباستۇز 30 گاردۋستىق ايازدا جىلۋسىز قالدى. قالادا توتەنشە جاعداي رەجيمى جاريالانىپ، جوندەۋ- قالپىنا كەلتىرۋ جۇمىستارى 3 اپتاعا جۋىق ۋاقىت تاۋلىگىمەن جۇمىس ىستەدى. جىلۋدان اجىراپ قالعان ۇيلەردى قايتادان جەلىگە قوسۋ كەزەڭ- كەزەڭمەن جۇرگىزىلدى.

بۇگىندە ماسەلە شەشىلدى: اپات زاردابى تيگەن ۇيلەردىڭ بارىنە جىلۋ بەرىلدى. 8-جەلتوقساندا توتەنشە جاعداي رەجيمى رەسمي تۇردە الىندى. ەندىگى جوسپار بويىنشا، 15-جەلتوقسانعا دەيىن جوندەۋ- قالپىنا كەلتىرۋ جۇمىستارى اياقتالۋى كەرەك.

ەكىباستۇزدا نە بولدى؟

27-قاراشادا ەكىباستۇز جىلۋ- ەلەكتر ورتالىعىندا اپات بولىپ، سالدارىنان 689 كوپقاباتتى ءۇي جىلۋسىز قالدى.

«27-قاراشادا ساعات 01:20 دا №11-قازاندىق اگرەگاتى توقتادى. ساعات 01:30 دا №13، 14، 15-قازاندىقتاردىڭ اگرەگاتتارى توقتادى. سەبەبى جەلىدەن كوپ مولشەردە سۋ اعىپ كەتكەن ەدى. قازىرگى تاڭدا №8 جانە №14-قازاندىق اگرەگاتتارى ىسكە قوسىلۋدا. جوندەۋ بريگادالارى جۇمىس ىستەپ جاتىر. جاقىن ارادا جىلۋمەن جابدىقتاۋ كورسەتكىشتەرى قالپىنا كەلتىرىلەدى»، - دەپ حابارلاعان بولاتىن سول ساتتە جەرگىلىكتى جىلۋ- ەلەكتر ورتالىعىنىڭ ماماندارى.

قالاعا اۋاداي قاجەت بۇل ينفراقۇرىلىم نىسانىندا 5 ەنەرگەتيكالىق جانە 5 سۋ جىلىتۋ قازاندىعى، سونداي-اق 1 بۋ تۋربيناسى ورناتىلعان.

توتەنشە جاعدايدىڭ العاشقى كۇنىنەن باستاپ ارنايى جەدەل شتاب قۇرىلىپ، اپاتتىڭ سالدارىن جويۋ ءۇشىن بارلىق قاجەتتى ماماندار تارتىلدى.

ەنەرگەتيكا مينيسترلىگى جىلۋ جەلىسىندەگى بىرنەشە قازاندىقتىڭ اگرەگاتى ءبىر جولدا توقتاپ قالعانىن حابارلادى.

«جىلۋ جەلىسىندەگى اقاۋدى جويۋعا جەدەل بريگادا تارتىلدى، كۆارتالدىق جەلىلەردە 5 اقاۋ نۇكتەسى انىقتالدى. باسقا دا بۇلىنگەن نۇكتەلەردى ىزدەۋ ءجۇرىپ جاتىر»، - دەگەن بولاتىن ۆەدومستۆو ماماندارى.

كەيىن پاۆلودار وبلىسىنىڭ سول كەزدەگى اكىمى ءابىلقايىر سقاقوۆ قالانىڭ جىلۋ جەلىسىندە 10 اقاۋ نۇكتەسى انىقتالعانىن ءمالىم ەتتى. جوندەۋ- قالپىنا كەلتىرۋ جۇمىستارىنا اۋەل باستان 15 بريگادا قاتىستى. اپاتتىڭ بەتىن قايتارۋعا 851 ادام جۇمىلدىرىلعان.

قالادا جەدەل تۇردە 12 جىلىتۋ بەكەتى ۇيىمداستىرىلدى. ونىڭ جەتەۋىندە تۇرعىنداردان كەلگەن شىعىندى وتەۋ تۋرالى وتىنىشتەردى دە قابىلداپ تۇردى.

ونىڭ ۇستىنە ەكىباستۇزدا گۋمانيتارلىق شتاب اشىلدى. قازاقستاندىقتار سول شتاب ارقىلى جىلۋسىز وتانداستارىنا كورپە، توك پەش، تۇنەمە قاپ پەن وزگە دە ومىرگە قاجەت بۇيىمدار جولدادى.

ەكىباستۇزدى جىلۋمەن قامتۋ توقتاتىلعان وقيعانى پرەزيدەنت قاسىم-جومارت توقايەۆ اسقان الاڭداۋشىلىقپەن قابىلدادى. مەملەكەت باسشىسى ۇكىمەت پەن پاۆلودار وبلىسىنىڭ اكىمدىگىنە ەكىباستۇزداعى جاعدايدى قالىپقا كەلتىرۋدى جانە قالادا قيىن جاعدايدىڭ تۋىنداۋىنا جول بەرگەن ادامداردى جاۋاپقا تارتۋدى تاپسىردى.

نەگە ءبىر جولدا بىرنەشە قازاندىقتىڭ اگرەگاتى ىستەن شىقتى؟

بۇعان دەيىن ق ر ەنەرگەتيكا مينيسترلىگى اتوم جانە ەنەرگەتيكالىق قاداعالاۋ، باقىلاۋ كوميتەتى مەن جەرگىلىكتى اكىمدىك ەكىباستۇز تۇرعىندارىنىڭ قالالىق ج ە و-دا جۇرگىزىلىپ جاتقان جوندەۋ جۇمىستارىنىڭ بارىسىنا شاعىمدانۋشىلاردىڭ وكىلدەرىنەن تۇراتىن ارنايى كوميسسيا قۇرعان بولاتىن.

ارنايى كوميسسيا 9-10-تامىز ارالىعىندا ەكىباستۇزداعى ج ە و- عا بارعان دا ەدى. ولار نەگىزگى قوندىرعىنى جوندەۋ جۇمىستارى مەن كۇن سۋىق كەزدە قازاندىقتىڭ جوعارى جۇكتەمەنى كوتەرۋگە دايىندىعىن تەكسەرگەن. كوميسسيا مۇشەلەرى ج ە و باسشىلىعىنا جوندەۋ جۇمىستارىن جەدەلدەتۋدى تاپسىرىپ كەتكەن.

تەكسەرۋدەن كەيىن جىلۋ قۇبىرلارىنىڭ ابدەن توزىعى جەتكەنىن، توزۋ كورسەتكىشى %70 دان اساتىنىن تىركەگەن.

«جىلۋ قۇبىرىنىڭ توزۋى جىل سايىن، اسىرەسە، جىلىتۋ ماۋسىمىنىڭ باسىندا جىلۋ جەلىسىندەگى جوعارى اپاتتىڭ نەگىزگى سەبەبى بولىپ ەسەپتەلەدى. وسى ەسكىرگەن دۇنيەنىڭ ءبارىن جاڭالاۋعا جىلۋ ەنەرگياسىنا بەلگىلەنگەن ءتاريفتىڭ تومەندىگى مۇمكىندىك بەرمەيدى. جىلۋ قۇبىرىنىڭ جالپى ۇزىندىعى 342 شاقىرىم بولعاندا جىل سايىن شامامەن 3-4 ك م جىلۋ جەلىلەرى اۋىستىرىلادى»، - دەپ تۇسىنىكتەمە بەردى ەنەرگەتيكا مينيسترلىگى.

مەملەكەت باسشىسى پرەمەر-مينيستر ءاليحان سمايىلوۆقا ەل قالالارىنداعى پروبلەمالىق ەنەرگەتيكالىق اكتيۆتەردى مەملەكەت مەنشىگىنە قايتارۋ ماسەلەسىن قاراۋدى تاپسىردى. سونىمەن قاتار، قاسىم- جومارت توقايەۆ پرەزيدەنت اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆتىڭ باسشىلىعىمەن ورتالىق جانە جەرگىلىكتى اتقارۋشى ورگانداردىڭ قىسقى جىلىتۋ ماۋسىمىنا دايىندىعىن تەكسەرەتىن كوميسسيا قۇرۋدى تاپسىردى.

جاعدايدى باقىلاۋعا الۋ جولىندا

27-قاراشادا ەكىباستۇز اكىمى ج ە و- داعى جاعداي تۇراقتانعانىن حابارلادى.

«شتاتتىق رەجيمدە بەس قازاندىق اگرەگاتى جۇمىس ىستەپ تۇر: ءۇش سۋ جىلىتۋ قازاندىعى، ەكى ەنەرگەتيكالىق قازاندىق. تاعى ءبىر سۋ جىلىتۋ قازاندىعىن ىسكە قوسۋ بويىنشا شارالارى قابىلدانۋدا. بۇل بىزگە بۇگىنگى ءتۇن ورتاسىنا دەيىن قاجەتتى تەمپەراتۋرا كورسەتكىشتەرىن %80 عا جانە وڭدەۋ كەزىندە شامامەن %65 عا شىعارۋعا مۇمكىندىك بەرەدى. وسىلايشا جالپى قالانى تۇتاس جىلۋمەن جابدىقتاۋ جاعدايىن تۇراقتاندىرۋعا مۇمكىندىك تۋىندايدى»، - دەدى قالا اكىمى ايان بەيسەكين.

سونداي-اق، ول قالاداعى جىلۋ جەلىلەرىنىڭ جاعدايى قيىنداعانىن ايتقان ەدى. ايتۋىنشا، قالاداعى بارلىق پروبلەما ەكىباستۇز اۋماعىندا بىرنەشە قۇبىردىڭ تەسىلۋىنەن تۋىنداعان.

سونىڭ سالدارىن جويۋ ءۇشىن قالادا 15 كە جۋىق جوندەۋ بريگاداسى قۇرىلدى. ولاردىڭ 11 ى بۇلىنگەن اۋلالاردى جويۋعا جۇمىلدىرىلىپ، قالعان تورتەۋى جاڭا اقاۋلاردى انىقتاۋمەن اينالىستى.

تەحنوگەندىك اپاتتىڭ العاشقى كۇندەرىندە ءۇش شاعىن اۋدان ءالى دە جىلۋسىز تۇرعان ەدى.

«قازىرگى تاڭدا ءۇش شاعىن اۋدان جىلۋسىز قالىپ وتىر. №2 -جىلۋ ماگيسترالى اجىراتىلدى. 130 عا جۋىق كوپپاتەرلى تۇرعىن ءۇي مەن 100 جەكە تۇرعىن ءۇي جىلۋسىز قالدى. ءبىراق ءبىز ارىپتەستەرىمىزبەن، تۇرعىن ءۇي ينسپەكتسياسىمەن جانە جەلىنى پايدالانۋشى ۇيىمدارمەن بىرلەسىپ، جۇيەنىڭ تۇگەلدەي قاتىپ قالۋىن بولدىرماۋدىڭ قامىن جاساپ جاتىرمىز. بارلىق قاجەتتى ءىس- شارالار ۋاقتىلى جۇرگىزىلۋدە، ءتۇسىندىرۋ جۇمىستارى دا جۇرگىزىلۋدە»، - دەدى قالا باسشىسى.

قالادا توتەنشە جاعداي رەجيمى جاريالاندى

ق ر «ازاماتتىق قورعاۋ تۋرالى» زاڭىنىڭ 48-بابىنا سايكەس ەكىباستۇز اۋماعىندا قالا اكىمى ايان بەيسەكين جىلۋ جەلىلەرىندەگى اپاتقا بايلانىستى جەرگىلىكتى اۋقىمداعى تەحنوگەندىك سيپاتتاعى توتەنشە جاعداي جاريالادى.

قالا اكىمدىگى بۇل ۋاقىتشا شارا ازاماتتاردىڭ تىرشىلىگىن قامتاماسىز ەتۋ ماقساتىندا عانا قولدانىلعانىن ءتۇسىندىردى.

28-قاراشا ساعات 01:30-داعى جاعداي بويىنشا 17 كوپقاباتتى تۇرعىن ءۇي، بەس الەۋمەتتىك جانە 21 زاڭدى تۇلعا نىسانى جىلۋسىز بولدى.

اكىمدىك توتەنشە جاعداي رەجيمى اۋماقتا جوندەۋ- قالپىنا كەلتىرۋ جۇمىستارى تولىق اياقتالعانعا دەيىن ساقتالاتىنىن حابارلادى.

پاۆلودار وبلىسىنىڭ اكىمى الەۋمەتتىك نىسانداردى ارالاپ شىعىپ، بالالاردى قولداۋ ورتالىعىنداعى كونتينگەنتتى پاۆلودارعا ەۆاكۋاتسيالاۋ تۋرالى شەشىم قابىلدادى. ەكىباستۇز قالاسىنىڭ قولداۋ ورتالىعى مەن جاسوسپىرىمدەر ءۇيىنىڭ بالالارى وقۋ- ساۋىقتىرۋ لاگەرلەرىنە جىبەرىلەتىنى بەلگىلى بولدى.

مەملەكەت باسشىسىنىڭ تاپسىرماسى بويىنشا ق ر پرەمەر- ءمينيسترىنىڭ ءبىرىنشى ورىنباسارى رومان سكليار توتەنشە جاعداي زارداپتارى تولىق جويىلعانعا دەيىن ەكىباستۇزدا قالاتىن بولدى.

جىلۋ بەرۋ جۇيەسىن قالپىنا كەلتىرۋ جۇمىستارى كۇندىز دە، تۇندە دە ءجۇرىپ جاتتى. دەگەنمەن 4-جەلتوقسانداعى جاعداي بويىنشا 11 ءۇي ءالى جىلۋسىز وتىرعان ەدى. بۇل ۇيلەردەگى اقاۋدى جويۋ وڭاي بولماي شىقتى. پاۆلودار وبلىسى اكىمىنىڭ مىندەتىن ۋاقىتشا اتقارۋشى ولەگ كرۋك ونىڭ سەبەبىن بىلاي ءتۇسىندىردى.

«قازىرگى تاڭدا بۇكىل ۇيلەردىڭ جىلۋ تورابىنا، جەرتولەسىنە جىلۋ بەرىلدى. اۋقىمدى جۇمىس ىستەلدى. عيماراتتار اراسىنداعى جەلىلەر مەن جىلۋ توراپتارى قالپىنا كەلتىرىلدى. قازىر پاتەرلەر اراسىنا جىلۋ تاسىمالدايتىن ماگيسترال قۇبىر مەن جىلۋ باتارەيالارىن قالپىنا كەلتىرۋ جۇمىستارى ءجۇرىپ جاتىر. وكىنىشكە قاراي، كەيبىر ۇيلەردىڭ پاتەر يەلەرى كووپەراتيۆتەرى جەلىدەن سۋ اعىزعان كەزدە دۇرىس ىستەمەگەن. سونىڭ سالدارىنان اتالعان ۇيلەردە جىلۋ باتارەيالارى مەن پاتەرلەر اراسىنداعى ماگيسترال قۇبىرلاردى كوپتەپ اۋىستىرۋعا تۋرا كەلىپ وتىر. ويتكەنى، جەلى قاتىپ قالعان»، - دەدى اكىمدىك وكىلى.

سونداي-اق، ول جىلۋ جۇيەسى جوندەۋگە كەلمەي جاتقان ۇيلەردى اتادى.

ول شتاب باسشىسى - پرەمەر- ءمينيستردىڭ ءبىرىنشى ورىنباسارى رومان سكليار جوندەۋ قىزمەتتەرىنىڭ جۇمىسىن ۇيلەستىرگەنىن اتاپ ءوتتى. ءار ۇيگە جاۋاپتى جەكە كاسىپورىن بەكىتىلگەن بولاتىن.

«اسىرەسە، ساتبايەۆ 8، ءماشھۇر ءجۇسىپ 52، اۋەزوۆ 47، 46، 46-ا، شەشەنبەكوۆ 19-ا مەكەنجايىنداعى ۇيلەردە پروبلەما بار. شتاب جەتەكشىسى، پرەمەر-ءمينيستردىڭ ورىنباسارى جوندەۋ قىزمەتىنىڭ جۇمىسىن قايتا ۇيلەستىرگەن بولاتىن. ەندى ءار ۇيگە ءبىر-ءبىر كاسىپورىن بەكىتىلدى. ول كاسىپورىنداردىڭ ءبىرىنشى باسشىلارى بەكىتىلگەن ۇيدەگى اقاۋدى جويۋ جۇمىستارىنىڭ باسى- قاسىندا ءجۇر - قاتقان جەلىنى ءجىبىتىپ جاتىر. بۇل باسشىلار بۇكىل اقاۋ جويىلعانشا وسى ءىستىڭ باسىندا بولادى»، - دەدى ولەگ كرۋك وڭىرلىك كوممۋنيكاتسيالار قىزمەتىندە وتكەن بريفينگىدە.

رومان سكلياردىڭ مالىمەتى بويىنشا، قالاعا جىلۋ بەرۋ جۇمىستارىن قالپىنا كەلتىرۋگە جەتى ءىرى كاسىپورىن اتسالىسقان. ولاردىڭ ءارقايسىسى كوپقاباتتى ۇيلەرگە جاۋاپتى بولىپ بەكىتىلگەن.

5-جەلتوقساندا 71 كوپقاباتتى ءۇيدىڭ جەرتولەسىنە جىلۋ بەرىلدى.

تۋرا وسى كۇنى قالا اكىمدىگى اپتالاپ جىلۋسىز قالعان پروبلەمالى 12 ءۇيدىڭ جىلۋ باتارەياسى جاڭالانعانىن حابارلادى. سونداي-اق، پاتەرلەر اراسىنا جىلۋ تاراتاتىن ماگيسترال قۇبىرلار جوندەلگەن. جالپى اپات كەزىندە 2 مىڭداي جىلۋ باتارەياسى اۋىستىرىلعان.

جىلۋ جەلىدەن اجىراتىلعان ۇيلەردىڭ بارىنە ورالدى

7-جەلتوقساندا پرەمەر-ءمينيستردىڭ ءبىرىنشى ورىنباسارى رومان سكليار ەكىباستۇزداعى تەحنوگەندىك اپات كەزىندە اقاۋ شىققان ۇيلەردىڭ بارىنە جىلۋ بەرىلگەنىن ءمالىم ەتتى.

«7-جەلتوقسان كۇنگى ساعات 8.00 دەگى جاعداي بويىنشا زارداپ شەككەن ۇيلەردىڭ بارىنە جىلۋ بەرىلدى. جەلىدەگى سۋدىڭ جىلۋ كورسەتكىشتەرى 83 گرادۋس بولىپ كىرىپ، 56 گرادۋس جىلۋمەن قايتىپ جاتىر. سۋدىڭ قىسىمى 8,8 ك گ/س م2»، - دەدى رومان سكليار.

ول قالاداعى جىلۋ جاعدايى ءۇش كۇن ىشىندە تولىعىمەن قالىپقا كەلۋى كەرەك ەكەنىن اتاپ ءوتتى.

«ەنەرگيا كوزى شتاتتىق رەجيمدە جۇمىس ىستەپ تۇر. ەكىباستۇز جىلۋ-ەلەكتر ورتالىعى قالاداعى جاعدايدى قالىپقا كەلتىرۋ ءۇشىن بارلىق قاجەتتى كۇشتى جۇمساۋدا. ءبىراق، وكىنىشكە قاراي، سوڭعى كۇندەردەگى وقيعالاردىڭ سالدارىنان پايدا بولعان گيدراۆليكالىق رەجيمنىڭ تەڭگەرىمسىزدىگى، سونىڭ ىشىندە تۇتىنۋشىلار مەن پيك- ءتىڭ جەلىدەن رۇقساتسىز سۋ اعىزۋى بۇل جۇمىستى قيىنداتىپ جاتىر. بارلىق تۇرعىندارعا شىدامدىلىق ءۇشىن العىس بىلدىرەمىز جانە الداعى 2-3 كۇندە بىرلەسكەن كۇش- جىگەرمەن جىلۋ بەرۋ جاعدايى تولىعىمەن قالىپقا كەلەدى دەپ كۇتەمىز»، - دەلىنگەن ارنايى جەدەل شتابتىڭ حابارلاماسىندا.

8-جەلتوقساندا مەملەكەت باسشىسى قاسىم-جومارت توقايەۆ پاۆلودار وبلىسىنىڭ اكىمى اسايىن بايحانوۆتى قابىلداپ، ەكىباستۇز جىلۋ- ەلەكتر ورتالىعىنداعى اپاتتىڭ بەتى قالاي قايتارىلىپ جاتقانىن تىڭدادى.

ايماق باسشىسىنىڭ سوزىنشە، ەكىباستۇزدى اپاتتان كەيىن قالپىنا كەلتىرۋ جۇمىستارىن 15-جەلتوقسانعا دەيىن اياقتاۋ جوسپارلانىپ وتىر.

تورەشى - ۋاقىت

ەكىباستۇز جىلۋ-ەلەكتر ورتالىعىنداعى اپات شىعىن اۋقىمى جونىنەن ءوتىپ بارا جاتقان جىلداعى ەڭ ءىرى اپات بولىپ تۇر. تۇرعىنداردان باسپاناسىنىڭ جىلۋسىز قالعانى تۋرالى 2000 نان استام شاعىم تۇسكەن. كەم دەگەندە 12 كوپقاباتتى ءۇيدىڭ جىلۋ باتارەيالارى اۋىستىرىلىپ، پاتەرگە جىلۋ تاسىمالدايتىن ماگيسترال قۇبىر جوندەلگەن. اكىمدىكتىڭ الدىندا اپاتتان كەيىنگى قالپىنا كەلتىرۋ جۇمىستارىن اياقتاعان سوڭ كەلگەن شىعىندى ەسەپتەۋ دەيتىن شارۋا تۇر.

ساراپشىلار ەكىباستۇزدا بولعان وقيعا تەوريالىق تۇرعىدان ەلىمىزدىڭ باسقا قالالارىندا قايتالانۋى مۇمكىن ەكەنىن ايتىپ، دابىل قاعۋدا. ماسەلە، قوندىرعىلار مەن جەلىلەردىڭ توزعانىندا عانا ەمەس، مۇنداي ماڭىزدى نىسانداردى باسقارۋدىڭ ءتيىمسىز تاسىلىندە بولىپ تۇر.

بۇل تيپتەس نىسانداردىڭ مەنشىك يەسىن اۋىستىرۋ قاجەتتىگى تۋرالى دا كوپ اڭگىمە ايتىلىپ ءجۇر. ءبىراق ۇكىمەت توزىعى جەتىپ، قالت-قۇلت ەتىپ تۇرعان نىسانداردى ساتىپ الا سالۋعا اسىقپايتىنىن بايقاتتى.

بۇعان دەيىن الەكساندر كلەبانوۆ ەكىباستۇز جىلۋ-ەلەكتر ورتالىعىن مەملەكەتكە 1 تەڭگەگە ساتۋعا دايىن ەكەنىن مالىمدەگەن. 5-جەلتوقساندا ۇكىمەت باسشىسىنىڭ ورىنباسارى سەرىك جۇمانعارين سول ۇسىنىسقا پىكىر ءبىلدىردى.

«بۇل ماسەلە ءالى تالداۋ ساتىسىندا تۇر. مۇندا شەشىم قابىلداماي تۇرىپ، ونىڭ جاعدايىن تەكسەرۋ كەرەك. ەگەر بۇل مەملەكەتكە ۇلكەن اۋىرتپالىق سالسا جانە ءىس جۇزىندە ءبىز وبەكتىنى الىپ، يەسىنە سىيلىق جاساعانداي بولامىز. سوسىن وعان بارلىق قاراجاتتى سالامىز. سوندىقتان، ەڭ الدىمەن، جاعدايدى بىرلەسىپ تۇزەتۋ ماسەلەسىن قاراستىرۋ قاجەت»، - دەدى سەرىك جۇمانعارين ۇكىمەتتە جۋرناليستەرگە بەرگەن سۇحباتىندا.

سونىمەن بىرگە سەرىك جۇمانعارين الەكساندر كلەبانوۆتىڭ ەكىباستۇز ج ە و- سىن مەملەكەتكە ءبىر تەڭگەگە ساتۋعا دايىندىعى تۋرالى پىكىر ءبىلدىردى.

«ۇكىمەت بۇل ورتالىقتى ءبىر تەڭگەگە ساتىپ الىپ، 1 ميلليارد تەڭگە شىعىنعا ۇشىراۋى مۇمكىن. سول ءۇشىن ج ە و جاي- كۇيىن تولىق قاراستىرىپ، قانشا قاراجات كەتەتىنىن تالداۋ كەرەك»، - دەدى ۆيتسە-پرەمەر.

8-جەلتوقساننىڭ كەشىندە ەكىباستۇزداعى توتەنشە جاعداي رەجيمى كۇشىن جويدى. جوندەۋشى بريگادالارعا ءالى بىرنەشە كۇن تاباندى ەڭبەك ەتۋ قاجەت. ويتكەنى جەكە سەكتوردى جىلۋعا جالعاۋ جۇمىستارى ءالى بىتكەن جوق. قالانىڭ مەكتەپتەرى مەن بالاباقشالارى جىلۋ جەلىسىندەگى تەمپەراتۋرا رەجيمى ابدەن قالىپقا كەلگەنىنە كوز جەتكەننەن كەيىن عانا شتاتتىق جۇمىس رەجيمىنە كوشەدى.

اپاتتان تۇرعىندارعا كەلگەن شىعىندى وتەۋ تولىعىمەن باستى ايىپكەر - «ەكيباستۋزتەپلوەنەرگو» ج ش س-نە جۇكتەلىپ وتىر. جىلۋمەن جابدىقتاۋ كاسىپورىندارى - قاراشا مەن-جەلتوقسان ايلارى ءۇشىن تۇرعىنداردان كوممۋنالدىق تولەم تالاپ ەتە المايتىنى دا الدىن الا ايتىلدى. ياعني، جىلۋسىز قالىپ، اۋپىرىممەن جەلىگە قوسىلعان ۇيلەردىڭ تۇرعىندارى 2-اي جىلۋ تولەۋدەن بوساتىلىپ وتىر. بۇل 150 مىڭ تۇرعىنى بار قالانى قىس ورتاسىندا تەحنوگەندىك اپات تۇتقىنىندا قالدىرعان كومپانيانىڭ الدىنا قويىلعان ادىلەتتى تالاپتىڭ ءبىرى عانا بولسا كەرەك.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى