ماجارستان ۇكىمەتى قازاقستاندىقتارعا وقۋ گرانتىن ءبولدى

ماجارستاندا تەگىن وقۋ كونكۋرسىنا قاتىسۋ ءۇشىن قۇجات قابىلداۋ بيىلعى جىلعى 12 -جەلتوقساندا باستالىپ، 2023 -جىلعى 18-قاڭتارعا دەيىن جالعاسادى. وتىنىمدەر Egov.kz ەلەكتروندى ۇكىمەت پورتالى ارقىلى جانە «حالىقارالىق باعدارلامالار ورتالىعى» ا ق- دا قابىلدانادى.

«بيىل ۇكىمەتارالىق كەلىسىمدەر شەڭبەرىندە بولىنگەن گرانتتار بويىنشا كونكۋرستىق ىرىكتەۋدىڭ ەرەجەلەرى جەتىلدىرىلدى. حالىقارالىق باعدارلامالار ورتالىعىنىڭ باستاماسىمەن كونكۋرستىق ىرىكتەۋدە اۋىلدىق جەرلەردەن ۇمىتكەرلەر ءۇشىن ارتىقشىلىقتار ەنگىزىلدى. سونىمەن بىرگە ۇكىمەتارالىق گرانتتاردىڭ تۇلەكتەرى ءۇشىن ەڭبەكپەن وتەۋ مەرزىمى ءۇش جىلدان ءبىر جىلعا دەيىن قىسقارتىلدى»، - دەدى «حالىقارالىق باعدارلامالار ورتالىعى» ا ق باسقارما ءتوراعاسى ءانۋار جانعوزين.

«Stipendium Hungaricum» ستيپەنديالىق باعدارلاماسى قازاقستاندىقتارعا كەلەسى باعدارلامالار بويىنشا 250 گرانت ۇسىنىپ وتىر:

• باكالاۆريات 110 ورىن؛

• ماگيستراتۋرا 90 ورىن؛

• باكالاۆريات+ماگيستراتۋرا 30 ورىن؛

• دوكتورانتۋرا 20 ورىن.

گرانت ماجار ءتىلى كۋرستارىنان ءوتۋ، اكادەميالىق وقۋ، جاتاقحانادا تۇرۋ، مەديتسينالىق ساقتاندىرۋ شىعىندارىن وتەيدى، سونداي- اق ستۋدەنتتەرگە اي سايىنعى ستيپەنديا تولەنەدى.

وقۋ اعىلشىن جانە ماجار تىلدەرىندە وتەدى. ماجار ءتىلىن بىلمەيتىن قازاقستاندىقتار ءۇشىن تەگىن تىلدىك دايىندىقتان ءوتۋ مۇمكىندىگى قاراستىرىلعان.

كونكۋرسقا قاتىسۋ ءۇشىن نەگىزگى كريتەريلەر:

- باكالاۆر دارەجەسىن الۋعا ۇمىتكەرلەر ءۇشىن - اتتەستات ورتاشا بالىنىڭ نەمەسە نەگىزگى ورتا ءبىلىمى تۋرالى كۋالىكتىڭ جانە اعىمداعى وقۋ جىلى بويىنشا اعىمداعى ۇلگەرىمى تۋرالى تابەل/ترانسكريپتتىڭ نەمەسە ارنايى ورتا ءبىلىمى تۋرالى ديپلوم ورتاشا باللىنىڭ 5.0-تەن 4.0 بالىنا سايكەستىگى؛

- ماگيستر دارەجەسىن الۋعا ۇمىتكەرلەر ءۇشىن - باكالاۆر/مامان/ديپلومى نەمەسە اعىمداعى ۇلگەرىمى تۋرالى تارانسكريپتىڭ ورتاشا باللىنىڭ 4.0 تەن 3.0 بالىنا سايكەستىگى؛

- دوكتور دارەجەسىن الۋعا ۇمىتكەرلەر ءۇشىن - ماگيستر ديپلومى نەمەسە اعىمداعى ۇلگەرىمى تۋرالى تابەل/ترانسكريپتتىڭ ورتاشا بالىنىڭ 4.0 تەن 3.0 بالىنا سايكەستىگى؛

- اعىلشىن تىلىندە وقۋ ءۇشىن كەمىندە IELTS 9.0-دان 5.5، TOEFL 120 دان 46 دەڭگەيدەگى قولدانىستاعى سەرتيفيكاتتار بولۋ ءتيىس.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى