شىمكەنتتە اۆتوبۋس جۇرگىزۋشىسىنە كۇش كورسەتكەندەرگە قىلمىستىق ءىس قوزعالدى
الەۋمەتتىك جەلىدە تاراعان ۆيدەودان بەلگىسىز ازاماتتاردىڭ قوعامدىق كولىك جۇرگىزۋشىسىنە كۇش قولدانعانىن كورۋگە بولادى. جەڭىل كولىكتەن تۇسكەن ەكى ازامات ايالداماعا توقتاعان اۆتوبۋسقا كىرىپ، جۇرگىزۋشىسىن سوققىعا جىققان. بەتىنەن ۇرىپ، مۇرنىن قاناتقان. سونداي-اق، اراشا تۇسكەن كوندۋكتوردى دا قۋالاپ ءجۇرىپ ۇرعان.
شىمكەنت قالالىق پوليتسيا دەپارتامەنتىنىڭ باسپا ءسوز قىزمەتى اتالعان ماسەلەگە قاتىستى سوتقا دەيىنگى تەرگەپ-تەكسەرۋ امالدارى جۇرگىزىلىپ جاتقانىن مالىمدەدى.
«اتالعان جايت بويىنشا اباي اۋدانىنىڭ پوليتسيا باسقارماسىنا ق ر ق ك-نىڭ 293-بابىمەن «بۇزاقىلىق» قىلمىستىق ءىسى تىركەلگەن. ءىس بويىنشا جابىرلەنۋشىگە سوت- مەديتسينالىق ساراپتاما تاعايىندالدى. قازىرگى تاڭدا سوتقا دەيىنگى تەرگەپ- تەكسەرۋ امالدارى جۇرگىزىلىپ جاتىر» - دەلىنگەن حابارلامادا.
ال، اۆتوبۋس جۇرگىزۋشىسىنىڭ جۇبايى بەينەۇندەۋ جاساپ، ءمان-جايدى باياندادى. پوليتسيادان ءىستى سوزباي، تەزىرەك شەشىپ بەرۋىن سۇرادى.
«مەنىڭ كۇيەۋىم «رادۋگا» ج ش س قاراستى 60 اۆتوبۋستىڭ جۇرگىزۋشىسى. «ەلەكترون» ايالداماسىنا توقتاعاندا بەلگىسىز ازاماتتار كۇيەۋىممەن بىرگە كوندۋكتوردى دا سوققىعا جىققان. ءبىز پوليتسياعا ارىز بەرىپ قويدىق. ەندى ءىستىڭ سوزىلماي، تەزىرەك شەشىم شىعارىلۋىن وتىنەمىن» - دەيدى ول.
جەلىدەگى جازباعا وقىرماندار دا ءتۇرلى پىكىرلەر جازىپ جاتىر. ولاردىڭ ىشىندە، «قوعامدىق كولىكتىڭ جۇرگىزۋشىسىن ۇرىپ- سوققانداردى قاتاڭ جازالاۋ كەرەك»، «كوندۋكتور ەركەك ەكەن، ەكەۋىنە باس سالدى. ىشتەگى جۇرگىزۋشى شىعىپ كوندۋكتورىنا كومەكتەسپەي ما، تاياق جەپ وتىر عوي ماندراج بولىپ»، «جۇدىرىقپەن جۇگىرگەندەر سۇمدىق. ماسقارا»، «ەركەك ەمەس ەزدەر ەكەن، الپىس جاسار ادامدى جابىلىپ ۇرىپ. قيت ەتسە جۇدىرىق الا جۇگىرەدى وسى جابايىلار»، «نە بولىپ كەتتى، و توبا؟ قايتا قوعامدىق كولىككە جول بەرۋ كەرەك قوي، ىشىندە قانشاما ادام وتىر. بالالى انالار، قارت كىسىلەر، مۇگەدەك كىسىلەر وتىر» دەگەن پىكىرلەر بار.
