تالعات بيگەلدينوۆتىڭ ماحاببات حيكاياسى
كەڭەس وداعىنىڭ ەكى مارتە باتىرى، ۇشقىش تالعات بيگەلدينوۆ تە تاعدىردىڭ وسى ءبىر تالكەگىنە تاپ بولعان كورىنەدى.
«قارا اجال» اتالىپ كەتكەن ۇشاقتى مىنگەن باتىر ءوزىنىڭ العاشقى ماحابباتىن سوناۋ چكالوۆتا، جازعى ۋچيليشەدە وقىپ جۇرگەندە كەزدەستىرەدى. تۋعان جەردەن جىراقتا، روسسيانىڭ الىس تۇكپىرىندە، قازاقتىڭ بوتاگوز قىزىن بايقاپ قالىپ، ءبىر كورگەننەن ۇناتىپ قالادى. اجارى ايناداي جارقىراعان ايناگۇلمەن تانىسىپ، ءسوز جاراستىرىپ جۇرگەندە، اياق- استى سوعىس باستالىپ كەتەدى. ەكەۋى دە وتان ءۇشىن مايدانعا اتتانباق بولادى. قوشتاساردا، قوس عاشىق سوعىستان ورالعان سوڭ، ۇيلەنەمىز دەپ ۋادەلەسىپ، سوڭعى ءتۇندى بىرگە وتكىزەدى.
بيگەلدينوۆ تىلدا ەرجۇرەكتىگىمەن، ناعىز ەرلىگىمەن كوزگە تۇسەدى. قان مەن تەرىن توگىپ شايقاسادى. 305 رەت اسكەري شابۋىلعا شىعىپ، جاۋ ۇياسى - بەرليندى الۋعا كوش باستاپ، ءبىرىنشى بولىپ اتتانادى. الايدا، 1944 -جىلدىڭ جەلتوقسانىندا تالعات قارالى حابار الادى: ايناگۇل كوز جۇمىپتى. نەمىستىڭ ۇشاعى سانيتارلىق كولىكتى اتىپ تۇسىرگەن ەكەن. ال، ايناگۇل اۋىرجارالى جاۋىنگەردى دەنەسىمەن قورعاپ قالسا كەرەك. جاۋدىڭ ءۇش وعى ارۋدىڭ نازىك جۇرەگىن جارالاعان. ءومىردىڭ ءدامىن تاتپاي، 20 دان ەندى اسقان تالعاتتىڭ سۇيىكتىسى وسىلايشا مەرت بولىپتى.
قايعىلى حاتپەن بىرگە ءبىر جاپىراق قاعاز، ايناگۇلدىڭ اياقتالماعان، سوڭعى جۇرەكجاردى حاتى دا جىبەرىلگەن ەكەن: «جانىم، وتىنەمىن، ءوزىڭدى كۇت. سەنىڭ ماراپاتتارىڭ كوپ، سەن - باتىرسىڭ! مەن سەنىڭ ءومىر سۇرگەنىڭدى قالايمىن. ەستيسىڭ بە؟ ماعان اتاق تا، ەشتەڭە دە كەرەك ەمەس، ماعان سەن كەرەكسىڭ! سەن! مەن سەنى قاتتى، قاتتى جاقسى كورەمىن...».
وسى سوزدەن كەيىن جازۋ ۇزىلگەن.
ۇشقىش بىرنەشە كۇن بويى ءوز-وزىنە كەلە الماي، قيىن حالدە بولادى. ءبىراق، تالعاتقا قاۋىپتى تاپسىرما بەرىلەدى. بۇنى باتىر «نەمىستەردەن الار كەگىم بولسىن» دەپ قابىلداپ، تاپسىرمانى بۇلجىتپاي ورىندايدى: كارپات شاتقالىندا، ۇشۋ بارىسىندا ءۇش مىڭ فاشيستى بار كولونناعا ءوزى جالعىز قاۋىپ ءتوندىرىپ، فوسفوردان جاسالعان بومبالارمەن، رەاكتيۆتى سناريادتارمەن كوزىن جويادى.
تالعات بيگەلدينوۆ ءوز اەرودرومىنا قايتىپ كەلگەنىندە، ۇشاعىنىڭ وقتان تەسىلمەگەن، ساۋ جەرى بولماعان كورىنەدى. پۋلەمەتىندە بىردە-ءبىر وق قالماعان، ءبارىن جۇمساعان.
بۇل ونىڭ ايناگۇل ءۇشىن نەمىستەردەن بار جانىن سالىپ كەگىن العانى ەدى. باتىر قان مايداندا ءتىرى قالىپ، وتانعا امان-ەسەن ورالادى. امان-ەسەن بولعانىمەن، جۇرەك ماڭگى جارالى...
