ەكىباستۇز تۇرعىندارىنىڭ شىعىنى قالاي وتەلەدى

«قالا بويىنشا 12 جىلىتۋ بەكەتى بار. ونىڭ ىشىندە 7 بەكەتتە تۇرعىنداردان ءوتىنىش قابىلدانادى. وتىنىشتە زالالدىڭ سەبەبى مەن كەلگەن شىعىن كولەمىن ناقتى كورسەتۋى ءتيىس. ەگەر ءۇي يەسى كەلگەن زالالدى ءوز ەسەبىنەن وتەپ، جوندەگەن جاعدايدا فيسكالدىق چەك تالاپ ەتىلەدى. تۇرعىنداردىڭ ءوتىنىشى نەگىزىندە ارنايى كوميسسيا ءىستى ءۇش كۇن بويى قارايدى. سودان سوڭ شىعىن وتەلەدى»، - دەدى قالا باسشىسى ايان بەيسەكين شتابتىڭ باسپا ءسوز ءماسليحاتىندا.

ءوز كەزەگىندە پاۆلودار وبلىسى اكىمىنىڭ مىندەتىن ۋاقىتشا اتقارۋشى ولەگ كرۋك اپات شىعىنىن ەسەپتەۋ جۇمىسىنىڭ باستالماعانىن ايتتى.

«شىعىن كولەمىن ەسەپتەۋ ءالى باستالعان جوق. اپاتتى قالپىنا كەلتىرۋ جۇمىستارى ءجۇرىپ جاتىر. سودان سوڭ عانا اكىمدىك زالالدى انىقتاۋ جۇمىسىن قولعا الادى. تۇرعىنداردان 2 مىڭنان استام ءوتىنىش ءتۇستى. ءبىراق، ناقتى ساندى ايتا المايمىن»، - دەيدى ول.

بۇعان دەيىن قالا باسشىسى ەكىباستۇزدا 12 ۇيگە جىلۋ ءىشىنارا قوسىلعانىن حابارلاعان ەدى.

ەسكە سالايىق، 27- قاراشادا ەكىباستۇز جىلۋ ەلەكتر ورتالىعىندا اپات بولىپ، قالا تۇرعىندارى جىلۋسىز قالدى.

كەيىن جىلۋ قازاندىعىنىڭ ىستەن شىعۋىنا بايلانىستى وبلىس اكىمى باستاعان جەدەل شتاب قۇرىلدى.

ايتا كەتسەك، جەدەل شتابتىڭ بۇگىن تۇستەگى اقپاراتىنا سايكەس، ەكىباستۇزدىڭ كوپقاباتتى 71 پروبلەمالى ءۇيدىڭ جەرتولەسىندەگى توراپتارعا جىلۋ بەرىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى