ۋكراينا قازاقستانداعى جاڭا ەلشىسىنىڭ كانديداتۋراسىن ۇسىندى - ايبەك سمادياروۆ
بۇل تۋرالى ب ا ق وكىلدەرىنىڭ قاتىسۋمەن وتكەن بريفينگتە سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
ۆەدومستۆو قابىرعاسىندا وتكەن باسپا ءسوز بريفينگىندە ب ا ق وكىلدەرى ايبەك سمادياروۆتان ۋكراينانىڭ قازاقستانداعى جاڭا ەلشىسى قاشان تاعايىندالاتىنىن سۇرادى.
«ۋكراينا تاراپى وزدەرىنىڭ جاڭا ەلشىسىنىڭ كانديداتۋراسىن ۇسىنعان بولاتىن. ول كانديداتۋرانى ءبىز قازىر قاراپ جاتىرمىز. ءبىز ماقۇلداماساق، ولار تاعايىندالمايدى. ءتارتىپ بويىنشا سولاي»، - دەپ جاۋاپ بەردى ول.
ايتا كەتەيىك، ۋكراينانىڭ قازاقستانداعى بۇرىنعى ەلشىسى پەتر ۆرۋبليەۆسكي 21- تامىزدا قازاقستاندىق بلوگەر دياس قۇزايىرعا سۇحبات بەرىپ، ءوزىنىڭ قىزمەت قۇزىرەتىنە ساي كەلمەيتىن مالىمدەمە جاساعان ەدى. كەيىن ول ق ر سىرتقى ىستەر مينيسترلىگىنە شاقىرىلدى. ونىڭ كوزقاراسى مەن ۇستانىمىنا مينيسترلىك پەن قازاقستان حالقى اسسامبلەياسى نارازىلىق ءبىلدىردى. ارتىنشا پەتر ۆرۋبليەۆسكي قازاقستاننان كەتتى.
