الماتىلىقتار كوروناۆيرۋستى كوبىنە ساۋدا ءۇيى مەن قوعامدىق كولىكتە جۇقتىرادى - ەپيدەميولوگ

بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا قالالىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا ايتتى، دەپ حابارلايدى قازاقپارات ءتىلشىسى.

سپيكەردىڭ سوزىنشە، قالادا كوروناۆيرۋس جۇقتىرعاندار سانى ارتۋىنا قاراماستان، مەگاپوليستەگى جاعداي تۇراقتى، «جاسىل» ايماقتا ورنالاسقان.

«سوڭعى اپتادا كۆي جۇقتىرۋ 1,2 پايىزعا وسكەنى بايقالادى. وسىلايشا، وتكەن 7 كۇندە 155 جۇقتىرۋ جاعدايى انىقتالسا، وسى جولى 187 جاعداي تىركەلدى. كوۆيد ناۋقاستارىنا ارنالعان توسەك-ورىندارىنىڭ 100000 ادامعا شاققانداعى تولتىرىلۋ دەڭگەيى 9,2 (27 ادام) نەمەسە بولىنگەن 450 توسەك-ورىننىڭ 6 پايىزىن قۇرايدى»، - دەدى ول.

اسەل قالىقوۆانىڭ ايتۋىنشا، ناۋقاستاردىڭ باسىم بولىگى ۆيرۋستى - ساۋدا وبەكتىلەرىندە 33,3 پايىز، قوعامدىق كولىكتە - 41,6 پايىز، بازارلاردا - 5,4 پايىز جۇقتىرعان، باسقا وڭىردە 6,5 پايىز.

«سونداي-اق وتباسىندا ناۋقاس اداممەن بايلانىس- 7,1 پايىز، تۋىستارى مەن كورشىلەرىنە بارۋ كەزىندە - 3,0 پايىز، جۇمىس ورنىندا - 3,0 پايىز جۇقتىرۋ جاعدايلارى انىقتالعان. اۋرۋ جۇقتىرعانداردىڭ كوپشىلىگى 20-39 جاس ارالىعىنداعى جاستار - 46,5 پايىز جاعداي. ودان كەيىنگى ورىندا 40-59 جاس ارالىعىنداعى ازاماتتار - 22 پايىز، سونداي-اق 60 جانە ودان جوعارى جاستاعىلار - 16 پايىز»، - دەدى ول.

ايتۋىنشا، بالالار مەن جاس وسپىرىمدەر اراسىندا ۆيرۋستى جۇقتىرۋ دەڭگەيى الدەقايدا تومەن: 1 جاسقا دەيىنگى بالالار - 6,4 پايىز، 14 جاسقا دەيىنگىلەر - 4,3 پايىز، 15-19 جاس ارالىعىنداعى جاس وسپىرىمدەر مەن جاستار - 6,9 پايىز.

بريفينگ سوڭىندا اسەل قالىقوۆا 6-اي سايىن بەلسەندى تۇردە ۆاكسينا الۋ كەرەكتىگىن، ادام كوپ جينالاتىن جەرلەردەن اۋلاق بولۋدى، ال كەلۋشىلەر كوپ جينالاتىن قوعامدىق ورىنداردا بولۋ قاجەت بولعان جاعدايدا مەديتسينالىق بەتپەردە كيۋدى، الەۋمەتتىك قاشىقتىقتى جانە جەكە باس گيگيەناسىن ساقتاۋعا كەڭەس بەردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى