پرەمەر-مينيستر جامبىل وبلىسىنىڭ دامۋ باسىمدىقتارىن ايقىندادى
بۇل تۋرالى پرەمەر-مينيستر ءاليحان سمايىلوۆ تاراز قالاسىندا جامبىل وبلىسىنىڭ اكتيۆىمەن كەزدەسۋى بارىسىندا ايتتى، دەپ حابارلايدى قازاقپارات ۇكىمەتتىڭ تەلەگرام كانالىنا سىلتەمە جاساپ.
ءاليحان سمايىلوۆ اكىمدىكتىڭ الدىندا ءوڭىردى ودان ءارى الەۋمەتتىك-ەكونوميكالىق دامىتۋ، ونىڭ ىشىندە ق ر پرەزيدەنتىنىڭ سايلاۋالدى باعدارلاماسىن جانە باسقا دا ستراتەگيالىق قۇجاتتاردى ىسكە اسىرۋ جونىندەگى ءىس-قيمىل جوسپارى شەڭبەرىندە مىندەتتەر تۇرعانىن اتاپ ءوتتى.
الداعى جىلدارى الەۋمەتتىك نىسانداردى، تۇرعىن ءۇي- كوممۋنالدىق، ەنەرگەتيكالىق جانە اۋىلدىق ينفراقۇرىلىمدى جاڭعىرتۋ، كاسىپكەرلىكتى قولداۋ، جاڭا ينۆەستيتسيالىق جوبالاردى ىسكە قوسۋ، جەرگىلىكتى جولداردىڭ ساپاسىن ارتتىرۋ جانە ت. ب. شارالار جۇزەگە اسىرىلماق.
وڭىردە 9,5 مىڭ وقۋشىعا ارنالعان 13 جاڭا مەكتەپ جانە 30 العاشقى مەديتسينالىق-سانيتاريالىق كومەك نىسانى اشىلادى، سونداي-اق 3 اۋداندىق اۋرۋحانا جاڭعىرتىلادى.
2021-جىلدان باستاپ كوروناۆيرۋس ينفەكتسياسىنا قارسى وتاندىق QazVac ۆاكسيناسىن شىعاراتىن بيوفارماتسيەۆتيكالىق زاۋىتتىڭ ەكىنشى كەزەڭىنىڭ قۇرىلىسىن اياقتاۋ جوسپارلانىپ وتىر.
«وبلىس اكىمى ازاماتتاردىڭ تۇرمىس دەڭگەيى مەن ءال-اۋقاتىن ارتتىرۋ جونىندەگى بارلىق جوسپارلاردىڭ ءتيىمدى ىسكە اسىرىلۋىن قامتاماسىز ەتۋى ءتيىس»، - دەپ اتاپ ءوتتى پرەمەر-مينيستر.
سونداي-اق، ءاليحان سمايىلوۆ ءوڭىر باسشىلىعى وتاندىق ازىق-تۇلىك ونىمدەرىن ءوندىرۋدى ۇلعايتۋ جانە باعانىڭ نەگىزسىز وسۋىنە جول بەرمەۋ جونىندەگى جۇمىستى باقىلاۋدا ۇستاۋى كەرەك ەكەنىن ايتتى.
بۇعان دەيىن حابارلاعانىمىزداي، بۇگىن پرەمەر-مينيستر ءاليحان سمايىلوۆ تاراز قالاسىنا بارىپ، جامبىل وبلىسىنىڭ بارلىق دەڭگەيدەگى ءماسليحاتتار دەپۋتاتتارىنىڭ جينالىسىنا قاتىستى. وندا پرەمەر-مينيستر مەملەكەت باسشىسىنىڭ وبلىس اكىمى لاۋازىمىنا ءاليحان بالقىبەكوۆ پەن نۇرجان نۇرجىگىتوۆتىڭ كانديداتۋرالارىن قاراۋعا ەنگىزۋ تۋرالى حاتىن وقىدى. مەملەكەت باسشىسىنىڭ جارلىعىمەن نۇرجان مولديار ۇلى نۇرجىگىتوۆ جامبىل وبلىسىنىڭ اكىمى لاۋازىمىنا قايتا تاعايىندالدى.
