ءبىرىنشى قاباتتان ەكىنشى قاباتقا تاماق جەتكىزگەن كەزىم بولدى - كۋرەردىڭ اڭگىمەسى
قازىر ادامداردا ۋاقىت جوق. كەيدە قالانىڭ قاربالاس تىرشىلىگىنەن دەمالعىسى كەلەدى. تاماق تانۋ ماسەلەسى كاسىپكەرلەردى بۇل جاعدايدان قالاي شىعۋعا بولاتىنىن ويلاۋعا ءماجبۇر ەتتى؟ شەشىم رەتىندە جەتكىزۋ قىزمەتى پايدا بولدى. بۇگىندە ءبىز ۇيدە بولسىن، كەڭسەدە دە بىرنەشە مينۋت ىشىندە تاعامعا تاپسىرىس بەرە الامىز.
ەڭ ءبىرىنشى تاماق جەتكىزۋ 1889 -جىلى پايدا بولدى. ونى نەاپول پيسسەرياسىنىڭ يەسى جانە اسپاز رافاەلە ەسپوزيتو جۇزەگە اسىردى. ول ءوزىنىڭ ءدامدى پيسساسىن يتاليان پاتشاسى مەن پاتشايىمىنا اكەلگەن. ولار نەاپولگە ساپارمەن كەلگەن بولاتىن، ءبىراق پيسسەرياداعى تۇسكى اس جوسپارلارىندا جوق ەدى. سودان كەيىن تاپقىر ەسپوزيتو پيسسانى ءوزى جەتكىزۋگە شەشىم قابىلداعان. ەكىنشى دۇنيەجۇزىلىك سوعىستان كەيىن جەتكىزۋ قىزمەتى ەۋروپادان الەمگە تارالدى.
قازاقستانعا بۇل قىزمەتتىڭ جەتكەنىنە كوپ بولا قويعان جوق. ال ا ق ش دايىن تاعامدى تۇتىنۋدا كوشباسشى سانالادى. امەريكالىقتاردىڭ جارتىسىنا جۋىعى تاعامدى ۇيگە جەتكىزۋگە تاپسىرىس بەرەدى. ەۋروپادا بۇل ادەت سيرەك كەزدەسەدى، ءبىراق ۇلى بريتانيادا حالىقتىڭ %7 قوسىمشالار ارقىلى تاعامعا تاپسىرىس بەرەدى.
قازاقستان نارىعىنا وسى قىزمەت ءتۇرى كىرگەننەن كەيىن تاعام نەمەسە باسقا دا زاتتاردى جەتكىزۋشى ادامدار پايدا بولا باستادى.
سونىڭ ءبىرى - ەرحان بايتۇرسىن. جاسى 24 تە. تۇركىستان وبلىسىنىڭ تۋماسى. 1 جىلدان بەرى جەتكىزۋ قىزمەتىندە جۇمىس ىستەپ كەلەدى. ەرحان سەيىلحان ۇلى ءۇيدىڭ تۇڭعىشى. وزىنەن كەيىن ەكى ءىنىسى، ەكى قارىنداسى بار. اتا-اناسى اۋىلدا تۇرادى. اناسى مۇعالىم، اكەسى ۆاحتالىق جۇمىستا ىستەيدى. ءوزى بولاشاعىنا اقشا جيناۋعا تالپىنىپ ءجۇر. كۇنىنە 8 ساعاتتا 10-15 مىڭ تەڭگە تابىس تابادى.
«مەن بۇل قىزمەت تۇرىنە ءىنىم ارقىلى كەلدىم. 2 جاس كىشى ءىنىم ستۋدەنت كەزىندە «ياندەكس ەدا» جەتكىزۋ قىزمەتىندە جۇمىس ىستەي باستادى. ءبارى سودان باستالدى. ياندەكستە ودان كەيىن Glovo مەن Wolt-تا ىستەدىم. ءارقايسىسىنىڭ ءوز زاڭدارى بار، تەست پەن كەزدەسۋ بولادى. ساعان كليەنتتەرمەن قالاي سويلەسۋ، جولدا قالاي ءجۇرۋ كەرەگىن ۇيرەتەدى»، - دەيدى ول.
جەتكىزۋ قىزمەتىندە تاڭداعان ايماعىڭا بايلانىستى مەكەن-جايعا تاعام جەتكىزىلەدى.
«العاش جۇمىسقا كىرگەندە «جاياۋ، موپەد، ۆەلوسيپەد جانە ماشينا» دەگەن ستاتۋستار تۇرادى. تاڭداۋىڭا قاراي جەتكىزۋ قاشىقتىعى دا بەلگىلەنەدى»، - دەيدى ول.
مىسالى، ەرحاننىڭ ءبىرىنشى قاباتتان ەكىنشى قاباتقا تاعام جەتكىزگەن كەزدەرى دە بولعان.
«بىردە مەيرامحانادان تاپسىرىس ءتۇستى. بارىپ العاسىن قاراسام، ءدال سول عيماراتتىڭ ەكىنشى قاباتىنا جەتكىزۋ كەرەك ەكەن. ونىڭ سەبەبى ادامنىڭ جالقاۋلىعىنان ەمەس. قازىر الماتىدا تۋريستەر كوپ. بىلمەيدى. كوشەدە كوپ كەزدەستىرەسىڭ. ولار جەتكىزۋ قورابىندا جازىلعان كومپانيا اتاۋىن كورىپ قالىپ، سونىڭ قوسىمشاسىن جۇكتەپ الىپ جاتادى»، - دەيدى ول.
ول باسقالار سياقتى 12-14 ساعات جۇمىس ىستەپ، دەنساۋلىعىنان ايرىلعىسى كەلمەيتىنىن ايتادى.
«ايىنا 500 مىڭ تەڭگەگە دەيىن تابۋعا بولادى. ءبىراق ول ءۇشىن ماشينا نەمەسە موپەد كەرەك. 12 ساعاتتان ارتىق جۇمىس ىستەيسىڭ. ءوزىمدى ولاي قاتتى قينامايمىن. ايىنا شامامەن ورتاشا تابىسىم - 300 مىڭ تەڭگە»، - دەيدى ەرحان.
جەتكىزۋ قىزمەتىندە قىزىق وقيعالار دا بولىپ تۇرادى. ەرحان ءوزىنىڭ باسىنان وتكەن وقيعالاردىڭ ءبىرىن ايتىپ بەردى.
«ءبىر كۇنى ماعان 15 مىڭ تەڭگە KFC- گە تاپسىرىس ءتۇستى. جازىلعان مەكەن-جايعا كەلدىم. كورسەتىلگەن عيماراتتى تاپپادىم. انىقتاي كەلگەندە جۇيەدە قاتە كەتكەن ەكەن. تۋرا سول كوشە استانادا دا بار، ءبىراق تاپسىرىس قابىلدانعاندا الماتى بولىپ وزگەرىپ كەتكەن. ول كەزدە ماشينامەن ءجۇر ەدىم. بۇنداي قاتەلىك كەزىندە جەتكىزۋ قىزمەتىنىڭ كومپانياسى كليەنتكە اقشاسىن قايتارىپ بەرەدى دە، تاماق كۋرەردىڭ وزىندە قالادى. قايتارىپ اپارىپ بەرگەنىڭمەن المايدى. ومىرىمدە العاش رەت KFC-دى سولاي 3 كۇن جەگەنمىن»، - دەيدى ول.
قازىر الماتىدا رەسەيلىكتەر كوبەيىپ كەتتى. ولار كوبىنە تاپسىرىستى ياندەكسپەن بەرەدى ەكەن. جەتكىزۋ قىزمەتىنە جۇمىسقا كىرگەندە كيىم مەن قوراپتى وزدەرى بەرەدى. ءبىراق تەگىن ەمەس.
«4 ماۋسىمنىڭ دا كيىمدەرىن بەرەدى. ءبىراق اقىلى. كيىمدەر 2-3 مىڭ تەڭگەنىڭ اينالاسىندا. قورابى 15 مىڭ تەڭگە. ءبارىن الاتىن اقشاڭنان قايتارىپ قالادى»، - دەيدى ول.
ەرحان «ياندەكس ەدادا» كولىكپەن جۇمىس ىستەگەن. ءبىراق كولىكتىڭ شىعىنى كوپ بولعاسىن ساتىپ جىبەرگەن. قازىر ۆەلوسيپەدپەن ءناپاقاسىن تاۋىپ ءجۇر.
«الماتى كەپتەلىستىڭ قالاسى. كەشكە قاراي تاعامدى ۆەلوسيپەدپەن كولىككە قاراعاندا تەز جەتكىزەسىڭ. ءبىر جاعىنان ىڭعايلى، شىعىنا دا از»، - دەيدى ەرحان.
«قالادا ۆەلوجولدار سانىن كوبەيتۋ كەرەك. كەرىسىنشە، «ۆەلوجولدى جاۋىپ، كولىك جولىن كەڭەيتۋ قاجەت» دەپ ايتىپ جاتادى. بۇلاي ىستەسە دە كەپتەلىس ازايمايدى. جاسىل قالا دەپ جاتىرمىز عوي، ادامدار جۇمىسقا ۆەلوسيپەدپەن بارۋ كەرەك. سوندا عانا كەپتەلىس ماسەلەسىن شەشە الامىز. ءبىر جاعىنان دەنساۋلىققا دا پايدالى. كەيىنگى كەزدە ۆەلوجول كوبەيىپ جاتىر. مەن وعان قۋانامىن».
«الماتى ءىرى مەگاپوليس بولعاسىن ءبارى اسىعىس. جىلدام جۇرەدى. موپەدپەن ءجۇرىپ كولىككە سوعىساتىن جاعدايلار ءجيى كەزدەسەدى. جەتكىزۋ قىزمەتىندە اپاتقا ۇشىراعاننان كەشىگىپ بارعان دۇرىس دەپ ۇيرەتەدى»، - دەيدى كۋرەر.
ەرحاننىڭ الدىنا قويعان ماقساتى شەتەل ارالاپ ساياحاتتاۋ. قازىر ارمانىن ورىنداۋ ءۇشىن اقشا جيناپ جاتىر.
«جاس كەزىڭدە ساياحاتتاعانعا نە جەتسىن. قازاقتا اسىڭ باردا ەل تانى بەرىپ ءجۇرىپ، اتىڭ باردا جەر تانى جەلىپ ءجۇرىپ» دەگەن ءسوز بار»، - دەيدى ول.
massaget.kz
